އޭޝިއަން ގޭމްސް: ދެ ވަނަ މެޗުގައި ޖަޕާން އަތުން ވެސް ރާއްޖެ ބަލިވެއްޖެ

މިހާރު ކުރިއަށްދާ އޭޝިއަން ގޭމްސް އައިޗީ-ނަގޯޔާ 2026 ގައި ރާއްޖޭގެ ފިރިހެން ބީޗު ވޮލީ ބޯޅަ ޓީމު ކުޅުނު ދެވަނަ މެޗުގައި ޖަޕާން އަތުން ވެސް ބަލިވެއްޖެ އެވެ.

އަންގާރަ ދުވަހު ކުޅުނު މެޗުގައި ޖަޕާން އިން ވަނީ ސީދާ ދެ ސެޓުން ރާއްޖޭގެ މައްޗަށް ކުރި ހޯދައިފަ އެވެ. ރާއްޖޭގެ އިސްމާއީލް ސާޖިދު އާއި އާދަމް ނަސީގެ ޕެއާގެ މައްޗަށް، ޖަޕާންގެ ކޯޓާ ކުރޮސާވާ އާއި ތައިޓޯ މިޒުމާޗީގެ ޕެއާ އިން ކުރި ހޯދީ 21-15 އަދި 21-11 އިންނެވެ. 

ނަގޯޔާގެ ހެކިނަން ރިޔޮކުޗީ ބީޗު ކޯޓުގައި ކުޅުނު މެޗުގެ ފުރަތަމަ ސެޓުގެ ކުރީ ކޮޅު ދިވެހިރާއްޖޭގެ ޕެއާ އިން ވަނީ ހަމަހަމަ ކުޅުމެއް ދައްކާފަ އެވެ. މީގެ ކުރިން އީރާންއާ ދެކޮޅަށް ކުޅުނު ފުރަތަމަ މެޗުން ވެސް ރާއްޖެ ވަނީ ބަލިވެފަ އެވެ.

އޭޝިއަން ގޭމްސްގެ ބީޗު ވޮލީގެ އަންހެން ދެވަނަ މެޗުގައި ބުދަ ރާއްޖޭގެ އަންހެން ޕެއާ އާމިނަތު އަރީޝާ އާއި ފާތުމަތު އަނާލް ހޮންކޮންގްއާ ދެކޮޅަށް ނުކުންނާނީ ރާއްޖެ ގަޑިން ފަތިހު 5:00 ޖަހާއިރު އެވެ.