ޕެސިފިކްގެ ޖަޒީރާ ގައުމެއްކަމަށްވާ ނައުރޫގެ ނަން ބަދަލުކޮށްފި
1 އޯގަސްޓު 2026 | ހޮނިހިރު 07:49ޕެސިފިކް ކަނޑުގެ ކުޑަ ގައުމެއް ކަމަށްވާ ނައުރޫގެ ނަން އެ ގައުމުގެ އަސްލު ގަދީމީ ނަން ކަމަށްވާ "ރިޕަބްލިކް އޮފް ނައޮއެރޯ" އަށް ބަދަލުކުރުމަށް ގާނޫނުއަސާސީއަށް އިސްލާހު ގެނެސްފި. އިސްތިއުމާރީ ދުވަސްވަރު ކިޔަން ފަސޭހައަކަށް މިހާރުގެ ނަން ބޭނުން ކުރަމުން ދިޔަކަން ފާހަގަކުރެވޭ އިރު އެ ނަމުގެ ބަދަލުގައި މިހާރުގެ ނަން ކިޔަން ނިންމީ ގައުމުގެ އަމިއްލަވަންތަކަން އިއާދަކުރުމަށް ކުރި މަސައްކަތެއްގެ ތެރޭން ކަމަށް ބުނެފައިވޭ
ނައުރޫގެ ގޮނޑުދޮށް ފެންނަ މަންޒަރެއް | ގެޓީ އިމޭޖަސް
ޕެސިފިކް ކަނޑުގެ ޖަޒީރާ ގައުމެއް ކަމަށްވާ ނައުރޫގެ ނަން ރަސްމީކޮށް އެ ގައުމުގެ ގަދީމީ ނަމަށް ބަދަލުކޮށް، "ރިޕަބްލިކް އޮފް ނައޮއެރޯ" ގެ ނަމަށް ބަދަލުކޮށްފި އެވެ.
ނައުރޫގެ ގާނޫނު ހަދާ މަޖިލީހުން އެ ގައުމުގެ ނަން ބަދަލުކުރުމަށްޓަކައި ގާނޫނުއަސާސީއަށް ގެންނަންޖެހޭ އިސްލާހު ފާސްކޮށްފައިވަނީ މިދިޔަ މެއި މަހުގެ ތެރޭގަ އެވެ. އަދި މި ބަދަލާ ގުޅޭގޮތުން އާންމުންގެ މެދުގައި ފެންނަ ނުފެންނަ ވޯޓެއް ނުނެގުމަށް ނިންމާފައިވާކަން އެ ގައުމުގެ ރައީސް ޑޭވިޑް އަޑިއަންގް ބުދަ ދުވަހުގެ ރޭ ސޯޝަލް މީޑިއާގައި ކުރެއްވި ޕޯސްޓެއްގައި ވަނީ ކަށަވަރުކޮށްދެއްވާފަ އެވެ. ރައީސް އަޑިއަންގް ވިދާޅުވީ، މިއީ އާންމުންގެ ރުހުން ހޯދަންޖެހޭ އާ ނަމެއް ނޫން ކަމަށާއި، މިއީ އެ ގައުމުގެ ރައްޔިތުން މިހާރުވެސް ބޭނުންކުރަމުންދާ އެމީހުންގެ އަސްލު އަމިއްލަވަންތަކަން ރަމްޒުކޮށްދޭ ނަމެއް ކަމަށެވެ.
"ފެންނަ ނުފެންނަ ވޯޓެއް ނުނެގުމަށް ނިންމީ ވަރަށް ބޮޑަށް ވިސްނުމަށްފަހު. ސަބަބަކީ 'ނައޮއެރޯ' އަކީ ރައްޔިތުން އަލަށް ބަލައިގަންނަންޖެހޭ އާ ނަމަކަށް ނުވާތީ،" ރައީސް އަޑިއަންގް ވިދާޅުވި އެވެ. "މިއީ މިހާރުވެސް ރައްޔިތުންގެ އަމިއްލަވަންތަކަމާ ގުޅިފައިވާ، ގައުމީ ނިޝާނުގައިވެސް ހިމެނޭ އަދި އާންމުންގެ މެދުގައިވެސް ބޭނުންކުރެވޭ ނަމެއް. އަދި އެންމެ މުހިންމު ކަމަކީ ގާނޫނުއަސާސީންވެސް މި ބަދަލަށް ފުރުސަތު ލިބިދޭކަން."
މި ބަދަލާއެކު އެ ގައުމުގެ ކުރު ނަމަކަށް ދެން ބޭނުންކުރާނީ "ނައޮއެރޯ" އެވެ. އަދި އެ ގައުމުގެ ރައްޔިތުންނަށް ނިސްބަތްކޮށް ކިޔާނީ "ޑެއި-ނައޮއެރޯ" އެވެ. ސަރުކާރުން މިހާރު ވަނީ ބައިނަލްއަގުވާމީ ޖަމިއްޔާތަކަށާއި އެހެނިހެން ގައުމުތަކަށް މި ބަދަލުގެ މައުލޫމާތު ރަސްމީކޮށް އަންގާފަ އެވެ. އަދި ނަން ބަދަލުކުރުމުގެ އިދާރީ މަސައްކަތްތައް މިހާރު ވަނީ ފަށާފަ އެވެ.
"ނައުރޫ" މި ނަމަކީ ވިލާތުގެ ގައުމުތަކުން އެ ސަރަހައްދު އިސްތިއުމާރު ކުރި ދުވަސްވަރު ބޭނުންކުރަން ފެށި ނަމެކެވެ. އެ ދުވަސްވަރު އެ ގައުމުގެ އަސްލު ނަން ކަމަށްވާ "ނައޮއެރޯ" ކިޔަން އިސްތިއުމާރީ ބާރުތަކަށް އުނދަގޫވުމުގެ ސަބަބުން އެ ނަން ވަނީ ބަދަލުކޮށްފަ އެވެ. ނައުރޫއަކީ ވެޓިކަން ސިޓީ އާއި މޮނާކޯއަށްފަހު ދުނިޔޭގައި އޮތް ތިންވަނައަށް އެންމެ ކުޑަ ގައުމެވެ. އެ ގައުމުގެ އާބާދީއަކީ ގާތްގަނޑަކަށް 12،000 އެވެ.
ރައީސް އަޑިއަންގް ވިދާޅުވި ގޮތުގައި ނަން ބަދަލުކުރުމަކީ ސިޔާސީ ނިންމުމެއް ނޫނެވެ. ނަމަވެސް މިއީ ގައުމުގެ ތާރީޚާއި ތަރިކައާ ގުޅިފައިވާ ކަމެއް ކަމަށާއި، މިއީ ކާބަފައިންގެ ހަނދާންތައް ދަމަހައްޓައި، އަންނަން އޮތް ޖީލުތަކުގެ މުސްތަގުބަލު ވަރުގަދަކުރުމަށް ކުރެވުނު މަސައްކަތެއް ކަމަށް އޭނާ ސިފަކުރެއްވި އެވެ.
ނައުރޫގެ ބަސް ނުވަތަ "ޑޮރެރިން ނައޮއެރޯ" އަކީ ޔުނެސްކޯއިން ކަނޑައަޅާފައިވާ ގޮތުގައި ނެތިދިއުމުގެ ބިރު ވަރަށް ބޮޑަށް އޮތް ބަހެކެވެ. އެ ގައުމުގެ އާންމުންގެ މެދުގައި މި ބަހުން ވާހަކަދައްކައި އުޅުނު ނަމަވެސް، ސްކޫލްތަކުގައި މިހާތަނަށް އެ ބަސް ކިޔަވައެއް ނުދެ އެވެ. ނަމަވެސް، ކުރިމަގުގައި ސްކޫލްތަކުގެ މަންހަޖުގައި އެ ބަސް ހިމެނުމަށްޓަކައި އެ ގައުމުގެ ސަރުކާރުން މިދިޔަ އަހަރު ވަނީ ބިލެއް ފާސްކޮށްފަ އެވެ.
