އިންޑިއާއާ އެކު އޮންނަނީ ވަރަށް ޚާއްސަ ގުޅުމެއް ކަމަށާއި، އެފަދަ ގުޅުމެއް ޗައިނާއާ އެކު ދުވަހަކު ވެސް ނޯންނާނެ ކަމަށް އެމެރިކާގެ ޚާރިޖީ ވަޒީރު ރެކްސް ޓިލަރސަން ވިދާޅުވެއްޖެއެވެ.
އަންނަ ހަފްތާގައި އިންޑިއާއަށް ކުރައްވާ ދަތުރުފުޅުގެ ކުރިން ވޮޝިންޓަންގައި ހުންނަ ސެންޓަރ ފޮރ ސްޓްރެޓީޖިކް އެންޑް އިންޓަރނޭޝަނަލް ސްޓަޑީޒްގައި ވަހަކަ ދައްކަވަމުން ޓިލަރސަން، ޗައިނާ ސިފަކުރެއްވީ ޑޮމިކްރަސީއާ ބީރައްޓެހި ޤައުމެއްގެ ގޮތުގައެވެ. އަދި ބައިނަލްއަޤްވާމީ ޤާނޫންތަކާއި ހަމަތަކުން ބޭރުން ޗައިނާއިން އަމަލުކުރަމުން އަންނަކަމަށް ޓިލަރސަން ތުހުމަތުކުރެއްވިއެވެ. އޭގެ މިސާލެއްގެ ގޮތުގައި އޭނާ ނެންގެވީ ދެކުނު ޗައިނާ ކަނޑުގެ މައްސަލައެވެ. އަވަށްޓެރި އެެހެން ޤައުމުތަކުން ވެސް ދެކުނު ޗައިނާ ކަނޑުގެ މިލްކުވެރިކަމާ މެދު ދައުވާކުރަމުންދަނިކޮށް، އަދި އދ. އިން ވެސް ޗައިނާއިން އެޤައުމުގެ ސަރަހައްދީ އިމުން ބޭރުން ދެކުނު ޗައިނާ ކަނޑުގެ ސަރަހައްދަށް އަތް ގަދަކުރަމުންދާ ކަމަށް ބުނެފައިވަނިކޮށް، ޗައިނާއިން ގެންދަނީ އެކަނޑުގައި އަސްކަރީ މަރުކަޒުތައް ހަދަމުންނެވެ.
ޓިލަރސަން ވިދާޅުވީ ޗައިނާއާ އެކު ވެސް ބިނާކުރުވަނިިވި ގާތް ގުޅުމެއް ބޭއްވުމަށް އެމެރިކާއިން ބޭނުންވާ ކަމަށާއި، އެހެން ނަމަވެސް ޗައިނާގެ ކުރިމަތީގައި އެމެރިކާ ކުޑަނުވާނެ ކަމަށެވެ.
ޗައިނާއިން އެޤައުމުގެ ނުފޫޒު އިންޑިއާ ކަނޑާއި މުޅި ދުނިޔޭގައި ގަދަކުރުމަށް މަސައްކަތްކުރަމުންދާ މިދަނޑިވަޅުގައި ޓިލަރސަން ވިދާޅުވީ އިންޑިއާއާއި އެމެރިކާއިން ހިއްސާކުރަނީ ހަމައެކަނި ޑިމޮކްރަސީއަށް އޮންނަ ލޯބި ނޫންކަމަށާއި، ދެޤައުމުންވެސް ކުރިމަގާއިމެދު އުއްމީދުތަކެއް ހިއްސާކުރާކަަމަށެވެ.
ވޮޝިންގޓަންގައި ޓިލަރސަން ވާހަކަ ދެއްކެވީ ޗައިނާގެ ވެރިރަށް ބެއިޖިންގައި ޗައިނާގެ ވެރިކަންކުރާ ކޮމިއުނިސްޓް ޕާޓީގެ ކޮންގްރެސްގައި ރައީސް ޝީ ޖިންގޕިންގ ތަޤްރީރްކުރެއްވިތާ މަދު ގަޑިއިރުތަކެއްގެ ތެރޭގައެވެ. މިތަޤްރީރުގައި ޝީ ޖިންގޕިންގ ވިދާޅުވީ ޗައިނާއަކީ މިހާރު ދުނިޔޭގެ އެންމެ ބާރުގަދަ އެއް ޤައުމު ކަމަށެވެ. އަދި ކޮމިއުނިސްޓް ވެރިކަމެއްގައި ޗައިނާއަށް ލިބުނު ކުރިއެރުމުގެ ސަބަބުން ކުރިއަރަމުން އަންނަ ޤައުމުތަކަށް "އެހެން ގޮތެއް" އޮތްކަން އެނގިއްޖެ ކަމަށް ޝީ ވިދާޅުވިއެވެ.
ޗައިނާއަށް އަމާޒުކޮށް ޓިލަރސަން ބަހުގެ ހަމަލާތަކެއް ފޮނުއްވައި، އަންނަ ހަފްތާގައި އިންޑިއަށް ޒިޔާރަތްކުރައްވާއިރު، އަންނަ ނޮވެމްބަރު މަހު އޭޝިއާއަށް ކުރައްވާ ދަތުރުފުޅެއްގައި އެމެރިކާގެ ރައީސް ޑޮނަލްޑް ޓްރަމްޕް ޗައިނާއަށް ވަޑައިގަންނަވާނެއެވެ.
