ހައިވޭގައި ހިނގި ނުރައްކާތެރި އެކްސިޑެންޓާއި ގުޅިގެން އެއްވެސް މީހަކު ހައްޔަރެއް ނުކުރޭ، މައްސަލަ ބަލަނީ
9 ފެބުރުއަރީ 2026 | ހޯމަ 08:32މި ހާދިސާގައި ހަތަރު މީހަކަށް ސީރިއަސް އަނިޔާތަކެއް ލިބިފައިވާއިރު، އެ މީހުންނަށް އައިޖީއެމްއެޗް އަދި ހުޅުމާލެ ހޮސްޕިޓަލުގައި ދަނީ ފަރުވާ ދެމުން.
ހައިވޭގައި ހިނގި އެކްސިޑެންޓު، އެ ސަރަހައްދުގައި ހަރަކާތްތެރިވި ފުލުހުން | ސީއެސްއެމް ޓައިމްސް
ހޯމަ ދުވަހުގެ ރޭ ދަންވަރު ހުޅުމާލޭ ހައިވޭގައި ހިނގި ނުރައްކާތެރި އެކްސިޑެންޓާއި ގުޅިގެން އެއްވެސް މީހަކު ހައްޔަރުކޮށްފައި ނުވާ ކަމަށް ފުލުހުން ބުނެފި އެވެ.
ހޯމަ ދުވަހުގެ ރޭ ދަންވަރު 12:45 އެހައިކަންހާއިރު، ހިނގި މި އެކްސިޑެންޓް ހިނގާފައި ވަނީ ހައިވޭގެ ކާރު ލޭނުގައި މަޑުކޮށްގެން އޮތް ކާރެއްގެ ފަހަތުގައި ބާރު ސްޕީޑުގައި ދުއްވާފައި ދިޔަ އެހެން ކާރެއް ޖެހުމުގެ ސަބަބުން، އެ ކާރު އެ ސަރަހައްދުން ދުއްވާފައި ދިޔަ 4 ސައިކަލުގައި ޖެހިގެންނެވެ.
މި ހާދިސާ އާއި ގުޅޭ ގޮތުން ފުލުހުންނާއި ސުވާލުކުރުމުން ބުނީ މި ހާދިސާ ހިނގަން މެދުވެރިވީ ކޮން ފަރާތެއްގެ އިހުމާލުން ކަން އަދި ނޭނގޭ ކަަމަށެވެ. އަދި މައްސަލަ އިތުރަށް ތަހުގީގުކުރަމުންދާ ކަމަށް ވެސް ވަނީ ބުނެފަ އެވެ.
މި އެކްސިޑެންޓުގައި ހަތަރު މީހަކަށް ސީރިއަސް އަނިޔާތަކެއް ލިބިފައިވާ ކަމަށް ފުލުހުން ވަނީ ބުނެފަ އެވެ. އެ މީހުންނަށް ފަރުވާ ދެމުން ދަނީ އައިޖީއެމް ހޮސްޕިޓަލާއި ހުޅުމާލެ ހޮސްޕިޓަލުގައެވެ.
