ރަމަޟާން މަހަށް ތައްޔާރުވަމުންދާ މިދުވަސްވަރު ސްކޭމަރުން ވަރަށް ބޮޑަށް ނާޖާއިޒް ފައިދާ ނަގާ، އޮންލައިންކޮށް ވިޔަފާރި ކުރާއިރު ވަރަށް ބޮޑަށް ސަމާލުވާން ޖެހޭ: ފުލުހުން
މުދާ ލިބުމުގެ ކުރިން ފައިސާ ނުފޮނުވުމަށާއި، ވިޔަފާރި ކުރަނީ ރަޖިސްޓްރީކޮށްފައިވާ ތަނަކުންތޯ ބެލުމުގެ އިތުރުން، އަމިއްލަ ބޭންކިންގ މައުލޫމާތާއި އޯޓީޕީ އެއްވެސް ފަރާތަކާ ހިއްސާނުކުރުމަށް ފުލުހުން ވަނީ ނަސޭހަތްތެރިވެފައި. ސްކޭމްގެ މައްސަލަތައް އިތުރުވަމުންދާތީ، ޝައްކުކުރެވޭ ލިންކުތަކަށް ނުފިތުމަށާއި އެފަދަ ކަމެއް ދިމާވެއްޖެނަމަ ލަސްނުކޮށް ރިޕޯޓުކުރުމަށް ވެސް ފުލުހުން އެދިފައިވޭ.
ސްކޭމުގެ މައްސަލަތައް އިތުރުވާތީ ސަމާލުވުމަށް ފުލުހުން ވަނީ އިލްތިމާސްކޮށްފައި | ސެކިއުރިޓީ މެގަޒިން
ރަމަޟާން މަހަށް ތައްޔާރުވަމުންދާ މިދުވަސްވަރު ސްކޭމަރުން ވަރަށް ބޮޑަށް ނާޖާއިޒް ފައިދާ ނަގަމުންދާ ކަމަށާއި، އޮންލައިންކޮށް ވިޔަފާރި ކުރާއިރު ވަރަށް ބޮޑަށް ސަމާލުވާން ޖެހޭ ކަމަށް ފުލުހުން ބުނެފި އެވެ.
ސްކޭމްގެ މައްސަލަތައް ބޮޑުވެފައިވާ މިދުވަސްވަރާ ގުޅިގެން ފުލުހުން އާއްމު ކޮށްފައިވާ ވީޑީއޯއެއްގައި އެންޓި ސްކޭމް ސެންޓަރުގެ ސީނިއަރ ސާޖަންޓް އަބްދުﷲ ޝަހުނީޒު ވިދާޅުވީ މިދުވަސްވަރަކީ ރަމަޟާން މަހަށް ތައްޔާރުވުމުގެ ގޮތުން ވަރަށް ގިނަ މީހުން ގޭތެރޭގައި ގެންގުޅޭ އާލާތްތައް އާ ކުރުމާއި، ކާބޯތަކެތި ގަތުމުގައި ހަމަ ވަރަށް އަވަދިނެތި އުޅޭ ކަމަށެވެ. އަދި މިދުވަސްވަރު ސްކޭމަރުން ވެސް އިތުރަށް ހުށިޔާރުވެ ވިޔަފާރީގެ ނާޖާއިޒް ފައިދާ ނަގަމުންދާ ކަމަށް އޭނާ ވިދާޅުވި އެވެ.
ޝަހުނީޒު ވިދާޅުވީ އޮންލައިން ވިޔަފާރިތަކުން ކުރާ ސްކޭމްތައް ވަރަށް ބޮޑަށް އިތުރުވަމުންދާކަން ފާހަގަކުރެވޭ ކަމަށާއި، އިތުރަށް ސަމާލުވާން ޖެހޭ ކަމަށެވެ. އޭނާ ވިދާޅުވީ ވިޔަފާރި ކުރުމުގެ ކުރިން އެއީ ރަޖިސްޓްރީ ކޮށްފައިވާ ވިޔަފާރިއެއްތޯ ކަށަވަރު ކުރަން ޖެހޭ ކަމަށެވެ. އަދި މުދާ އަތަށް ނުލިބެނީސް ފައިސާ ޖަމާ ނުކުރުމަށް އޭނާ ވަނީ އިލްތިމާސް ކުރައްވާފަ އެވެ.
އަޅުގަނޑުމެންނަށް ގަބޫލުކުރެވެނީ މިރޯދައަށް ތައްޔާރުވާ ތައްޔާރުވުމުގައި އޭގެ ނާޖާއިޒް ފައިސާ ސްކޭމަރުން ނަގަމުންދާކަން. އެގޮތުން ހަމަ ގިނަ ފަހަރު މި ފާހަގަކުރެވެނީ މިއީ އަސްލު ވިޔަފާރިއެއް ތޯ ކަށަވަރުކޮށްނުލެވި މި ފައިސާ ފޮނުވާލާ މުދާ ނުލިބެނިސް މިފައިސާ ދޫކޮށްލެވޭތަން އެބަ އާދޭ. އެހެންވީމަ އަޅުގަނޑުމެންގެ އިލްތިމާސްއަކީ ސައްހަ ވިޔަފާރިއެއްތޯ ކަށަވަރު ކުރުން. ކަށަވަރުު ކުރެވޭނެ ބިޒްނަސް ޕޯޓަލް ގެ ތެރެއިން ބިޒްނަސް. އީގޯން.އެމްވީ އެލިންކުން ބަލާލެވޭނެ އެއީ ރަޖިސްޓާޓް ބިޒްނަސްއެއްތޯ. ދެން އަޅުގަނޑުމެންގެ އިލްތިމާސް އަކީ ފަރުދުންގެ އެކައުންޓުތަކަށް ޓްރާންސްފަރ ނުކުރެއްވުން ވިޔަފާރި ކުރައްވާއިރުގައި . ހަމަ ވިޔަފާރި އެކައުންޓެއްތޯ ބައްލަވާފައި ނޫނީ ޓްރާންސްފަރ ނުކުރެއްވުން އޭގެ އިތުރުން މުދާ ލިބުނީމަ ނޫނީ ފައިސާ ދޫނުކުރެއްވުން.އެންޓި ސްކޭމް ސެންޓަރުގެ ސީނިއަރ ސާޖަންޓް އަބްދުﷲ ޝަހުނީޒު
މީގެ އިތުރުން ފުލުހުން ވަނީ އޮންލައިންކޮށް ވިޔަފާރިކުރާއިރު ޔަގީންކަން ނެތް ލިންކުތަކަށް ނުފިތުމަށް ވެސް އިލްތިމާސް ކޮށްފަ އެވެ. އަދި އަމިއްލަ ބޭންކިންގް މައުލޫމާތާއި އޯ.ޓީ.ޕީ އެއްވެސް މީހަކާ ހިއްސާ ނުކުރުމަށް އެދިފައިވާއިރު، ސްކޭމްގެ މައްސަލައެއް ފާހަގަ ކުރެވޭއިރަށް ވީހާ ވެސް އަވަހަށް ރިޕޯޓު ކުރުމަށް އެދިފައިވެ އެވެ.
