ކުއްޖަކަށް ދިމާވާ އެއްވެސް ހާދިސާއަކާ ގުޅިގެން އެ ކުއްޖާގެ ކަރާމާތަށް އުނިކަން އަންނަ ގޮތަށް މައުލޫމާތު އާންމުކުރުމަކީ އެ ކުއްޖެއްގެ އަސާސީ ހައްޤަކަށް އަރައިގަތުން: ސިއްޚަތާ ބެހޭ ވުޒާރާ
7 ނޮވެމްބަރު 2026 | ހޮނިހިރު 03:58ކުޑަކުދިންގެ ހައްޤުތައް ރައްކާތެރިކުރުމުގެ ޤާނޫނާ ޚިލާފަށް، ކުދިންގެ ކަރާމާތަށް އުނިކަން އަންނަ ގޮތަށް ޒާތީ މައުލޫމާތު މީޑިއާތަކުގައި އާންމު ނުކުރުމަށް ސިއްޚަތާ އާއިލާ އާއި އިޖްތިމާއީ އެހީއާ ބެހޭ ވުޒާރާއިން އިލްތިމާސްކޮށްފި. ކުޑަކުދިންގެ މަސްލަހަތު ހިމާޔަތްކުރުމަކީ އެންމެންގެ ޒިންމާއަކަށްވާއިރު، ކުއްޖާގެ ވަކިވަކި މައުލޫމާތު ހާމަކުރުމަކީ އެކުދިންގެ އަސާސީ ހައްޤަކަށް އަރައިގަތުން ކަމަށް އެ ވުޒާރާއިން ބުނޭ
ކުޑަކުދިންނަށް ކުރާ އަނިޔާ - ކުއްޖަކަށް ދިމާވާ އެއްވެސް ހާދިސާއަކާ ގުޅިގެން، އާންމުން ކަންކަމާމެދު ދެކޭގޮތަށް ނުފޫޒުފޯރުވުމަށް ނުވަތަ އެނޫންވެސް އެއްވެސް ބޭނުމަކަށްޓަކައި، ކުއްޖާގެ ކަރާމާތަށް އުނިކަން އަންނާނެހެން މައުލޫމާތު އާންމުކުރުމަކީ ކުޑަކުއްޖެއްގެ އަސާސީ ހައްޤަކަށް އަރައިގަތުން ކަމަށް އެ ވުޒާރާއިން ވަނީ ބުނެފައި | ޕޮލިސް
އިތުބާރުކުރެވޭ މަޤާމެއްގައި ހުރި ފަރާތަކުން ކުޑަކުއްޖަކަށް ޖިންސީ ގޯނާކުރި ކަމަށް ތުހުމަތުކުރެވޭ މައްސަލައަކާ ގުޅިގެން، އެ ކުއްޖާގެ ކަރާމާތަށް ގެއްލުންވާނެ ފަދަ ގޮތްގޮތަށް މީޑިއާގެ އެކި މަންސަތަކުގައި މައުލޫމާތު ދައުރުވަމުންދާތީ އެކަން އެގޮތަށް ނުކުރުމަށް ސިއްޚަތާ އާއިލާ އާއި އިޖްތިމާއީ އެހީއާ ބެހޭ ވުޒާރާއިން އިލްތިމާސްކޮށްފި އެވެ.
މިކަމާ ގުޅިގެން އެ ވުޒާރާއިން ހުކުރު ދުވަހު ނެރުނު ބަޔާނުގައި ބުނެފައިވަނީ، ދިވެހިރާއްޖޭގެ ޤާނޫނުއަސާސީގެ ދެވަނަ ބާބުގެ 35 ވަނަ މާއްދާގައި ކުޑަކުދިންނަކީ އާއިލާގެ ފަރާތުންނާއި، ޖަމާއަތުގެ ފަރާތުންނާއި، ދައުލަތުގެ ފަރާތުން ޚާއްސަ އެހީތެރިކަމާއި ރައްކާތެރިކަން ލިބެންޖެހޭ ބައެއްކަމަށް ސަރީހަކޮށް ކަނޑައަޅާފައިވާ ކަމަށެވެ. އަދި ދިވެހިރާއްޖޭގެ ޤާނޫނުއަސާސީއާއި ކުޑަކުދިންގެ ހައްޤުތަކާބެހޭ ބައިނަލްއަޤްވާމީ މުއާހަދާއަށް ރިއާޔަތްކޮށް އެކުލަވާލެވިފައިވާ ޤާނޫނު ނަންބަރު 19/2019 (ކުޑަކުދިންގެ ހައްޤުތައް ރައްކާތެރިކުރުމުގެ ޤާނޫނު) ގައި ބަޔާންކޮށްފައިވާ ހަމަތަކާއި ޚިލާފަށް، ކުޑަކުދިންގެ ކަރާމާތަށް އުނިކަން އަންނަގޮތަށް އެކުދިންގެ ޒާތީ މައުލޫމާތު މީޑިއާގެ އެކިއެކި މަންސަތަކުގައި ހާމަކުރަމުންދާކަން ވަނީ ފާހަގަކުރެވިފައި ކަމަށެވެ.
އެ ވުޒާރާގެ ބަޔާނުގައި އިތުރަށް ފާހަގަކޮށްފަައިވަނީ، ކުޑަކުދިންގެ ހައްޤުތައް ރައްކާތެރިކުރުމުގެ ޤާނޫނުގެ 33 ވަނަ މާއްދާގެ ދަށުން، ކުޑަކުދިންގެ ކަރާމާތަށް އެއްވެސް އުނިކަމެއް އަންނާނެ ގޮތަށް އެކުދިންގެ ޒާތީ އެއްވެސް މައުލޫމާތެއް އެއްވެސް ފަރާތަކުން ހާމަކުރުމަކީ މަނާކަމެއް ކަމަށެވެ. ޚާއްސަކޮށް، ކުށުގެ ތުހުމަތު ކުރެވިފައިވާ ކުދިންނާއި، ކުށުގެ ޝިކާރައަކަށްވެފައިވާ ކުދިންގެ އިތުރުން، އެނޫންވެސް ސަބަބަކާ ހުރެ އަޅާލުމާއި ރައްކާތެރިކަން ބޭނުންވާ ކުދިންގެ ނަމާއި، އެޑްރެހާއި، ތައުލީމު ހާސިލުކުރާ ތަނުގެ މައުލޫމާތު ފަދަ ކުއްޖާއަކީ ކާކުކަން ދެނެގަނެވޭނެ އެއްވެސް ޒާތީ މައުލޫމާތެއް ނުވަތަ އެކުދިންގެ ތަސްވީރެއް މީޑިއާއެއްގައި ނުވަތަ އެނޫންވެސް ވަސީލަތެއްގައި ޝާއިއުކުރުމަކީ ޤާނޫނާ ޚިލާފު ކަމެއް ކަމަށް ބުނެފައިވެ އެވެ. މިފަދަ ހަމަތަކެއް ޤާނޫނުގައި ކަނޑައަޅާފައިވަނީ އެކުދިންގެ މަސްލަހަތު އެންމެ މަތީ ދަރަޖައިގައި ރައްކާތެރިކޮށްދިނުމުގެ މަތިވެރި މަޤްސަދުގައި ކަމަށް ވެސް ބަޔާނުގައި ބުނެފައިވެ އެވެ.
އެހެންކަމުން، ކުއްޖަކަށް ދިމާވާ އެއްވެސް ހާދިސާއަކާ ގުޅިގެން، އާންމުން ކަންކަމާމެދު ދެކޭގޮތަށް ނުފޫޒުފޯރުވުމަށް ނުވަތަ އެނޫން ވެސް އެއްވެސް ބޭނުމަކަށްޓަކައި، ކުއްޖާގެ ކަރާމާތަށް އުނިކަން އަންނާނެހެން މައުލޫމާތު އާންމުކުރުމަކީ ކުޑަކުއްޖެއްގެ އަސާސީ ހައްޤަކަށް އަރައިގަތުން ކަމަށް އެ ވުޒާރާއިން ވަނީ ބުނެފަ އެވެ.
ކުޑަކުދިންގެ ހައްޤުތައް ރައްކާތެރިކުރުމަކީ މުޅި މުޖުތަމައުގެ މައްޗަށް އޮތް ޤާނޫނީ އަދި އަޚްލާޤީ ޒިންމާއެއްކަމުގައިވާތީ، ކުޑަކުދިންގެ މަސްލަހަތު ގެއްލޭ ފަދަ އެއްވެސް މައުލޫމާތެއް އެއްވެސް ފަރާތަކުން މީޑިއާގައްޔާއި މީސްމީޑިއާގެ މަންސަތަކުގައި އާންމު ނުކުރުމަށް ސިއްހަތާ އާއިލާއާއި އިޖްތިމާއީ އެހީއާ ބެހޭ ވުޒާރާއިން ވަނީ އަންގާފަ އެވެ.
