އައިސީޔޫ ހިމެނޭ ގޮތަށް އެންމެ ޒަމާނީ ވަސީލަތްތަކާ އެކު ވެލަޔަށް ހާއްސަ ހޮސްޕިޓަލެއް ރާއްޖޭގައި ހުޅުވައިފި

އިންޑިއާ ކަނޑުގެ ސަރަހައްދުގައި ވެލަޔަށް ޚާއްޞަކޮށްގެން ހުޅުވި ފުރަތަމަ ހޮސްޕިޓަލް، ޅ. އަތޮޅުގައި އޮންނަ ޖާވާކަރަ އައިލެންޑްސް މޯލްޑިވްސް ރިސޯޓުގައި ހުޅުވައިފިއެވެ. އޮލިވް ރިޑްލީ ޕްރޮޖެކްޓާ ގުޅިގެން ހުޅުވި މި ހޮސްޕިޓަލުން މިހާރު ވެސް އަންނަނީ ބަލި ވެލަޔަށް ފަރުވާ ދެމުންނެވެ. "ސީ ޓާޓަލް ހެލްތު އިންސްޓިޓިއުޓް" ގެ ނަމުން ނަންދީފައިވާ މި މަރުކަޒަކީ ވެލާ ހިމާޔަތްކުރުމުގެ މަސައްކަތުގައި ލިބުނު ބޮޑު ކުރިއެރުމެއް ކަމަށްވާއިރު، މިތަނުގައި ޚާއްޞަ އިންޓެންސިވް ކެއާ ޔުނިޓެއް (އައިސީޔޫ) ވެސް ގާއިމުކޮށްފައިވެއެވެ.

ދިވެހިރާއްޖޭގައި ވެލަޔަށް ދިމާވާ ސިއްހީ ކުއްލި ނުރައްކަލުގެ ހާލަތްތަކުގެ 90 އިންސައްތައަކީ އޮޔާދާ ދާގަނޑުތަކުގައި އޮޅުމާއި، "ބޯޔަންސީ ސިންޑްރޯމް" ނުވަތަ ފެންމަތީގައި އޮންނަން މަޖުބޫރުވާ ބަލީގެ ސަބަބުން ދިމާވާ ހާދިސާތަކެވެ. މި ބަލީގެ ސަބަބުން ވެލަޔަށް ފެނުގެ އަޑީގައި ވަކި މިންވަރެއްގައި ހިފަހައްޓައިގެން ތިބުމަށް އުނދަގޫވެ، މާބޮޑަށް ފެންމައްޗަށް އެރުން ނުވަތަ މާބޮޑަށް އަޑިއަށް ދިއުން ފަދަ މައްސަލަތައް ކުރިމަތިވެއެވެ.

މިފަދަ އުނދަގޫ ބަލިތަކަށް ފަރުވާ ދިނުމަށް ބޭނުންވާ އެންމެ ޒަމާނީ ސިއްހީ ވަސީލަތްތަކާއެކު މި އިންސްޓިޓިއުޓް ވަނީ ފަރުމާކޮށްފައެވެ.

ދުނިޔޭގައި ވެސް މިފަދަ ފަރުވާތައް ދެވޭ ދެވަނަ މަރުކަޒުގެ ގޮތުގައި ބެލެވޭ މި ހޮސްޕިޓަލުން، ސްޓެމް ސެލް އަދި ޕްލޭޓްލެޓް-ރިޗް ޕްލާޒްމާ ފަދަ ރީޖެނެރޭޓިވް މެޑިކަލް ތެރަޕީތައް ފޯރުކޮށްދެއެވެ. މީގެ އިތުރުން، ޑިޖިޓަލް އެކްސް-ރޭ، އަލްޓްރާސައުންޑް، އެންޑޯސްކޯޕީ އަދި ލޭޒާ ތެރަޕީ ފަދަ ޒަމާނީ ވަސީލަތްތައް ބޭނުންކޮށްގެން ސީދާ ބައްޔަށް އަމާޒުކޮށްގެން ދެވޭ ފަރުވާތައް މިތަނުން ލިބެން ހުރެއެވެ.

މި މަރުކަޒުގައި އޮޕަރޭޝަން ކުރާ ކޮޓަރިތަކާއި، ރޭޑިއޯގްރަފީ ސޫޓްތަކުގެ އިތުރުން ބަލި ދެނެގަންނަ ލެބޯޓްރީއެއް ވެސް ހިމެނެއެވެ. ވެލާ ފަރުވާ އަށް ބޭއްވުމަށް ހާއްސަކޮށްފައިވާ ހަތް ޓޭންކު މިހާރު ހުރިއިރު، މިއަދަދު 12 އަށް އިތުރުކުރެވޭނެއެވެ. އަދި 24 ގަޑިއިރު މޮނިޓަރު ކުރެވޭނެ ކެމެރާ ސިސްޓަމްތައް މި ޓޭންކުތަކުގައި ހަރުކޮށްފައިވެއެވެ.

މި އިންސްޓިޓިއުޓަކީ ހަމައެކަނި ހޮސްޕިޓަލެއް ނޫނެވެ. މިއީ "ސީ ޓާޓަލް ޔުނިވަރސިޓީ" އެއްގެ ގޮތުގައި ވެސް މަސައްކަތް ކުރާނެ ތަނެކެވެ. އެގޮތުން ދިވެހިރާއްޖޭގެ ގައުމީ ޔުނިވަރސިޓީއާ ގުޅިގެން، ދިވެހި އަދި ބޭރުގެ ދަރިވަރުންނަށް އަމާޒުކޮށްގެން ދުނިޔެ ގަބޫލުކުރާ ފެންވަރުގެ "ޓާޓަލް ވެޓެރިނަރީ އެސިސްޓަންޓް ޑިޕްލޮމާ" ޕްރޮގްރާމެއް މިތަނުގައި ކުރިއަށް ގެންދާނެއެވެ.

ޖާވާކަރަ ރިސޯޓަށް ޒިޔާރަތްކުރާ މެހެމާނުންނަށް މި އިންސްޓިޓިއުޓްގެ މަސައްކަތްތައް ގާތުން ބަލާލުމުގެ ފުރުސަތު ލިބޭނެއެވެ. 

މި ރިސޯޓުގައި މިހާރު ވެސް ފަސް ލެބޯޓްރީ ހިމެނޭ މެރިން ސައިންސް ސެންޓަރެއް ހުރެއެވެ. އެ ސެންޓަރުން މައިގަނޑު ގޮތެއްގައި ކުރަނީ މުރަކަ އާލާކުރުމުގެ އާ އުސޫލުތައް ބޭނުންކޮށްގެން، ފަރުތައް އިއާދަކުރުމަށްޓަކައި މިލިއަނުން މުރަކަ ލާވާ އުފެއްދުމުގެ މަސައްކަތެވެ.