މަރޮށީ ރައްޔިތުންނަށް ލިބެނީ "ދަބަރު ފެން" - އަޅާލާނެ މީހަކު ނެތް!
15 ފެބުރުއަރީ 2026 | އާދީއްތަ 10:11ށ. މަރޮށީގައި ގާއިމުކޮށްފައިވާ ފެނުގެ ނިޒާމުން ދަބަރު ފެން އަންނާތީ ރައްޔިތުންނަށް ސިއްޙީ އަދި އާންމު ދިރިއުޅުމުގައި ބޮޑެތި ދަތިތަކެއް ކުރިމަތިވެފައިވާއިރު، މި މައްސަލަ ހައްލުކުރުމަށް ފެނަކަ ކޯޕަރޭޝަނަށް ހުށަހަޅައިގެން ވެސް އެދެވޭ ޖަވާބެއް ލިބިފައެއް ނުވޭ. މި ކަމުގައި ސިޔާސީ ނުފޫޒު އޮތް ކަމަށް ރައްޔިތުން ތުހުމަތު ކުރާއިރު، ރަށުގެ ފެނަކަ އޮފީސް ހިންގުމާ ހަވާލުވެ ހުރި ފަރާތުން މައްސަލަ ހައްލުކުރުމުގެ ބަދަލުގައި މުވައްޒަފުންނަށް ޒާތީ ގޮތުން ޖައްސާލައި އިހުމާލުވަމުންދާ ކަމުގެ ކަންބޮޑުވުން ވަނީ އިތުރުވެފަ.
ށ. މަރޮށީ ގައި ގާއިމުކޮށްފައިވާ ފެނުގެ ނިޒާމުން ފޯރުކޮށްދޭ "ދަބަރު ފެން" | ރާއްޖެއެމްވީ
ށ. މަރޮށީ ގައި ގާއިމުކޮށްފައިވާ ފެނުގެ ނިޒާމުން ފޯރުކޮށްދޭ ފެން ތަޣައްޔަރުވެ، ބޭނުންނުކުރެވޭ މިންވަރަށް ދަބަރު ފެން އަންނާތީ އެ ރަށުގެ ރައްޔިތުން ކަންބޮޑުވުން ފާޅު ކޮށްފި އެވެ.
މިދިޔަ ސަރުކާރުން ފަށައި، މަސައްކަތް ނިންމާފައިވާ މި މަޝްރޫއުގެ ޚިދުމަތް މިދިޔަ 2025 ވަނަ އަހަރު ދޭން ފެށީ ރައީސް ޑރ. މުހައްމަދު މުއިއްޒުގެ ސަރުކާރުންނެވެ. ނަމަވެސް، ޚިދުމަތް ދޭން ފެށީއްސުރެ އިސްކުރުތަކުން އަންނަނީ ބުއިމުގެ އިތުރުން އެއްވެސް ކަމަކަށް ބޭނުން ނުކުރެވޭ ފަދަ ދަބަރު ފެން ކަމަށް އެރަށުން ރާއްޖެޓީވީ އާ ވާހަކަދެއްކި މީހަކު ވަނީ ބުނެފަ އެވެ.
މިކަމުގެ ސަބަބުން ރަށުގެ ރައްޔިތުންނަށް ސިއްޙީ ގޮތުންނާއި ދިރިއުޅުމުގެ އާންމު ކަންކަމުގައި ބޮޑެތި ދަތިތަކެއް ކުރިމަތިވެފައިވާއިރު މިކަމަށް ހައްލެއް ހޯދުމަށް އެ ރަށު ފެނަކަށް އޮފީހަށް މައްސަލަ ހުށަހަޅައި، ސިޓީ ވެސް ފޮނުވާފައިވާ ކަމަށާ ނަމަވެސް މި ކަމުގެ ކަންބޮޑުވުން ފާޅުކުރާތާ އަހަރެއް ވީ އިރު ވެސް ހައްލެއް ނުލިބޭތީ އެ ރަށުގެ ރައްޔިތުން ވަނީ ކަންބޮޑުވުން ފާޅު ކޮށްފަ އެވެ.
މި މައްސަލަ ހައްލުކުރުމަށް އެދި މަރޮށީ ރައްޔިތުންގެ ފަރާތުން ފެނުގެ ސާމްޕަލްތަކާއެކު މި މަހުގެ 9 ވަނަ ދުވަހު ފެނަކަ ކޯޕަރޭޝަނަށް ރަސްމީކޮށް ސިޓީ ފޮނުވާފައިވީ ނަމަވެސް، މިހާތަނަށް އެ ކުންފުނިން އެއްވެސް ޖަވާބެއް ދީފައިނުވާ ކަމަށް އެ ރަށުން ވާހަކަދެއްކި މީހަކު ބުންޏެވެ.
މި މައްސަލައިގެ ތެރެއަށް ސިޔާސީ ނުފޫޒު ވަދެފައިވާ ކަމުގެ ތުހުމަތުތަކެއް ވެސް ރައްޔިތުން ދަނީ ކުރަމުންނެވެ. އެގޮތުން، މަރޮށީ ފެނަކަ އޮފީސް ހިންގުމާ ހަވާލުވެ ހުންނެވި ސާލިމް އަބްދުﷲ އަކީ ވެރިކަން ކުރާ ޕީއެންސީގެ ސްޓިއަރިންގ ކޮމިޓީގެ މެންބަރެއް ކަމަށާއި، އޭނާއަކީ އެ ދާއިރާގެ މަޖިލިސް މެންބަރު މުހައްމަދު އިބްރާހިމް ގެ ވަރަށް އަރިސް މީހެއްކަން ރައްޔިތުން ފާހަގަކުރެ އެވެ.
މަރޮށީ ރައްޔިތުން ބުނާ ގޮތުގައި، އޭނާ މި މައްސަލައަށް ހައްލެއް ހޯދައިދޭން އެއްވެސް މަސައްކަތެއް ނުކުރާއިރު، އޭނާ ގެ ދަށުން މަސައްކަތް ކުރާ މުވައްޒަފުންނާ މެދު ވެސް އަމަލުކުރަމުން ދަނީ ޒާތީ އިހާނެތިކޮށެވެ. އެގޮތުން ސިޔާސީ ފިކުރު ތަފާތު މުވައްޒަފުންނަށް އެކި ގޮތްގޮތުން އުނދަގޫ ކުރުމާ ޒާތީ ގޮތުން ޖައްސާލައި، ބައެއް ފަރާތްތަކަށް ގަސްތުގައި ޖެއްސުން ކުރަމުންދާ ކަމުގެ ތުހުމަތު ވެސް ކޮށްފައި ވެ އެވެ.
އެ ރަށުން ވާހަކަ ދެއްކި ފަރާތަކުން ބުނީ ސަރުކާރުގެ އެކި މުއައްސަސާތަކުގައި އެތައް ފަހަރަކު ދެންނެވުމުން ވެސް އެދެވޭ ނަތީޖާއެއް ފެނިފައެއް ނުވެ އެވެ.
އަޅުގަނޑުމެން މި ބޭނުންކުރަނީ އިންސާނުން ބޭނުންކުރަން ހެޔޮވާވަރުގެ ފެނެއް ނޫން. ފެނަކަ އޮފީހުގައި ތިބި ސިޔާސީ މީހުންނަށް މުހިންމީ ރައްޔިތުންގެ ސިއްޙަތެއް ނޫން، އެމީހުންގެ މަގާމާއި ސިޔާސީ ގުޅުން.މަރޮށިން ކަންބޮޑުވުން ފާޅުކުރި ރައްޔިތެއް
ޒިންމާދާރު ފަރާތްތަކުން މިކަމަށް އިހުމާލުވަމުންދާތީ، މަރޮށީ ރައްޔިތުން ތިބީ ބޮޑު ކަންބޮޑުވުމެއްގެ ތެރޭގަ އެވެ.
