ވީއޭއެމް އެސޯސިއޭޝަން ކަޕް: ސިފައިން ތިންވަނަ ހޯދައިފި

ވޮލީބޯލް އެސޯސިއޭޝަން ކަޕުގެ ތިންވަނަ ދިވެހި ސިފައިންގެ ކްލަބުން ހޯދައިފިއެވެ.

މި މުބާރާތުގެ ތިންވަނަ ހޮވި މެޗުން މި ދެ ޓީމަށް ޖާގަ ލިބިފައިވަނީ ދެ ވަނަ ބުރުގައި މި ދެ ޓީމަށް ތިންވަނަ އަދި ހަތަރުވަނަ ލިބުމާ ވިދިގެންނެވެ. މީގެ ކުރިން މި ދެ ޓީމު ދެވަނަ ބުރުގައި ބައްދަލުކުރި މެޗު ސީދާ ތިން ސެޓުން ކާމިޔާބު ކުރީ ދިވެހި ސިފައިންގެ ކްލަބްއެވެ.

ސޯޝަލް ސެންޓަރުގެ އިންޑޯ ކޯޓުގައި ކުޅުނު ތިންވަނަ ހޮވި މެޗު ޕޮލިސް ކްލަބާއި ވާދަކޮށް ސީދާ ތިން ސެޓުން ކާމިޔާބު ކުރީ ދިވެހި ސިފައިންގެ ކްލަބްއެވެ. މި މެޗުގެ ސެޓުތައް ސިފައިންގެ ކްލަބްއިން ގެންގޮސްފައި ވަނީ 25-19، 25-12 އަދި 25-17 އިންނެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ ސިފައިންގެ ކްލަބްގެ ސްރީލަންކާއަށް ނިސްބަތްވާ ކުޅުންތެރިޔާ ކަމަށްވާ ޖަނިތަ ސުރަތައެވެ.

ވީއޭއެމް އެސޯސިއޭޝަން ކަޕުގެ ފައިނަލްގައި މިފަހަރު ވާދަކުރާނީ މޯލްޑިވިއަން ސްޕޯޓްސް އެންޑް ރެކްރިއޭޝަން ކްލަބާއި ވ. އަތޮޅަށް ނިސްބަތްވާ ސީލައިފް ސްޕޯޓްސް ކްލަބްއެވެ. ސީލައިފްއިން މި މުބާރާތާ ކުރިމަތިލާފައިވަނީ ގައުމީ ޓީމުގެ ގިނަ ކުޅުންތެރިންނާ އެކުގައި ކަމަށްވާއިރު އެ ޓީމު އަދި ކުޅުނު އެއްވެސް މެޗަކުން ބަލިވެފައެއް ނުވެއެވެ.

މި މުބާރާތުގައި ޖުމްލަ އަށްޓީމަކުން ބައިވެރިވެފައިވެއެވެ. އެގޮތުން މުބާރާތުގެ ޕޫލް އޭގައި ހިމެނިފައިވަނީ މޯލްޑިވިއަން ސްޕޯޓްސް އެންޑް ރެކްރިއޭޝަން ކްލަބާއި ޕޮލިސް ކްލަބާއި އެސްޕިރޭޝަން އެންޑް އިންސްޕިރޭޝަން ސްޕޯޓްސް ކްލަބްގެ އިތުރުން މަލްސަން ސްޕޯޓްސް ކްލަބެވެ. ޕޫލް ބީގައި ހިމެނިފައި ވަނީ ދިވެހި ސިފައިންގެ ކްލަބާއި ސީ ލައިފް ސްޕޯޓްސް ކްލަބާއި ގުޑީސް ސްޕޯޓްސް ކްލަބްގެ އިތުރުން ވަން އެންޑް އޮންލީ ރީތި ރަށެވެ.