އުވަ ދޯންޏެއް ކޮނޑަށް ލައިގެން ރަށްރަށަށް ދިޔަޔަސް، މާލޭ އަވަށްތަކުގެ މީހުން އެއްކުރިޔަސް މުއިއްޒަށް ދެވަނަ ދައުރެއް ލިބޭނެ އެއްގޮތެއް ވެސް ނެތް: ބޮންޑާ
ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުން ބޮންޑާ ވިދާޅުވީ ރައީސް މުއިއްޒު ކަޓުޖައްސަން އުޅެގެން ދެވަނަ ދައުރަކަށް ނުހޮވޭނެ ކަމަށް. މުއިއްޒުގެ ސަރުކާރުން 5000 އަށް ވުރެ ގިނަ ވައުދުވެފައިވާ ނަމަވެސް އެއްވެސް ވައުދެއް ފުއްދިފައި ނެތް ކަމަށް ބޮންޑާ ވިދާޅުވި. ވެރިކަމަށް އާދެވޭނީ ބޯހިޔާވަހިކަމާ އަގުހެޔޮ ކަރަންޓާއި ޒުވާނުންނަށް ފުރުސަތު ފަހިކޮށްދީގެން ކަމަށާ އެގޮތަށް ނުކުރެވޭނަމަ ރައީސް މުއިއްޒު ނުހޮވޭނެ ކަމަށް ބޮންޑާ ވިދާޅުވި.
މާފަންނު މެދު ދާއިރާގެ ކުރީގެ މަޖިލިސް މެންބަރު އިބްރާހީމް ރަޝީދު (ބޮންޑާ) | ރާއްޖެއެމްވީ
ރައީސް ޑރ. މުހައްމަދު މުއިއްޒު ކިތަންމެ ބޭނުންފުޅު ވިއަސް އެމަނިކުފާނަށް ވެރިކަމުގެ އިތުރު ދައުރެއް ލިބޭނެ އެއްވެސް ގޮތެއް ނެތް ކަމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ ކުރީގެ މެންބަރު އިބްރާހީމް ރަޝީދު (ބޮންޑާ) ވިދާޅުވެއްޖެ އެވެ.
ރާއްޖެޓީވީ ގެ ފަލަސުރުޚީ ޕްރޮގްރާމް ގައި ވާހަކަ ދައްކަވަމުން ބޮންޑާ ވިދާޅުވީ ރައީސް މުއިއްޒު ދެވަނަ ދައުރަކަށް ހޮވެން ވެގެން ކަޓު ޖައްސަން އުޅެގެން ނުހޮވޭނެ ކަމަށެވެ.
ހުރިހާ އިންތިޚާބެއް އެއްކޮށްލިއަސް، ރައީސް މުއިއްޒަށް ދެން ވެރިކަމަށް އާދެވޭނެ އެއްވެސް މަގެއް ނެތް ކަމަށް ބޮންޑާ ވިދާޅުވި އެވެ.
ހަމައެކަނި އޭނާ އަށް ވެރިކަމަށް އާދެވޭނެ ގޮތަކީ ރާއްޖޭގަ މިހާރު މިތިބަ ގޯތި ދީފަ ތިބި ފަރާތްތަކަށް 25 އަހަރުގެ މުއްދަތަށް 5 އިންސައްތައިގެ ލޯނުތައް ދީ އެތަން ރާނާ، ދިރިއުޅެވޭނެ ގޮތް ހަދައިދީ. އާދެވޭނެ ގޮތެއް މި ކިޔާދެނީ. އެކަން ކުރޭ. ގޭގޭ ގެ ކަރަންޓު ބިލުތައް ވެސް މިހާރު ވެސް ސޯލާ އަށް ބަދަލު ކުރޭ. ކަރަންޓު ބިލުތައް ވެސް އަގުހެޔޮ ކުރޭ. ޒުވާނުންނަށް ވެސް ދިރިއުޅެވޭނެ، ވިޔަފާރި ކުރެވޭނެ ގޮތްތަކެއް ފަހި ކޮށްދީ،ރައްޔިތުންގެ މަޖިލީހުގެ މާފަންނު މެދު ދާއިރާގެ ކުރީގެ މެންބަރު އިބްރާހީމް ރަޝީދު (ބޮންޑާ)
ބޮންޑާ ވިދާޅުވީ މުއިއްޒު ވެރިކަމަށް އާދެވޭނެ ކަމަށް ވަރަށް ގިނަ ކަންކަން ކުރަމުންދާ ކަމަށެވެ. އެގޮތުންއުވަ ދޯންޏެއް ކޮނޑަށް ލައިގެން ރަށްރަށަށް ދިއުމާ އިންތިޚާބާ ދިމާކޮށް މާލޭގެ އަވަށްތަކުގެ މީހުން އެއްކޮށްގެން އެއް ވާހަކަ އެއް ދައްކާ ކަމަށެވެ. ނަމަވެސް މިކަންކަން ކޮށްގެން ދެވަނަ ދައުރެއް ރައްޔިތުން މުއިއްޒަކަށް ނުދޭނެ ކަމަށް ބޮންޑާ ވިދާޅުވި އެވެ.
މިހާރު ވެސް 5000 އަށް ވުރެ ގިނަ ވައުދު ވެވަޑައިގެންފި ކަމަށާ ނަމަވެސް ފުއްދުނު އެންމެ ވައުދެއް ވެސް ނެތް ކަމަށް ބޮންޑާ ވިދާޅުވި އެވެ. ރައްޔިތުންނަށް އެކަން ފެންނަ ކަމަށާ އެހެން ކަމުން މުއިއްޒުގެ އަމަލުތައް މިގޮތަށް ބަހައްޓައިގެން ދެވަނަ ދައުރެއް ލިބޭތަން ނުފެންނަ ކަމަށް ބޮންޑާ ވަނީ ތަކުރާރު ކޮށް ވިދާޅުވެފަ އެވެ.
