އައިކެއަރ އިން ވިލިމާލޭގެ އިސްރަށްވެހިންނަށް ހިލޭ ލޮލުގެ ޚިދުމަތް ފޯރުކޮށްދީފި

ބައިނަލްއަޤްވާމީ ދުވަސްވީ މީހުންގެ ދުވަސް ފާހަގަކުރުމުގެ ގޮތުން، މި އޮކްޓޫބަރު މަހުގެ 2 ވީ ހުކުރު ދުވަހު ވިލިމާލެ ޕޮލިހުން އިންތިޒާމުކޮށްގެން ބޭއްވި "އިސްރަށްވެހިންގެ އުފާ" ހަރަކާތުގައި އައިކެއަރ ހޮސްޕިޓަލުން ބައިވެރިވެއްޖެ އެވެ.

ދުވަސްވީ މީހުންގެ އަގުވަޒަންކޮށް، އެމީހުންގެ ދުޅަހެޔޮކަން އިތުރުކުރުމަށް ޚާއްސަކޮށްގެން ބޭއްވި މި ހަވީރުގައި، އައިކެއަރގެ ޚާއްސަ ޓީމަކުން ވަނީ ވިލިމާލޭގެ އިސްރަށްވެހިންނަށް ލޮލުގެ ސްކްރީނިންގ ޚިދުމަތްތައް ހިލޭ ފޯރުކޮށްދީފަ އެވެ.

އައިކެއަރ އިން ބުނީ މި ހަރަކާތަކީ މުޖުތަމައާ އޮންނަ ގުޅުން ބަދަހިކުރުމަށާއި އުމުރުން ދުވަސްވަމުންދާ ވަރަކަށް ގަވާއިދުން ލޯ ޗެކްކުރުމުގެ މުހިންމުކަން އާންމުންނަށް ހަނދާންކޮށްދިނުމަށް ލިބުނު އަގުހުރި ފުރުސަތެއް ކަމަށެވެ. އަދި ލޮލުގެ ފެނުން ދުޅަހެޔޮކަންމަތީ ދެމެހެއްޓުމަކީ ދުވަސްވީ މީހުންނަށް އަމިއްލަ ފައިމައްޗަށް ތެދުވެ އުޅުމަށާއި، ދުވަހުން ދުވަހަށް ކުރަންޖެހޭ ކަންކަން ފަސޭހަކަމާއެކު ކުރުމުގެ އިތުރުން، އާއިލާއާއެކު އުފާވެރި ވަގުތުތައް ހޭދަކުރުމަށް އެހީތެރިވެދޭ ކަމެއް ކަމަށެވެ. އެހެންކަމުން، އިސްރަށްވެހިންގެ ލޮލުގެ ސިއްހަތަށް ސަމާލުކަން ދިނުމަކީ އެފަރާތްތަކުގެ ދިރިއުޅުމުގެ ފެންވަރު ރަނގަޅުކުރުމަށް ކޮންމެހެން މުހިންމު ކަމެއްގެ ގޮތުގައި އައިކެއަރ އިން ފާހަގަކުރެ އެވެ.

އައިކެއަރ އިން ބުނީ އާންމުގޮތެއްގައި އުމުރުން ދުވަސްވީ މީހުންނަކީ ކެޓަރެކްޓް ނުވަތަ ލޮލަށް ފުސްއެރުމާއި، ގްލައުކޯމާ ނުވަތަ ލޮލުގެ ޕްރެޝަރު މަތިވުން އަދި އުމުރާ ގުޅިގެން މެކިއުލާ ހަލާކުވުން ފަދަ ލޮލުގެ ބަލިތަކަށް ހުށަހެޅުމުގެ ފުރުސަތު ބޮޑު ބައެކެވެ. މީގެ އިތުރުން ހަކުރުބަލި ހުންނަ ފަރާތްތަކުން ލޮލުގެ ސިއްހަތަށް ޚާއްސަ ސަމާލުކަމެއް ދޭންޖެހޭއިރު، ލޮލުގެ ބައެއް ބަލިތަކަކީ އޭގެ ކުރީކޮޅުގައި އެއްވެސް އަލާމާތެއް ނުފެނި އަވަހަށް ބޮޑުވާ ބަލިތަކެކެވެ. އެހެންކަމުން ލޮލުގެ ފެނުމަށް ބަދަލެއް ނައި ނަމަވެސް، ގަވާއިދުން ލޮލުގެ ފުރިހަމަ ޓެސްޓުތައް ހެދުމަކީ ވަރަށް މުހިންމު ކަމެކެވެ. ލޮލުގެ ފެނުމަށް އަންނަ ބަދަލުތަކަކީ ހަމައެކަނި މުސްކުޅިވުމުންވާކަމެއް ކަމަށް ބަލައި ދޫކޮށްނުލައި، ލަސްނުކޮށް ޑޮކްޓަރަށް ދެއްކުމަށް އައިކެއަރ އިން އިލްތިމާސްކުރެ އެވެ.

މިފަދަ އަގުހުރި ހަރަކާތެއްގެ ތެރެއިން މުޖުތަމައު އެއްތަންކޮށް، ލޮލުގެ ސިއްހަތަށް ޚާއްސަ އިސްކަމެއް ދެއްވި ކަމަށްޓަކައި ވިލިމާލެ ޕޮލިހުންނަށް އައިކެއަރގެ ފަރާތުން ވަނީ އިޚްލާސްތެރި ޝުކުރެއް އަދާކޮށްފަ އެވެ. މިފަދަ އިޖުތިމާއީ ބައިވެރިވުންތަކުގެ ޒަރީއާއިން، ލޮލުގެ ސިއްހަތާ މެދު ހޭލުންތެރިކަން އިތުރުކުރުމަށާއި ކޮންމެ އުމުރެއްގެ މީހަކަށް ވެސް ދުޅަހެޔޮ ފެނުމެއް ހޯދައިދިނުމަށް އައިކެއަރ އިން އަބަދުވެސް ދެމިތިބޭނެ ކަމުގެ ޔަގީންކަން އެ ހޮސްޕިޓަލުންދެ އެވެ.

އައިކެއަރ ހޮސްޕިޓަލުން އެޕޮއިންޓްމަންޓް ހެދުމަށް ބޭނުންވާ ފަރާތްތަކުން އެ ހޮސްޕިޓަލުގެ ވެބްސައިޓަށް ޒިޔާރަތްކުރުމަށް ނުވަތަ ވަޓްސްއެޕް އަދި ވައިބަރ މެދުވެރިކޮށް 7201026 އަށް ގުޅުމަށް އައިކެއަރ އިން އެދެ އެވެ.