ކުޅިވަރު އެސޯސިއޭޝަންތައް ހިންގުމަށް ޤުރުބާން ކުރަނީ ޓީޗަރުން: ޓޭމް

ރާއްޖޭގެ ކުޅިވަރު އެސޯސިއޭޝަންތައް ހިންގުމަށް ޤުރުބާން ކުރަނީ ޓީޗަރުން ކަމަށް ބުނެ، ޓީޗާރސް އެސޯސިއޭޝަން އޮފް މޯލްޑިވްސް (ޓޭމް) އިން ކަންބޮޑުވުން ފާޅު ކޮށްފި އެވެ.

ޓޭމް އިން ސޯޝަލް މީޑިއާގައި އާންމު ކޮށްފައިވާ ޕޯސްޓެއްގައި ބުނެފައި ވަނީ، ހަގީގަތަކީ ކުޅިވަރު އެސޯސިއޭޝަންތައް ހިންގުމަށް ޤުރުބާން ކުރަނީ ޓީޗަރުން ކަމަށެވެ. އަދި އެއީ ރުހުނަސް، ނުރުހުނަސް ޤަބޫލު ކުރަން ޖެހޭ ކަމެއް ކަމަށް ބުނެފައިވެ އެވެ.

އެކަން ފާހަގަކޮށް ޓޭމް އިން ވަނީ ހަތް ނުކުތާއެއް ވެސް ހިމަނައިފަ އެވެ. އެގޮތުން ޓޭމް އިން ބުނެފައި ވަނީ، އެސޯސިއޭޝަން ތަކުން ރާވައި ހިންގާ މުބާރާތްތައް ކުރިއަށްދާއިރު، ދަރިވަރުން ގޮވައިގެން އެ ތަނުގައި ތިބެނީ މުދައްރިސުން ކަމަށެވެ. އަދި މުބާރާތްތައް ކުރިއަށް ގެންދާ ދަނޑު ތަކަށް ވެސް ދާން ޖެހެނީ ޓީޗަރުން ކަމަށް ވަނީ ފާހަގަ ކޮށްފަ އެވެ. 

މީގެ އިތުރުން ޓޭމް އިން ބުނެފައި ވަނީ، މުބާރާތަށް ދަރިވަރުން ތައްޔާރުވުމަށް ފަރިތަކުރުން ކުރިއަށް ގެންދާއިރު، ޑިއުޓީ އަދާ ކުރަން ޖެހެނީ ވެސް ޓީޗަރުން ކަމަށެވެ. އެގޮތުން މުބާރާތަށް ފަރިތަ ކުރުމާއި، މުބާރާތަށް ތައްޔާރުވުމަށް އެތައް މަސް ދުވަހެއް ހޭދަވާ ކަމަށް ޓޭމްގެ ޕޯސްޓުގައި ވަނީ ފާހަގަ ކޮށްފަ އެވެ. އެހެންކަމުން، މުބާރާތަށް ތައްޔާރުވުމަށް މި ހުރިހާ ކަމެއް ކުރަން ޖެހޭނީ ޓީޗަރުން ކަމަށް ބުނެފައިވެ އެވެ.

ޓޭމްގެ ޕޯސްޓުގައި ބުނެފައި ވަނީ އެސޯސިއޭޝަން ތަކުން ބާއްވާ ކުޅިވަރު މުބާރާތް ތަކަށް ތައްޔާރުވުމާއި، އެކަންކަމަށް ޓީޗަރުން ލައްވަ ވަގުތު ހޭދަކުރުމަށް ވުރެ، ދަރިވަރުންނަށް އުނގަންނައި ދިނުމުގެ ކަންކަން ޓީޗަރުން ލައްވާ ކުރުވަން ވަގުތު ދެވިއްޖެ ނަމަ، އެކަމުން ދަރިވަރުންނާއި ޤައުމަށް ލިބޭ ފައިދާ ބޮޑު ވާނެ ކަމަށެވެ. އެހެންކަމުން ޓޭމް އިން ބުނެފައި ވަނީ، އިންޓަރ ސްކޫލްގެ މުބާރާތްތައް ސްކޫލުގެ ހަތަރު ފާރުން ބޭރަށް މިހާރުން މިހާރަށް ނެރުމަށް ގޮވާލާ ކަމަށެވެ. 

ޓޭމް އިން މިފަދައިން ޕޯސްޓެއް ކޮށްފައިވާއިރު، ސޯޝަލް މީޑިއާގައި ގިނަ ބަޔަކު އަންނަނީ އެކަމުގެ ކަންބޮޑުވުން ފާޅު ވެސް ކުރަމުންނެވެ.