ރުވާންޑާގައި 70،000 ހާފިޒުންގެ ދަސްވެނިވުމުގެ ރަސްމިއްޔާތު ބާއްވައިފި

މުސްލިމް ވޯލްޑް ލީގުގެ ސެކްރެޓަރީ ޖެނެރަލް އަދި އޯގަނައިޒޭޝަން އޮފް މުސްލިމް ސްކޮލާސްގެ ޗެއާމަން ފަޟީލަތުއްޝައިޚް ޑޮކްޓަރު މުޙައްމަދު އަލް-ޢީސާ، ރުވާންޑާގެ ވެރިރަށް ކިގާލީގައި ބޭއްވި ކީރިތި ޤުރުއާން ހިތުދަސްކުރި 70،000 ދަރިވަރުންގެ ދަސްވެނިވުމުގެ ރަސްމިއްޔާތުގައި ބައިވެރިވެވަޑައިގެންފިއެވެ. މި ރަސްމިއްޔާތަކީ ޤުރުއާން ހިތުދަސްކުރި އަންހެން އަދި ފިރިހެން ދަރިވަރުންގެ ޝަރަފުގައި ބޭއްވި ބޮޑު ރަސްމިއްޔާތެކެވެ.

ސަރުކާރުގެ ވަޒީރުންނާއި، އިސް އޮފިޝަލުންނާއި، ދީނީ ޢިލްމުވެރިންގެ އިތުރުން ގިނަ އަދަދެއްގެ ދަރިވަރުންނާއި ބެލެނިވެރިން ބައިވެރިވި މި ރަސްމިއްޔާތުގައި ދަސްވެނިވީ، މުސްލިމް ވޯލްޑް ލީގުގެ ބެލުމުގެ ދަށުން ދުނިޔޭގެ އެކި ޤައުމުތަކުގައި، ޚާއްޞަކޮށް އެފްރިކާ ބައްރުގެ ޤައުމުތަކުގައި ހިންގާ ޕްރޮގްރާމްތަކުގެ ތެރެއިން ޤުރުއާން ހިތުދަސްކުރި ދަރިވަރުންނެވެ.

މި ރަސްމިއްޔާތު ފެށުމުގެ ގޮތުން ދެއްކެވި ވާހަކަފުޅުގައި ޑރ. އަލް-ޢީސާ ވަނީ، ކީރިތި ޤުރުއާނަށް ޚިދުމަތްކުރުމަށާއި ދުނިޔޭގެ އެކި ކަންކޮޅުތަކުގައި ޤުރުއާން ހިތުދަސްކުރާ ފަރާތްތަކަށް އެހީތެރިކަން ފޯރުކޮށްދިނުމަށް އެ ޖަމްޢިއްޔާއިން ކުރަމުންދާ މަސައްކަތްތަކަށް އަލިއަޅުއްވާލައްވާފައެވެ. މީގެ އިތުރުން، ހަރުކަށި ފިކުރުތަކުން ދަރިވަރުން ސަލާމަތްކުރުމަށާއި، އަނިޔާވެރި ޖަމާޢަތްތަކުގެ ނުފޫޒުގެ ދަށަށް އެކުދިން ދިޔަ ނުދީ ހިމާޔަތްކުރުމަށް ކުރާ މަސައްކަތްތައްވެސް އޭނާ ފާހަގަކުރެއްވިއެވެ.

"މުސްލިމް ވޯލްޑް ލީގަކީ އުނގަންނައިދީ ތަރުބިއްޔަތުކުރާ ޖަމްޢިއްޔާއެއް،" ކަމަށް ވިދާޅުވަމުން އަލް-ޢީސާ ފާހަގަކުރެއްވީ، އެ ޖަމްޢިއްޔާގެ ހުރިހާ ހަރަކާތްތަކެއް ވެސް ކުރިއަށްގެންދަނީ އެ މަސައްކަތެއް ހިނގާ ޤައުމެއްގެ ސަރުކާރާ ގުޅިގެން، އެ ސަރުކާރެއްގެ ސީދާ ބެލުމުގެ ދަށުން ކަމަށެވެ. އަދި މިއީ އެ ޖަމްޢިއްޔާގެ މަސައްކަތްތައް ބައްޓަންކުރުމުގައި ގެންގުޅޭ އެންމެ އަސާސީ އެއް ޝަރުޠުކަންވެސް އޭނާ ބަޔާންކުރެއްވިއެވެ.

މި ރަސްމިއްޔާތުގައި، އެންމެ ރަނގަޅު ނަތީޖާ ހޯދި ދަރިވަރުންނާއި މުދައްރިސުންގެ އަގުވަޒަންކޮށް ހަނދާނީ ފިލާ ދީފައިވެއެވެ. މީގެ އިތުރުން، އެ ދަރިވަރުންގެ ތަޢުލީމީ ދަތުރާއި، ހޯދާފައިވާ ކާމިޔާބީތަކުގެ އިތުރުން، ކިޔަވައި ނިމުމަށްފަހު މުޖުތަމަޢުގައި އަދާކުރަމުންދާ އިސް ދައުރުތަކާ ގުޅޭގޮތުން މަޢުލޫމާތު ހިއްސާކޮށްފައިވެއެވެ.