އިސްރަށްވެއްސެއް ޖަލުގައި މަރުވި މައްސަލަ ތަޙުޤީޤު ކުރުމަށް ރައީސް މައުމޫން ގޮވާލައްވައިފި
10 އޮކްޓޯބަރު 2017 | އަންގާރަ 16:18އަބްދުލް ރަޝީދު ވަރަށް ބޮޑަށް ބަލިވެގެން ހޯމަ ދުވަހު ވަނީ އައިޖީއެމްއެޗްގައި އެޑްމިޓްކޮށްފައި
ޙުކުމް ތަންފީޒުކުރަމުން ދަނިކޮށް މަރުވި އަބްދުލް ރަޝީދު މުހައްމަދު
ޖަލުގައި ހުރި އިސްރަށްވެއްސެން މަރުވި މައްސަލައިގައި ކަންބޮޑުވުން ފާޅުކުރައްވާ، އެކަން ފުރިހަމައަށް ތަޙުޤީޤު ކުރުމަށް ކުރީގެ ރައީސުލްޖުމްހޫރިއްޔާ އަދި ވެރިކަންކުރާ ޕީޕީއެމްގެ އިންތިޚާބީ ރައީސް، އަލްއުސްތާޒް މައުމޫން ޢަބްދުލްޤައްޔޫމް ގޮވާލައްވައިފިއެވެ.
މޭޑޭ މުޒާހަރާގައި މާރާމާރީ ހިންގި ކަމުގެ ތުހުމަތުގައި ޖަލަށްލާފައި ހުރި އަބްދުލް ރަޝީދު މުހައްމަދު ޖަލުގައި ހުކުމް ތަންފީޒު ކުރަމުންދަނިކޮށް، އަންގާރަ ދުވަހު މަރުވި މައްސަލައަށް އިޝާރާތް ކުރައްވާ ރައީސް މައުމޫން ކުރެއްވި ޓްވީޓެއްގައި ވިދާޅުވީ، މޯލްޑިވްސް ކަރެކްޝަނަލް ސަރވިސްގެ ބެލުމުގެ ދަށުގައި ހުއްޓައި އުމުރުން ދުވަސްވީ މީހަކު މަރުވުމަކީ، ވަރަށް ބޮޑަށް ކަންބޮޑުވެވަޑައިގަންނަވާ ކަމެއް ކަމަށެވެ. އެމަނިކުފާނު ވަނީ މި ކަން ހިނގާދިޔަ ގޮތް އެންމެ ފުރިހަމައަށް ތަޙުޤީޤު ކުރުމަށް ގޮވާލާފައެވެ.
މި ޓްވީޓާ އެކު ރައީސް މައުމޫން ވަނީ އަބްދުލް ރަޝީދު މުހައްމަދުގެ ފޮޓޯއެއް ވެސް އެޓޭޗް ކުރައްވާފައެވެ.
އަބްދުލް ރަޝީދު މުހައްމަދުގެ މަރާ ގުޅޭ ގޮތުން ކަރެކްޝަނަލް ސަރވިސަސްގެ މީޑިޔާ އޮފިޝަލް ވިދާޅުވީ، އުމުރުން 51 އަހަރުގެ ރަޝީދު، ބޭރަށް ހިންގާތީ ހޮސްޕިޓަލަށް ގެންދެވުނީ، ހޯމަ ދުވަހު ކަމަށެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި "ބޭރަށް ހިންގާތީ" ރަޝީދު ހޮސްޕިޓަލަށް ގެންދިޔުމުގެ ކުރިން އޭނާގެ ހާލު ވަނީ ވަރަށް ދެރަވެފައެވެ. އަދި އެކި ފަހަރުމަތިން އޭނާ ހޮޑުލައި ހަދާފައިވާއިރު، އޭނާގެ ހޮޑާއި، ބޮޑުކަމުދާތަކެތީގައި ލޭ ހުންނަ ކަމަށް ބުނެ، އޭނާ އާއި އޭނާއާ އެކު ތިބި އެހެން ޤައިދީން ވަނީ އެކަން ކަރެކްޝަންސް އޮފިސަރުންގެ ސަމާލުކަމަށް ގެނެސްފައެވެ.
މޭޑޭ މުޒާހަރާގައި މާރާމާރީ ހިންގި ކަމުގެ ތުހުމަތުގައި ރަޝީދުގެ މައްޗަށް ފަސް އަހަރުގެ ހުކުމެއް ކުރެވުނު އިރު، އޭނާގެ ހުކުމް ތަންފީޒުކޮށް ނިމެނީ އަންނަ އަހަރުގެ ފެބްރުއަރީ މަހުގެ 18 ވަނަ ދުވަހުއެވެ.
