ދުނިޔޭ އެންމެ ދުވަސްވީ ލީޑަރު، ކެމަރޫންގެ ރައީސް ބިޔާ 10 ހަފުތާ ފަހުން ގައުމަށް ވަޑައިގެންފި
21 އޯގަސްޓު 2026 | ހުކުރު 10:221982 ވަނަ އަހަރުން ފެށިގެން ކެމަރޫންގެ ވެރިކަން ކުރައްވަމުން ގެންދަވާ އުމުރުފުޅުން 93 އަހަރުގެ ޕޯލް ބިޔާ، 10 ހަފުތާއަށްވުރެ ގިނަ ދުވަހު ގައުމުން ބޭރުގައި އުޅުއްވުމަށްފަހު އެނބުރި ވަޑައިގަތުމުން ސަޕޯޓަރުން ވަނީ ހޫނު މަރުހަބާއެއް ކިޔާފައި. އަމިއްލަ ދަތުރުފުޅެއްގައި ޔޫރަޕަށް ވަޑައިގެން ގިނަ ދުވަސްތަކެއް ވަންދެން ފެނިވަޑައިނުގެން އުޅުއްވުމާ ގުޅިގެން، އެމަނިކުފާނުގެ ސިއްހީ ހާލުކޮޅާ މެދު އާންމުންގެ މެދުގައި ބޮޑެތި ސުވާލުތަކާއި ބަހުސްތަކެއް ވަނީ އުފެދިފައި
ދުނިޔޭގެ އެންމެ އުމުރުން ދުވަސްވީ ރައީސްގެ ގޮތުގައި ފާހަގަކުރެވޭ ކެމަރޫންގެ ރައީސް ޕޯލް ބިޔާ، ޖެނީވާގައި 10 ހަފުތާ ހޭދަކުރެއްވުމަށްފަހު އެނބުރި ގައުމަށް ވަޑައިގަންނަވަނީ | އާރުޓީވީ
ދުނިޔޭގެ ގައުމެއްގެ ވެރިކަމުގައި ހުންނެވި އެންމެ ދުވަސްވީ ލީޑަރު، ކެމަރޫންގެ ރައީސް ޕޯލް ބިޔާ، 10 ހަފުތާއަށްވުރެ ގިނަ ދުވަހު ގައުމުން ބޭރުގައި އުޅުއްވުމަށްފަހު އެނބުރި ގައުމަށް ވަޑައިގެންފި އެވެ.
އުމުރުފުޅުން 93 އަހަރުގެ ރައީސް ޕޯލް ބިޔާ، ސްވިޒަލޭންޑްގެ ޖެނީވާއިން ފުރާވަޑައިގެން ކެމަރޫންގެ ވެރިރަށް ޔައުންޑޭއަށް ވަޑައިގަތީ ޗާޓަރު ފްލައިޓެއްގަ އެވެ. 1982 ވަނަ އަހަރުން ފެށިގެން ކެމަރޫންގެ ވެރިކަން ކުރައްވަމުން ގެންދަވާ ބިޔާ، "ޔޫރަޕަށް ކުރައްވާ ކުރު އަމިއްލަ ދަތުރުފުޅެއް" ކަމަށް ވިދާޅުވެ ގައުމުން ބޭރަށް ފުރާވަޑައިގަތީ މިއަހަރުގެ ޖޫން މަހުގެ 7 ވަނަ ދުވަހު އެވެ.
ރައީސް ބިޔާ ގައުމުން ބޭރުގައި ގިނަ ދުވަސްތަކެއް ހޭދަކުރެއްވުމާ ގުޅިގެން، އެމަނިކުފާނުގެ ސިއްހީ ހާލުކޮޅާ މެދުގައާއި، ރައީސްގެ މަސްއޫލިއްޔަތުތައް އަދާކުރުމުގެ ގާބިލުކަން ހުރިތޯ ފަދަ ގިނަ ސުވާލުތަކެއް ވަނީ އުފެދިފަ އެވެ.
އާދަޔާ ހިލާފަށް ގިނަ ދުވަސްތަކެއް ވަންދެން ރައީސް ފެނިވަޑައިނުގެން އުޅުއްވުމުން، އެމަނިކުފާނުގެ ސިއްހަތާ މެދު ސުވާލު އުފެދުމުގެ އިތުރުން، ގައުމު ހިންގުމުގެ ކަންކަން ބަލަހައްޓަނީ ކޮން ފަރާތަކުންތޯ ބެލުމަށް ވެސް އާންމުންގެ މެދުގައި ބަހުސްތަކެއް ކުރެވުނެވެ.
1982 ވަނަ އަހަރުން ފެށިގެން މެދުކެނޑުމެއް ނެތި ކެމަރޫންގައި ވެރިކަން ކުރައްވަމުން ގެންދަވާ ޕޯލް ބިޔާ އެނބުރި ރިޔާސީ ގަނޑުވަރަށް ވަޑައިގަތުމުން، އެމަނިކުފާނަށް ތާއީދުކުރާ ގިނަ އަދަދެއްގެ ބަޔަކު ވަނީ މަރުހަބާ ކިޔާފަ އެވެ.
އެމަނިކުފާނު ގަނޑުވަރަށް ވަޑައިގަތީ ފުރިހަމަ އިއްޒަތުގައި މޮޓޯކޭޑްގަ އެވެ.
