ޕްރިންސަސް ޑަޔާނާ ތުރުކުރެއްވި ސުވެޓަރެއް 80،000 ޑޮލަރަށް ނީލަންކިޔަނީ

އިނގިރޭސިވިލާތުގެ ރަސްގެފާނު، ޗާރލްސް-3 ގެ ފުރަތަމަ އަނބިކަނބަލުން ޕްރިންސަސް ޑަޔާނާ ތުރުކުރެއްވި ފިނިއިރުލާ "ޖަމްޕަރ"، ނުވަތަ ވިޔުނު ސުވެޓަރެއް 80،000 ޑޮލަރަށް ނީލަން ކިޔަން ތައްޔާރުވެއްޖެ އެވެ.

މި ސުވެޓަރަކީ "ވޯރމް އެންޑް ވޮންޑަރފުލް" ކިޔާ ފޭރާން ފަރުމާކުރާ ލޭބަލަކުން ހަދާފައިވާ، ހުދު ކަންބަޅިބަކަރިތަކެއްގެ ތެރޭގައި ކަޅު ކަންބަޅިއެއް ޖެހި، ވިޔުނު ފޭރާމެކެވެ. ޑަޔާނާ މި ސުވެޓަރު ތުރުކުރައްވާފައިވަނީ 1981 ވަނަ އަހަރުގެ ޖޫން މަހު، ރަސްގެފާނު ޗާރލްސް ބައިވެރިވެވަޑައިގެންނެވި ޕޯލޯ މެޗެއް ބައްލަވަން ވަޑައިގެންނެވިއިރު އެވެ. އެ ދެ ބޭފުޅުން ކައިވެނި ބައްލަވައިގަތީ އޭގެ އެއްމަސްދުވަސް ފަހުންނެވެ.

"ވޯރމް އެންޑް ވޮންޑަފުލް" ކުންފުނީގެ ކޯފައުންޑަރ ޖޮއެނާ އޮސްބޯން ބުނީ ޑަޔާނާ ތުރުކުރެއްވި އެ ސުވެޓަރު ފެނިފައިވަނީ މި އަހަރު މާރޗްމަހުގެ ތެރޭގައި އެ ކުންފުނީގެ ގުދަނަކުން ކަމަށެވެ. އަދި ވިޔުނު އެ ހެދުންކޮޅަކީ އޭގެ އަތުކުރި ހަލާކުވެގެން އެތަން ހެދުމަށް އަނބުރާ ފޮނުވާލެވުނު އެއްޗެއް ކަމަށާއި، އޭގެ ތިން މަސް ފަހުން ހަމައޭގެ މުޅިން އައު ސުވެޓަރެއް ޑަޔާނާއަށް ފޮނުވައިދިން ކަމުގައި ވެސް އޮސްބޯން ބުންޏެވެ. އަދި އެ ސުވެޓަރު ގަތުމާއި، ބަދަލުކުރުމުގައި އެ ކުންފުންޏަށް ޑަޔާނާގެ ޕްރައިވެޓް ސެކެޓްރީ ލިޔުނު 2 ސިޓީއެއް ވެސް ނީލަން ކިޔާނެކަމުގައި ވެސް އޮސްބޯން ބުންޏެވެ.

މި ވިޔުނު ސުވެޓަރަކީ ތިން އަހަރު ދުވަހުގެ ތެރޭގައި އެކި ފަހަރުމަތިން ޑަޔާނާ ތުރުކުރެއްވި ސުވެޓަރެއްކަމުން، މިއީ ޑަޔާނާ ވަރަށް ހިތްޕުޅާވި ހެދުންކޮޅެއް ކަމަށް ޤަބޫލުކުރެވެއެވެ.

އެހެންކަމުން، މި ސުވެޓަރުގެ ނީލަން ފެށުމުން، އޭގެ އަގު އިތުރަށް މައްޗަށް އުފުލިގެންދާނެ ކަމަށް ބެލެވެއެވެ.

މި އަހަރުގެ ކުރީކޮޅު ބޭއްވި ނީލަމެއްގައި ޕްރިންސަސް ޑަޔާނާ ތުރުކުރެއްވި ހަވީރީ ހެދުމެއް ވަނީ 6 ލައްކަ ޑޮލަރަށް ވިކިފައެވެ. އަދި އެއީ ނީލަން ފެށުނު އަގަށްވުރެ ފަސްގުނަ އިތުރު އަދަދެއްކަމަށް ޚަބަރުތައް ބުނެއެވެ.

ޕްރިންސަސް ޑަޔާނާ ވަނީ އެކަމަނާ ވަޑައިގެންނެވި ރަސްމީ އަދި ނުރަސްމީ އެކި ހަފްލާތަކަށް މުޅި ދުނިޔޭގެ ސަމާލުކަން ލިބުނު، ތަފާތު ފަރުމާގެ ހެދުންތައް ތުރުކުރައްވާފައެވެ. އަދި އެކަމަނާ ވެގެން ގޮސްފައިވަނީ ފެޝަން "އައިކަން" އަކަށެވެ.

"ޕީޕަލްސް ޕްރިންސަސް" ގެ ލަޤަބު ވެސް އެރުވިފައިވާ އިނގިރޭސިވިލާތުގެ ޕްރިންސަސް ޑަޔާނާ އަވަހާރަވީ 1997 ވަނަ އަހަރުގެ އޮގަސްޓް މަހުގެ 31 ވަނަ ދުވަހު، އެކަމަނާ އިންނެވި ކާރުކޮޅު އެކްސިޑެންޓުވެ، ލިބިވަޑައިގެންނެވި އަނިޔާތަކަށް ފަރުވާދެމުން ދަނިކޮށެވެ. އެކަމަނާ މި ދުނިޔެ ދޫކުރެއްވިތާ 25 އަހަރު ވެފައިވީ ނަމަވެސް، އެކަމަނާގެ ހަނދާތަކަށް ބަދަލެއް ނާދެއެވެ.