ޔޫއެންއެފްޕީއޭ: އޭޝިއާގެ މުސްތަގުބަލު ބިނާވެފައިވަނީ އުފަންވާ ނިސްބަތަކަށް ނުވަތަ އާބާދީގެ އަދަދުތަކަކަށް ނޫން، އެކަން ބިނާވަނީ ޒުވާނުންނަށް އޮތް ފުރުސަތުތަކެއްގެ މައްޗަށް

އޭޝިއާ އާއި ޕެސިފިކް ސަރަހައްދުގެ މުސްތަގުބަލު ބިނާވެފައިވަނީ އުފަންވާ ނިސްބަތަކަށް ނުވަތަ އާބާދީގެ އަދަދުތަކަކަށް ނޫން ކަމަށާއި، އެއީ ޒުވާނުންނަށް އުންމީދު ކުރާނެ ފުރުސަތުތަކެއް އޮތް މިންވަރެއްގެ މައްޗަށް ކަމަށް އދ. ގެ އާބާދީއާ ބެހޭ ފަންޑު (ޔޫއެންއެފްޕީއޭ) އިން ބުނެފި އެވެ.

ދުނިޔޭގެ އާބާދީ ދުވަހުގެ މުނާސަބަތުގައި ދެއްވި މެސެޖެއްގައި، ޔޫއެންއެފްޕީއޭ އިން އޭޝިއާ އާއި ޕެސިފިކް ސަރަހައްދަށް ކަނޑައަޅުއްވާފައި ހުންނެވި ވަގުތީ ރީޖަނަލް ޑައިރެކްޓަރު ޑރ. އެލެގްޒެންޑަރ (ސާޝާ) ބޮޑިރޯޒާ ވިދާޅުވީ، އާބާދީއަށް އަންނަ ބަދަލުތަކާ ގުޅޭގޮތުން އާންމުންގެ މެދުގައި ކުރެވޭ މަޝްވަރާތަކުގައި ތަފާސްހިސާބުތަކަށްވުރެ ބޮޑަށް، ޒުވާނުންނަށް ލިބެން ހުރި ފުރުސަތުތަކަށް އިސްކަންދޭން ޖެހޭ ކަމަށެވެ.

މި ސަރަހައްދުގެ ގިނަ ގައުމުތަކެއްގައި އުފަންވާ ނިސްބަތް ދަށްވެ، އާބާދީ މުސްކުޅިވަމުންދާ މައްސަލައާ ކުރިމަތިލާން ޖެހިފައިވީ ނަމަވެސް، ގިނަ ޒުވާނުން އަދިވެސް ކައިވެނިކޮށް ދަރިން ހޯދުމަށް ބޭނުންވާކަން އޭނާ ފާހަގަކުރެއްވި އެވެ. އެހެންނަމަވެސް، ދިރިއުޅުމުގެ ޚަރަދުތައް ބޮޑުވުމާއި، ބޯހިޔާވަހިކަމުގެ ޔަގީންކަން ނެތުމާއި، ވަޒީފާގެ ރައްކާތެރިކަން ކުޑަވުމުގެ އިތުރުން، ފަރަގުތައް ބޮޑުވަމުން ދިއުމުގެ ސަބަބުން ޒުވާނުން ބޭނުންވާ ފަދަ މުސްތަގުބަލެއް ބިނާކުރުމަށް ބޮޑެތި ހުރަސްތަކެއް ކުރިމަތިވަމުންދާ ކަމަށް އޭނާ ވިދާޅުވި އެވެ.

ޔޫއެންއެފްޕީއޭގެ "ޑެމޮގްރަފިކް ފިއުޗާސް ސާވޭ" އިން ފާހަގަވެފައިވާ ކަންކަމަށް އަލިއަޅުއްވާލައްވަމުން ރީޖަނަލް ޑައިރެކްޓަރު ވިދާޅުވީ، އާއިލާއެއް ބިނާކުރުމާ މެދު ގޮތް ނިންމުމުގައި މާލީ ތަނަވަސްކަމާއި، ދާއިމީ ވަޒީފާ އަދި އެކަމަށް ތައްޔާރުވެފައިވާ ކަމުގެ އިހުސާސްވުމަކީ އެންމެ މުހިންމު ކަންތައްތައް ކަމަށެވެ.

ގިނަ ޒުވާނުންނަކީ ހަމައެކަނި ވަޒީފާ ނުވަތަ އާއިލީ ދިރިއުޅުން، މީގެ ތެރެއިން ކޮންމެވެސް އެއް ކަމެއް އިޚްތިޔާރު ކުރަން ބޭނުންވާ ބައެއް ނޫން ކަމަށާއި، ނަމަވެސް އެމީހުންނަށް ދިމާވެފައިވާ ގޮންޖެހުމަކީ މި ދެ ކަންތައް އެކުގައި ކުރިއަށް ގެންދެވޭނެ ފަދަ މާހައުލެއް ނެތުން ކަމަށް އޭނާ ފާހަގަކުރެއްވި އެވެ. ޚާއްސަކޮށް އަންހެނުންނަށް، ގޭތެރޭގެ ޒިންމާތައް އުފުލުމުގައި ހަމަހަމަކަން ނެތުމާއި، އެކަށީގެންވާ ވަޒީފާގެ ފުރުސަތުތައް މަދުވުމުގެ އިތުރުން، އިގްތިސާދީ ނުތަނަވަސްކަމާއި ތަފާތުކުރުންތަކުގެ ބިރުވެރިކަން ބޮޑުކަން އޭނާ ފާހަގަކުރެއްވި އެވެ.

ޑރ. ބޮޑިރޯޒާ ބާރުއަޅުއްވައި ވިދާޅުވީ، އާބާދީއަށް އަންނަ ބަދަލުތަކާ ގުޅޭ ގޮންޖެހުންތަކަށް ހައްލު ހޯދޭނީ މީހުންގެ އަމިއްލަ ނިންމުންތަކަށް ނުފޫޒު ފޯރުވައިގެން ނޫން ކަމަށެވެ. އޭގެ ބަދަލުގައި، ސަރުކާރުތަކުން ފެންވަރު ރަނގަޅު ތައުލީމާއި، އެކަށީގެންވާ ވަޒީފާގެ ފުރުސަތުތަކާއި، އަގުހެޔޮ ބޯހިޔާވަހިކަމާއި، ސިއްހީ ޚިދުމަތާއި، އިޖުތިމާއީ ރައްކާތެރިކަމުގެ އިތުރުން، މިންތީގެ ހަމަހަމަކަން ގާއިމުކުރުމަށް އިންވެސްޓްކޮށް، ޒުވާނުންނަށް ފުރުސަތުތައް ފަހިކޮށްދޭން ޖެހޭ ކަމަށް އޭނާ ވިދާޅުވި އެވެ.

މީގެ އިތުރުން، މޫސުމަށް އަންނަ ބަދަލުތަކަކީ ވެސް މުސްތަގުބަލާ މެދު އޮތް ބޮޑު ކަންބޮޑުވުމެއްކަން ފާހަގަކުރައްވަމުން، މޫސުމީ ކާރިސާތައް އިތުރުވުމާއި ތިމާވެށި ހަލާކުވަމުން ދިއުމުގެ ސަބަބުން، މުޅި ސަރަހައްދުގެ ޒުވާން ޖީލުތަކުގެ މުސްތަގުބަލަށް އޮތް އުންމީދުތަކަށް އަސަރުކުރަމުންދާ ކަމަށް އޭނާ ވިދާޅުވިއެވެ.

"އާބާދީގެ މުސްތަގުބަލަކީ ކުރިން ކަނޑައެޅިފައިވާ އެއްޗެއް ނޫން. އެއީ މިއަދު މުޖުތަމައުތަކުން ނިންމާ ނިންމުންތަކުގެ މައްޗަށް ބިނާވެގެން ބައްޓަންވާނެ އެއްޗެއް،" ޑރ. ބޮޑިރޯޒާ ވިދާޅުވި އެވެ. އޭނާ އިތުރަށް ވިދާޅުވީ، ހަރުދަނާ އިގްތިސާދަކާއި ކުރިއަރާފައިވާ މުޖުތަމައެއް ބިނާކުރެވޭނީ ޒުވާނުންނަށް ހަގީގީ ފުރުސަތުތަކާއި އުންމީދު ކުރާނެ ސަބަބުތަކެއް ހޯދައިދީގެން ކަމަށެވެ.