ބެޓިސް އަތުން ރެއާލް ބަލިވެއްޖެ

ސްޕެނިޝް ލަލީގާގައި ރެއާލް ބެޓިސްއާ ދެކޮޅަށް ކުޅުނު މެޗުން ރެއާލް މެޑްރިޑް ބަލިވެއްޖެއެވެ.

އަމިއްލަ ދަނޑުގައި ކުޅުނު މި މެޗުން ރެއާލް ބަލިވެފައި ވަނީ 1-0 ގެ ނަތީޖާއަކުންނެވެ.

ދެ ޓީމުގެ ފަރާތުން ވެސް ވާދަވެރި ކުޅުމެއް ފެނިގެންދިޔަ މި މެޗުގައި ލަނޑު ޖެހުމަށް ދެ ޓީމުން ވެސް ވަނީ ރަނގަޅު ފުރުސަތުތަކެއް ހޯދާފައެވެ. އެގޮތުން މެޗުގެ ތިންވަނަ މިނެޓުގައި ބެޓިސްގެ ސަނާބްރިއާ ފޮނުވާލި ހަމަލާ ރެއާލްގެ ގޯލު ރޮނގު މަތިން ދިފާއު ކުރީ މެޑްރިޑްގެ ޑިފެންޑާ ޑެނީ ކަވަހާލްއެވެ.

މި ހާފުގައި ރެއާލް އިން ލަނޑު ޖެހުމަށް އެންމެ ރަނގަޅު ފުރުސަތު ލިބިފައިވަނީ މެޗުގެ 42 ވަނަ މިނެޓުގައި އެ ޓީމުގެ މިޑްފީލްޑާ އިސްކޯއަށެވެ. އޭރިއާ ތެރެއިން ފޮނުވާލި ބާރު ހަމަލާ ބެޓިސްގެ ކީޕަރު އާދަން ވަނީ ދިފާއު ކޮށްފައެވެ.

ފުރަތަމަ ހާފު ނިމިފައި ވަނީ ދެ ޓީމުން ކުރެ އެއްވެސް ޓީމަކަށް ލަނޑެއް ނުޖެހި އެއްވަރުވެ އޮވެގެންނެވެ.

ދެވަނަ ހާފުގައި ރެއާލްއިން ވަނީ މުޅި މެޗު ކޮންޓްރޯލްކޮށް ބެޓިސްގެ ހާފުގައި ގިނަ ވަގުތު ބޯޅަ ގެންގުޅެ އެ ޓީމުގެ ގޯލާއި އަމާޒުކޮށް ގިނަ ހަމަލާތަކެއް ފޮނުވާލާފައެވެ. އެހެނަސް އެ ޓީމަށް މި ހަމަލާތަކުގެ ބޭނުން ހިފިފައެއް ނުވެއެވެ. އެގޮތުން މެޗުގެ 75 ވަނަ މިނެޓުގައި ގެރެތް ބޭލް ފޮނުވާލި ހަމަލާ އަމާޒުވެފައި ވަނީ ރެއާލްގެ ގޯލުގެ ދަނޑިއާއެވެ.

ރެއާލްއިން ތަނަވަސް ކުރި ފުރުސަތުތަކުގެ ބޭނުން އެ ޓީމަށް ނުހިފުމުގެ ނަތީޖާއަކަށް ވެގެންދިޔައީ މެޗުގެ ފުރިހަމަ ވަގުތު ހަމަވެގެން ރެފްރީ ކުޅެން ދެއްކި އިތުރު ވަގުތުގެ ތެރޭގައި ބެޓިސް އިން ލަނޑެއް ޖަހައި މެޗުގެ ލީޑު ނެގުމެވެ. މި ލަނޑު އެ ޓީމަށް ކާމިޔާބު ކޮށްދިނީ ސަނާބްރިއާއެވެ.

މި މެޗުން ރެއާލް ބަލިވުމާއެކު އެ ޓީމުން ވަނީ އަމިއްލަ ދަނޑުގައި މިހާތަނަށް ކުޅުނު ތިން މެޗުގައި ހަތް ޕޮއިންޓް ގެއްލުވާލާފައެވެ.

ތާވަލުގެ ދެވަނައިގައި އޮތް ސެވިއްޔާއިން ވަނީ އަމިއްލަ ދަނޑުގައި ލަސް ޕަލްމާސް ބަލިކޮށްފައެވެ. ސެވިއްޔާއިން މި މެޗު ކާމިޔާބުކުރީ 1-0 ގެ ނަތީޖާއަކުންނެވެ. ސެވިއްޔާއަށް މެޗުގެ ހަމައެކަނި ލަނޑު ކާމިޔާބުކޮށްދިނީ މި ސީޒަނަށް އެ ޓީމާއި އަލަށް ގުޅުނު ސްޕެއިންގެ މިޑްފީލްޑާ ޖީސަސް ނަވާސްއެވެ. ޑިޕޯޓީވޯއިން ވެސް ވަނީ އަމިއްލަ ދަނޑުގައި އަލަވޭސް ބަލިކޮށްފައެވެ. އެގޮތުން ލުއިސީނިއޯ ކާމިޔާބުކޮށްދިން ހަމައެކަނި ލަނޑުން މޮޅުވެ ޑިޕޯޓިވޯވަނީ ރެލިގޭޝަން ޒޯނުން ސަލާމަތްވެފައެވެ.

އެޓްލެޓިކޯ މެޑްރިޑާއި އެތްލެޓިކް ބިލްބާއޯ ވާދަކުރި މެޗު 2-1 ގެ ނަތީޖާއަކުން ކާމިޔާބުކުރީ އެޓްލެޓިކޯއެވެ. ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔަ މި މެޗުގެ ފުރަތަމަ ހާފުގައި ބިލްބާއޯއަށް ލިބުނު ޕެނަލްޓީ އެ ޓީމުންވަނީ ބޭކާރުކޮށްލާފައެވެ. މެޗުގެ 55 ވަނަ މިނުޓުގައި އެޓްލެޓިކޯއަށް ލީޑު ނަގައިދިނީ އެންހެލް ކޮރޭއާއެވެ. އަދި 73 ވަނަ މިނުޓުގައި އެ ޓީމުގެ ލީޑު އިތުރަށް ފުޅާކޮށްދިނީ ޔަނިކް ފެރެއިރާ ކަރާސްކޯއެވެ. ބިލްބާއޯއަށް ނަތީޖާގެ ފަރަގު ކުޑަވެގެންދިޔައީ ފުރިހަމަ ވަގުތު ހަމަވެގެން ރެފްރީ ދެއްކި އިތުރު ވަގުތުގެ ތެރޭގައި ރައުލް ގާސިއާ ކާމިޔާބުކޮށްދިން ލަނޑުންނެވެ.

ސްޕެނިޝް ލަލީގާގެ ޕޮއިންޓް ތާވަލުގެ އެއްވަނައިގައި ކުޅުނު ހުރިހާ މެޗެއް ކާމިޔާބުކޮށް، 15 ޕޮއިންޓް ހޯދައިގެން އޮތީ ބާސެލޯނާއެވެ. ދެވަނައިގައި 13 ޕޮއިންޓާއެކު ސެވިއްޔާ އޮތްއިރު ތިންވަނަ އެޓްލެޓިކޯއަށް ލިބެނީ 11 ޕޮއިންޓާއެކުއެވެ. 9 ޕޮއިންޓާއެކު ތިން ޓީމެއް އޮތް އިރު 8 ޕޮއިންޓާއެކު ތާވަލުގެ ހަތް ވަނަ ލިބެނީ މިދިޔަ އަހަރުގެ ޗެމްޕިއަން ރެއާލް މެޑްރިޑަށެވެ.