ބްރިޖުގެ ތަނބަށް ބޯޓު އުރުނު ހާދިސާ ތަހުގީގުކޮށް، ފަރަށާއި ބްރިޖަށް ލިބުނު ގެއްލުމުގެ ބަދަލު ހޯދަން މާލެ ސިޓީ ކައުންސިލުން ގޮވާލައިފި
14 ސެޕްޓެމްބަރު 2026 | ހޯމަ 04:14ކަސްޓަމްސްގެ ބެލުމުގެ ދަށުގައި އޮތް ދެ އުޅަނދެއް ބްރިޖު ތަނބުގައި ޖެހުނު ހާދިސާގައި މުއައްސަސާތަކުގެ އިހުމާލު އޮތްތޯ ބަލަން މިނިވަން ތަހުގީގެއް ހިންގުމަށް މާލެ ސިޓީ ކައުންސިލުން ގޮވާލައިފި. ބްރިޖަށާއި ފަރަށް ލިބުނު ގެއްލުމުގެ ބަދަލު ހޯދުމަށާއި ބްރިޖުގެ ރައްކާތެރިކަން ކަށަވަރު ކުރުމަށް އިންޖީނިއަރިންގ އޮޑިޓެއް ހެދުމަށް ވެސް ކައުންސިލުން ވަނީ އިލްތިމާސްކޮށްފައި
ބްރިޖުގެ ތަނބަށް އުރުނީ ކަސްޓަމްސްގެ ބެލުމުގެ ދަށުގައި އޮތް 2 ބޯޓު. ބްރިޖާ ފަރަށް ލިބުނު ގެއްލުންތައް ބަލައި، އިހުމާލުވާ ފަރާތްތައް ތަހުގީގުކުރަން ސިޓީ ކައުންސިލުން ވަނީ ގޮވާލާފައި | މާލެ ސިޓީ ކައުންސިލް
ސެޕްޓެމްބަރުމަހުގެ 10 ވަނަ ދުވަހުގެރޭ، ސިނަމާލެ ބްރިޖުގެ ތަނބަކަށް ބޯޓު އުރުނު ހާދިސާއާ ގުޅިގެން އެކަން ތަހުގީގު ކުރަން މާލެ ސިޓީ ކައުންސިލުން ގޮވާލައިފި އެވެ.
ސިޓީ ކައުންސިލުން ބުނީ ރާއްޖޭގެ ސަރަހައްދަށް ގާނޫނާ ޚިލާފަށް އެތެރެވި ބޭރުގެ ދެ އުޅަނދެއް ލަނގަރު ކެނޑިގެން ގޮސް، މާލޭގެ އިރުމަތީ ފަރާތު ފަރަށާއި ސިނަމާލެ ބްރިޖަށް އަރައި ބޮޑެތި ގެއްލުންތަކެއް ލިބުނު މައްސަލައިގައި، ދައުލަތުގެ މުއައްސަސާތަކުގެ އިހުމާލު ތަހުގީގު ކޮށް، ލިބުނު ގެއްލުމުގެ ބަދަލު ހޯދުމަށް ގޮވާލާ ކަމަށެވެ.
ކައުންސިލުން ފާހަގަކޮށްފައިވާ ގޮތުގައި، މި ހާދިސާގައި ހިމެނޭ އެމްޓީ ކޭޖީ 1 (ތެޔޮ އުފުލާ ބާޖު) އަދި އޭއެލް 1 (ޓަގުބޯޓު) އަކީ 2026 އެޕްރީލް 26 ގައި ދިވެހިރާއްޖޭގެ ކަނޑުގެ ސަރަހައްދަށް ގާނޫނާ ޚިލާފަށް ވަނުމާ ގުޅިގެން، މޯލްޑިވްސް ކަސްޓަމްސް ސަރވިސްގެ ބެލުމުގެ ދަށަށް ގެނެސްފައިވާ ދެ އުޅަނދެވެ. އަދި 2026 މެއި 3 ވަނަ ދުވަހުން ފެށިގެން މި ދެ އުޅަނދު ކަސްޓަމްސްގެ ބެލުމުގެ ދަށުގައި މާލޭގެ ބަނދަރުގައި އޮތްއިރު އެކަށީގެންވާ ސަލާމަތީ ފިޔަވަޅުތައް އަޅާފައި ނުވާކަމަށް ކައުންސިލުން ބުނެފައިވެ އެވެ.
އޭގެ ނަތީޖާއެއްގެ ގޮތުން 2026 ސެޕްޓެންބަރު 10 ވަނަ ދުވަހު މި ދެ އުޅަނދުގެ ލަނގަރު ކެނޑިގެން ގޮސް މާލޭގެ އިރުމަތީ ފަރާތު ފަރަށާއި ސިނަމާލެ ބްރިޖުގެ ތަނބަކަށް އަރައި ބޮޑެތި ގެއްލުންތަކެއް ލިބިފައިވާކަން ފާހަގަކޮށް ސިޓީ ކައުންސިލުން ބުނީ، މި ހާދިސާ ހިނގައިދިޔަ ގޮތުގެ ސައްހަ މައުލޫމާތު މިހާތަނަށް ވެސް ދައުލަތުގެ ކަމާބެހޭ އިދާރާތަކުން ރައްޔިތުންނަށް ހާމަކޮށްފައި ނުވާ ކަމަށެވެ. އަދި މީސްމީޑިއާގައި ދެކެވޭ ވާހަކަތަކަށް ބަލާއިރު މިއީ ކަމާބެހޭ މުއައްސަސާތަކުން ގާނޫނީ ޒިންމާ އަދާނުކުރުމުގެ ސަބަބުން ހިނގާފައިވާ ކަމެއް ކަމަށް ރިޕޯޓްކުރާތީ އެކަމާ އިންތިހާއަށް ކަންބޮޑުވާ ކަމަށް ވެސް ކައުންސިލުން ވަނީ ބުނެފަ އެވެ.
މާލެ ސިޓީ ކައުންސިލުން ބުނީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ ދަށުން މާލެ ސިޓީގެ އިހުތިސާސްގައިވާ ތިމާވެއްޓާއި ފަރުތަކާއި ކަނޑުގެ ވަސީލަތްތަކުގެ އިތުރުން މުނިސިޕަލް އުމްރާނީ ވަސީލަތްތައް ރައްކާތެރިކޮށް ބެލެހެއްޓުމަކީ ސިޓީ ކައުންސިލަށް މަތިކޮށްފައިވާ ގާނޫނީ ޒިންމާއެއް ކަމަށެވެ. ކަމާބެހޭ މުއައްސަސާތަކަށް 3 ކަމަކަށް އިލްތިމާސްކޮށްފައިވާ ކަން ވެސް ކައުންސިލުން ފާހަގަކޮށްފައިވެ އެވެ.
އެގޮތުން، މުއައްސަސާތަކުގެ އިހުމާލު ތަހުގީގު ކުރުމަށް އިލްތިމާސްކޮށް ކައުންސިލުން ވަނީ މި އުޅަނދުފަހަރު ރާއްޖެއަށް އެތެރެވި ގޮތާއި، ކަސްޓަމްސްގެ ބެލުމުގެ ދަށުގައި އޮއްވައި ނަގިލި ކެނޑިގެން ގޮސް މާލޭ އިރުމަތީ ފަރަށް އަރައި ބްރިޖުގައި ޖެހެން މެދުވެރިވި ސަބަބު ބަލައި، އިހުމާލުވި ފަރާތްތައް ކަށަވަރު ކުރުމަށް މިނިވަން ޕަބްލިކް އިންކުއަރީއެއް ހިންގައި ރިޕޯޓު އާންމު ކުރުމަށް ގޮވާލާފަ އެވެ.
ތިމާވެއްޓާއި ބްރިޖަށް ލިބުނު ގެއްލުމުގެ ބަދަލު ހޯދުމަށް އިލްތިމާސްކޮށް ކައުންސިލުން ބުނީ އެންވަޔަރަންމަންޓަލް ރެގިއުލޭޓަރީ އޮތޯރިޓީ މެދުވެރިކޮށް ފަރަށް ލިބުނު ގެއްލުން ވަޒަންކުރުމާއި ބްރިޖަށް ލިބުނު ގެއްލުމުގެ މާލީ ބަދަލު ހޯދުމަށް އިލްތިމާސް ކުރާ ކަމަށެވެ.
އޭގެ އިތުރުން ސިނަމާލެ ބްރިޖުގެ ސްޓްރަކްޗަރަލް އެސެސްމަންޓް ހަދަން ޖެހޭކަން ފާހަގަކޮށް ކައުންސިލުން ވަނީ ދެ އުޅަނދު ޖެހުމުގެ ސަބަބުން ބްރިޖުގެ މައި ތަނބުތަކަށާއި ޕްލެޓްފޯމަށް ލިބުނު ގެއްލުންތައް އިންޖީނިއަރިންގ އޮޑިޓަކުން ކަށަވަރުކޮށް، ބްރިޖުގެ ރައްކާތެރިކަން އާންމުންނަށް ޔަގީންކޮށް ދިނުމަށް އެދިފަ އެވެ.
އެ ކައުންސިލުން ވަނީ މިފަދަ ހާދިސާތައް ތަކުރާރުވިޔަ ނުދިނުމަށާއި މާލެ ސިޓީގެ ކަނޑުގެ ސަރަހައްދުގެ ސަލާމަތާއި ރައްކާތެރިކަން ކަށަވަރު ކުރުމަށް އަޅަންޖެހޭ އެންމެހައި ފިޔަވަޅުތައް އަވަހަށް އެޅުމަށް ދައުލަތުގެ ކަމާބެހޭ އެންމެހައި އިދާރާތަކަށް ގޮވާލާފަ އެވެ.
