ޑަޔާނާގެ މަތިން "މާ ގިނަ ދުވަސްތަކެއް ނުވެ ހަނދާން ނެތިދާނެ" ކަމަށް، އެކަމާނާ އަވަހާރަވިތާ މަދު ދުވަސްކޮޅެއްގެ ތެރޭގައި ރަސްގެފާނު ޗާލްސް ވިދާޅުވި: ޑަޔާނާގެ ކޮއްކޯފުޅު

ޕްރިންސަސް ޑަޔާނާގެ މަތިން "މާ ގިނަ ދުވަސްތަކެއް ނުވެ ހަނދާން ނެތިދާނެ" ކަމަށް، އެކަމަނާ އަވަހާރަވިތާ މަދު ދުވަސްކޮޅެއްގެ ތެރޭގައި، ރަސްގެފާނު ޗާލްސް ވިދާޅުވި ކަމަށް ޑަޔާނާގެ ކޮއްކޯފުޅު ޗާލްސް ސްޕެންސަރ ތުހުމަތު ކުރައްވައިފި އެވެ. ޑެއިލީ މެއިލް ނޫހުން ބުދަ ދުވަހު ޝާއިއުކުރި ސްޕެންސަރގެ އާ ފޮތުގެ ބައެއްގައި މިކަން ވަނީ ހާމަކޮށް ފައެވެ.

ސްޕެންސަރ ވިދާޅުވި ގޮތުގައި، ޕްރިންސަސް ޑަޔާނާގެ ޖަނާޒާގެ އިހުތިރާމުގެ ހިނގާލުމުގައި ޕްރިންސް ވިލިއަމް އާއި ޕްރިންސް ހެރީ ބައިވެރިކުރުވަން ޑަޔާނާ ބޭނުންފުޅު ނުވާނެ ކަމަށް އޭނާ ވިދާޅުވުމުން، އޭރުގެ ޕްރިންސް އޮފް ވޭލްސް (މިހާރުގެ ރަސްގެފާނު ޗާލްސް) ފޯނުން ގުޅުއްވައި ވަރަށް ބޮޑަށް ކޯފާވެ، ހިތްހަމަނުޖެހުން ފާޅުކުރެއްވި އެވެ.

ޕްރިންސަސް އޮފް ވޭލްސް، ޑަޔާނާ އަވަހާރަވީ 1997 ވަނަ އަހަރުގެ އޯގަސްޓް މަހު ފަރަންސޭސިވިލާތުގެ ޕެރިހުގައި ހިނގި ނުރައްކާތެރި ކާރު އެކްސިޑެންޓެއްގައި ލިބުނު އެތެރެހަށީގެ އަނިޔާތަކާ ގުޅިގެންނެވެ. އެކަމަނާ އަވަހާރަވި އިރު އުމުރުފުޅުން 15 އަހަރާއި 12 އަހަރުގެ ދެ ބޭފުޅުން ކަމަށްވާ ވިލިއަމް އާއި ހެރީ، އޭގެ މަދު ދުވަސްކޮޅެއް ފަހުން ބޭއްވި ޖަނާޒާގެ ހިނގާލުމުގައި ބައިވެރިވެވަޑައިގަތެވެ.

ސްޕެންސަރ ކުރެއްވި މި ތުހުމަތުތަކަށް ބަކިންގްހަމް ޕެލަސްއިން ވަނީ ރައްދު ދީފަ އެވެ. ރަސްގެފާނުގެ ފަރާތްޕުޅުން ނެރުނު ވަރުގަދަ ބަޔާނެއްގައި ބުނެފައިވަނީ، ސްޕެންސަރގެ މި ވާހަކަތަކަކީ އޭނާއަށް ލިބިފައިވާ ފުން ހިތާމައިގެ ސަބަބުން އައިސްފައިވާ ބަދަލުތަކެއް ކަމަށް ބެލެވޭ ކަމަށެވެ.

ޝާހީ ގަނޑުވަރުގެ ތަރުޖަމާނަކު ނެރުއްވި ބަޔާނުގައި ވިދާޅުވީ، އާންމު އުސޫލެއްގެ ގޮތުން ފޮތްތަކާ ގުޅޭގޮތުން ގަނޑުވަރުން އެއްޗެއް ނުބުނި ނަމަވެސް، އާއިލާގެ މީހަކު ވަކިވެދިއުމުން ލިބޭ ހިތާމައިގެ ސަބަބުން، ކަންކަން ނިންމުމުގައާއި ހަނދާންތައް ހުންނަ ގޮތަށް ބަދަލު އަތުވެދާނެކަން ރަސްގެފާނު ގަބޫލުފުޅު ކުރައްވާ ކަމަށެވެ. އަދި އެފަދަ ހިތާމައެއްގެ ސަބަބުން ގިނަ އަހަރުތަކެއް ފަހުން ވެސް ކަންކަން ފެންނަ ގޮތް ތަފާތުވެދާނެ ކަމަށް އެ ބަޔާނުގައިވެ އެވެ.

"ސްވޯން ސޯންގް" ނަމަކަށް ކިޔާ މި ފޮތް އަދި ނެރެފައި ނުވި ނަމަވެސް، ފޮތް ޕަބްލިޝްކުރާ ޕެންގުއިން ރެންޑަމް ހައުސްގެ ތަރުޖަމާނަކު ވަނީ ނޫސްތަކުގައި ޝާއިއުކޮށްފައިވާ ބައިތަކަކީ ސައްހަ ބައިތަކެއްކަން ސީއެންއެން އަށް ކަށަވަރުކޮށްދީފަ އެވެ. ޑެއިލީ މެއިލްއިން ބުނާ ގޮތުގައި، "އެކްސްޕްލޯސިވް" މައުލޫމާތު ހިމެނޭ މި ފޮތުގެ ބައިތައް ޝާއިއުކުރުމުގެ ހާއްސަ ހުއްދަ އެ ނޫހަށް ވަނީ ލިބިފަ އެވެ.

އަންނަ ހަފުތާގައި ނެރުމަށް ހަމަޖެހިފައިވާ މި ފޮތުގައި ސްޕެންސަރ ވަނީ ޝާހީ އާއިލާއަށް ވަރަށް ބޮޑަށް ފާޑުވިދާޅުވެ، އެ ދުވަސްވަރު ހިނގި ފޯނު ކޯލުގެ ތަފުސީލުތައް ލިޔުއްވާފަ އެވެ.

ސްޕެންސަރ ލިޔުއްވާފައިވާ ގޮތުގައި، އޭނާ އެއްވެސް އެއްޗެއް ވިދާޅުނުވެ ހުންނަވަނިކޮށް ޕްރިންސް ޗާލްސް ވަރަށް ބޮޑަށް ކޯފާވެ ހުންނަވައި ވާހަކަދެއްކެވި އެވެ. އަދި ވާހަކަދައްކަވަމުން ގޮސް ކުއްލިއަކަށް ހުއްޓާލެއްވުމަށްފަހު، ޑަޔާނާއާ މެދު އޮތް ނުރުހުމާއި، ޑަޔާނާ އަވަހާރަވުމުން މުޅި ދުނިޔެ އެކަމާ ހިތާމަކުރާތީ ލިބުނު ސިހުން ފާޅުކުރެއްވި ކަމަށް ސްޕެންސަރ ވިދާޅުވި އެވެ.

"ޔަގީންކުރައްވާ، މާ ގިނަ ދުވަސްތަކެއް ނުވެ އަހަރެމެން އޭނާގެ މަތިން ހަނދާން ނައްތާލާނަން،" ޗާލްސް ވިދާޅުވި ކަމަށް ސްޕެންސަރ ލިޔުއްވާފައިވެ އެވެ. ސްޕެންސަރ ވިދާޅުވީ އެ ވާހަކަ ގަބޫލުކުރަން ދަތިވި ކަމަށާއި، އެހެން ވިދާޅުވުމުން ފޯނު ބޭއްވެވީ ކަމަށެވެ.