ޔުއެފާ ޗެމްޕިއަންސް ލީގުގައި ކްރިސްޓިއާނޯ ރޮނާލްޑޯގެ ދެ ލަނޑުން ބްރޯޝިއާ ޑޯޓްމަންޑްގެ މައްޗަށް ރެއާލް މެޑްރިޑް ކުރިހޯދައިފިއެވެ.

އަންގާރަ ދުވަހުގެ ރޭ ކުޅުނު މެޗު ޑޯޓްމަންޑާ ވާދަކޮށް ރެއާލް އިން ކާމިޔާބުކުރީ 1-3 ގެ ނަތީޖާއަކުންނެވެ.

ޑޯޓްމަންޑް ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށްގެން ރަނގަޅަށް ކުޅެމުންދިޔައީ ރެއާލްއެވެ. އެގޮތުން އެޓީމުންދިޔައީ ޑޯޓްމަންޑްގެ ހާފަށް ބާރުބޮޑުކޮށް ގިނަ ހަމަލާތަކެއް އުފައްދަމުންނެވެ.

މެޗުގައި ފުރަތަމަ ލަނޑު ޖަހާ ލީޑު ނެގީވެސް ރެއާލް އިންނެވެ. މި ލަނޑު 18 ވަނަ މިނެޓުގައި ޑެނިއަލް ކަވަހާލްގެ އެހީތެރިކަމާއެކު ކާމިޔާބުކުރީ ގެރެތް ބޭލްއެވެ. މި ލަނޑަށްފަހުވެސް ރަނގަޅަށް ކުޅެމުންދިޔައީ ރެއާލްއެވެ.

ފުރަތަމަ ހާފް ނިމުނީ 0-1 ގެ ނަތީޖާއިން ޑޯޓްމަންޑްގެ މައްޗަށް ރެއާލް ކުރީގައި އޮވެގެންނެވެ.

ދެވަނަ ހާފް ފެށިގެން މާގިނައިރުތަކެއް ނުވަނީސް ރެއާލް އިން ވަނީ ލީޑު ފުޅާކޮށްފައެވެ. މި ލަނޑު 49 ވަނަ މިނެޓުގައި ގެރެތް ބޭލްގެ އެހީތެރިކަމާއެކު ކާމިޔާބުކޮށްދިނީ ކްރިސްޓިއާނޯ ރޮނާލްޑޯ އެވެ.

ރޮނާލްޑޯގެ މި ގޯލަށްފަހު ޑޯޓްމަންޑުން ދިޔައީ ޑިފެންސަށް އިސްކަމެއް ދީގެން ގިނަވަގުތު ބޯޅަ ހިފަހައްޓައިގެން ކުޅެމުންނެވެ. އެގޮތުން 54 ވަނަ މިނެޓުގައި އެޓީމުން ވަނީ ނަތީޖާގެ ފަރަގު ކުޑަކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ކާސްޓްރޯގެ އެހީތެރިކަމާއެކު އައުބަޔަންގް އެވެ.

މި ލަނޑަށްފަހުވެސް ދެޓީމަށްވެސް ވަނީ ލަނޑު ޖެހުމަށް ގިނަ ފުރުސަތުތަކެއް ލިބިފައެވެ. ރެއާލް އިން މެޗުގެ ތިންވަނަ ލަނޑު ޖެހީ 79 ވަނަ މިނެޓުގައެވެ. ލޫކަ މޮޑްރިޗްގެ އެހީތެރިކަމާއެކު މި ލަނޑުވެސް ކާމިޔާބުކޮށްދިނީ ރޮނާލްޑޯއެވެ.

މި ނަތީޖާއާއެކު ރެއާލް އޮތީ ކުޅުނު ދެ މެޗުންވެސް މޮޅުވެ، ހަ ޕޮއިންޓާއެކު ގްރޫޕް އެޗްގެ އެއްވަނައިގައެވެ. މެޗުން ބަލިވި ޑޯޓްމަންޑް ވަނީ މިހާތަނަށް ކުޅުނު ދެ މެޗުންވެސް ބަލިވެފައެވެ.