ޗެމްޕިއަންސް ލީގު: ޗެލްސީ އާއި އެޓްލެޓިކޯ ވެސް އެއްވަރުވެއްޖެ

ޔުއެފާ ޗެމްޕިއަންސް ލީގުގައި ޗެލްސީ އާއި އެޓްލެޓިކޯ ކުޅުނު މެޗުތަކުން އެ ދެ ޓީމުވެސް އެއްވަރުވެއްޖެއެވެ.

ޗެމްޕިއަންސް ލީގުގެ ގްރޫޕް "ސީ" ގައި އަންގާރަ ދުވަހުގެ ރޭ އަމިއްލަ ދަނޑުގައި އިޓަލީގެ އޭއެސް ރޯމާ އާއި ދެކޮޅަށް ޗެލްސީ ކުޅުނު މެޗު އެއްވަރުވެފައިވަނީ 3-3 ގެ ނަތީޖާއަކުންނެވެ. މި މެޗުގައި ދެ ޓީމުގެ ފަރާތުންވެސް ވަނީ ބަލާހިތްވާ ޒާތުގެ އެޓޭކިން ފުޓްބޯޅައެއް ފެނިގެން ގޮސްފައެވެ. ގިނަ ލަނޑުތަކެއް ފެނިގެންދިޔަ މި މެޗުގެ ފުރަތަމަ ލަނޑު ޖަހާ ލީޑު ނަގާފައިވަނީ ޗެލްސީއިންނެވެ.

ޗެލްސީގެ ފުރަތަމަ ލަނޑު ފުރަތަމަ ހާފުގެ 11 ވަނަ މިނެޓުގައި އޭރިއާ ބޭރުން ބާރު ހަމަލާއެއް ގޯލުގެ ތެރެއަށް ފޮނުވާލައިގެން އެ ޓީމަށް ކާމިޔާބު ކޮށްދިނީ ބްރެޒިލްގެ ޑިފެންޑާ ޑޭވިޑް ލުއިޒްއެވެ. ޗެލްސީއިން ރަނގަޅަށް ކުޅެމުން ދަނިކޮށް ރޯމާއަށް ވަނީ ނަތީޖާ ހަމަހަމަކުރުމަށް ރަނގަޅު ފުރުސަތެއް ލިބި ބޭކާރުވެފައެވެ. އެގޮތުން އެ ޓީމުގެ ވިންގާރ ޑިއެގޯ ޕެރޯޓީ ފޮނުވާލި ހަމަލާ ޗެލްސީގެ ކީޕަރު ކޯޓޮއާ ވަނީ ދިފާއުކޮށްފައެވެ.

ރޯމާއަށް ލިބުނު ފުރުސަތުގެ ބޭނުން ނުހިފުމުގެ ނަތީޖާއަކަށް ވެގެންދިޔައީ އޭގެ ދެ މިނެޓު ފަހުން މޮރާޓާގެ އެހީތެރިކަމާއެކު އެޑެން ހަޒާޑް ލަނޑެއް ޖަހާ ޗެލްސީގެ ލީޑު އިތުރަށް ފުޅާކޮށްދިނުމެވެ. އެހެނަސް އޭގެ ތިން މިނެޓު ފަހުން ރޯމާގެ ޑިފެންޑާ އެލްކްޒެންޑާ ކޮލަރޯވް ވަނީ އެ ޓީމަށް ލަނޑެއް ކާމިޔާބުކޮށްދީ ނަތީޖާގެ ފަރަގު ކުޑަކޮށްދީފައެވެ. ފުރަތަމަ ހާފު ނިމިފައިވަނީ ދެ ލަނޑު އެއް ލަނޑުން ރޯމާގެ މައްޗަށް ޗެލްސީ ކުރީގައި އޮވެގެންނެވެ.

ފުރަތަމާ ހާފެކޭ އެއްގޮތަށް ދެވަނަ ހާފުގައިވެސް ދެ ޓީމުން ވަނީ ގިނަ ފުރުސަތުތަކެއް ތަނަވަސް ކޮށް ވާދަވެރި ކުޅުމެއް ދައްކާފައެވެ. މި ހާފުގައި ރޯމާއަށް ނަތީޖާ ހަމަހަމަ ކޮށްދިނީ 64 ވަނަ މިނެޓުގައި އެޑިން ޒެކޯއެވެ. އޭގެ ހަ މިނެޓު ފަހުން ޒެކޯ ވަނީ އޭނާ މެޗުގައި ޖެހި ދެވަނަ ލަނޑު ޖަހާ ފުރަތަމަ ފަހަރަށް ރޯމާއަށް މެޗުގެ ލީޑު ނަގައިދީފައެވެ. އެހެނަސް އެޑެން ހަޒާޑް ވަނީ 75 ވަނަ މިނެޓުގައި ޕެޑްރޯ ނަގައިދިން ހުރަހެއް ގޯލުގެ ތެރެއަށް ފޮނުވާލައިގެން ޗެލްސީއަށް މެޗު އެއްވަރު ކޮށްދީފައެވެ. މި ލަނޑަށް ފަހުވެސް ފޯރިގަދަ ކުޅުމެއް ފެނިގެންދިޔައިރު އެއްވެސް ޓީމަކަށް ނަތީޖާ ބަދަލުކޮށްލެވިފައެއް ނުވެއެވެ.

މި ގްރޫޕުގެ ދެވަނަ މެޗުގައި ސްޕެއިންގެ އެޓްލެޓިކޯ މެޑްރިޑާއި އަޒެރްބައިޖާންގެ ޗެމްޕިއަން ގަރްބާގް ކުޅުނު މެޗު ނިމިފައިވަނީ 0-0 އަކުން އެއްވަރުވެގެންނެވެ. މި މެޗުގައި އެޓްލެޓިކޯއިން ލަނޑު ޖެހުމަށް މާކަ އެދެވޭ ފުރުސަތުތަކެއް ތަނަވަސް ކޮށްފައި ނުވާއިރު ގަރްބާގްއިން ވަނީ ކައުންޓާ އެޓޭކުގައި އެޓްލެޓިކޯގެ ގޯލަށް ނުރައްކާ ކޮށްފައެވެ. މި މެޗު އެއްވަރުވުމާއި ވިދިގެން ޗެމްޕިއަންސް ލީގުގެ ދެވަނަ ބުރަށް ކޮލިފައިވުމަށް އެޓްލެޓިކޯއިން ކުރަމުން އަންނަ އުއްމީދުތަކަށް އިތުރު ހުރަސްތަކެއް ވަނީ ކުރިމަތިވެފައެވެ.

މި ގްރޫޕުގެ ހުރިހާ ޓީމެއްވެސް ތިން މެޗު ކުޅެފައިވާއިރު އެއްވަނައިގައި ހަތް ޕޮއިންޓާއެކު އޮތީ ޗެލްސީއެވެ. ދެވަނައިގައި ފަސް ޕޮއިންޓާއެކު ރޯމާ އޮތްއިރު ތިން ވަނައިގައި ދެ ޕޮއިންޓާއެކު އޮތީ އެޓްލެޓިކޯއެވެ. އަދި ޕޮއިންޓް ތާވަލުގެ ފުލުގައި އެއް ޕޮއިންޓާއެކު އޮތީ ގަރްބާގްއެވެ.