އެސްޓީއޯގެ ހަތަރުވަނަ ކުއާޓަރުގެ އާމްދަނީ 4.14 ބިލިއަން ރުފިޔާ އަށް
އެސްޓީއޯގެ 2025 ވަނަ އަހަރުގެ ހަތަރުވަނަ ކުއާޓަރުގެ ރިޕޯޓުން ދައްކާ ގޮތުގައި އެ ކުންފުންޏަށް 4.14 ބިލިއަން ރުފިޔާގެ އާމްދަނީއާއި 244 މިލިއަން ރުފިޔާގެ ސާފު ފައިދާ ލިބިފައިވޭ. މުޅި އަހަރަށް ބަލާއިރު 15.5 ބިލިއަން ރުފިޔާގެ އާމްދަނީއާއި 762 މިލިއަން ރުފިޔާގެ ސާފު ފައިދާ ރިކޯޑު ކުރެވިފައިވޭ.
އެސްޓީއޯގެ މެނޭޖަރުންގެ ޤާބިލުކަން އިތުރުކުރުމަށް ބޭއްވި ސެޝަނެއްގެ ތެރެއިން. | އެސްޓީއޯ
ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން އާންމުކޮށްފައިވާ 2025 ވަނަ އަހަރުގެ ހަތަރުވަނަ ކުއާޓަރުގެ ރިޕޯޓަށް ބަލާއިރު، އެ ކުއާޓަރުގައި އެ ކުންފުންޏަށް އާމްދަނީގެ ގޮތުގައި 4.14 ބިލިއަން ރުފިޔާ ލިބިފައިވެ އެވެ. މިއީ އޭގެ ކުރީ ކުއާޓަރާ އަޅާބަލާއިރު ގާތްގަނޑަކަށް 8 އިންސައްތައިގެ ކުރިއެރުމެކެވެ. އެންމެ ބޮޑު އާމްދަނީއެއް ލިބިފައިވަނީ ތެލުގެ ވިޔަފާރިންނެވެ.
މީގެ އިތުރުން، ހަތަރުވަނަ ކުއާޓަރުގައި ކުންފުނީގެ ޖުމްލަ ފައިދާ (ގްރޮސް ޕްރޮފިޓް) ވަނީ ކުރީ ކުއާޓަރާ އަޅާބަލާއިރު 11 އިންސައްތަ އިތުރުވެފަ އެވެ.
ނިމިދިޔަ ހަތަރުވަނަ ކުއާޓަރުގައި އެސްޓީއޯ އަށް ސާފު ފައިދާގެ ގޮތުގައި 244 މިލިއަން ރުފިޔާ ލިބިފައިވާއިރު، މިއީ ތިންވަނަ ކުއާޓަރުގައި ލިބުނު 186 މިލިއަން ރުފިޔާއާ އަޅާބަލާއިރު ކުރިއެރުމެއްކަން ފާހަގަ ކުރެވެ އެވެ.
މުޅި އަހަރަށް ބަލާއިރު، އެސްޓީއޯއަށް 15.5 ބިލިއަން ރުފިޔާގެ އާމްދަނީ އެއް ލިބިފައިވާއިރު، ސާފު ފައިދާގެ ގޮތުގައި 762 މިލިއަން ރުފިޔާ ވަނީ ރިކޯޑު ކުރެވިފަ އެވެ. މިއީ އަހަރުން އަހަރަށް ބަލާއިރު ކުޑަ ކުރިއެރުމެއް ކަން ފާހަގަ ކުރެވެ އެވެ.
ހަތަރުވަނަ ކުއާޓަރު ނިމުނުއިރު އެސްޓީއޯގެ ޖުމްލަ އެސެޓްސް ހުރީ 14.18 ބިލިއަން ރުފިޔާގަ އެވެ. އަދި ކުންފުނީގެ ރައުސްމާލު (އިކުއިޓީ) އަކީ 5.62 ބިލިއަން ރުފިޔާ އެވެ. މި މުއްދަތުގައި ކުންފުނީގެ ލިކުއިޑިޓީ ނުވަތަ ނަގުދު ފައިސާގެ ތަނަވަސްކަން ވަނީ ރަނގަޅުވެފަ އެވެ. އެގޮތުން 'ކަރަންޓް ރޭޝިއޯ' ކުރީ ކުއާޓަރުގައި ހުރި 1.22 އިން 1.48 އަށް ވަނީ މަތިވެފަ އެވެ. އަދި ވިޔަފާރީގެ މުއާމަލާތްތަކަށް ބޭނުންވާ ފައިސާ ނުވަތަ 'ވޯކިންގ ކެޕިޓަލް' 3.16 ބިލިއަން ރުފިޔާ އަށް އިތުރުވެފައިވެ އެވެ.
ހުސްވި އަހަރުގެ ފަހު ކުއަރޓާ ނިމުނު އިރު ކުންފުނިން ނަގާފައިވާ ޖުމްލަ ދަރަނި އިތުރުވުމާ ގުޅިގެން 'ޑެޓް ޓު އިކުއިޓީ ރޭޝިއޯ' 1.52 އަށް މައްޗަށް ގޮސްފައިވާ ކަން ފާހަގަ ކުރެވެ އެވެ.
ކުންފުނީގެ ކޭޝް ފްލޯ ނުވަތަ ފައިސާ ދައުރުވާ ގޮތަށް ބަލާއިރު، ހިންގުމުގެ ދާއިރާއިން (އޮޕަރޭޓިންގ އެކްޓިވިޓީސް) 139 މިލިއަން ރުފިޔާ ދަށަށް ގޮސްފައިވެ އެވެ. ހަމަ އެއާ އެކު، މާލީ އެސެޓްތަކަށާއި ބޮޑެތި މަޝްރޫޢުތަކަށް ކުރި އިންވެސްޓްމަންޓްތަކާއެކު، އިންވެސްޓްމަންޓް ކޭޝް އައުޓްފްލޯ ވަނީ 642 މިލިއަން ރުފިޔާއަށް އިތުރުވެފަ އެވެ. ނަމަވެސް، ލިބުނު 802 މިލިއަން ރުފިޔާ އާ އެކު، ކުއާޓަރު ނިމުނުއިރު ކުންފުނީގެ އަތުގައި ހުރި ނަގުދު ފައިސާގެ މިންވަރު ވަނީ 222 މިލިއަން ރުފިޔާގަ އެވެ.
ހިއްސާގެ ބާޒާރުގައި އެސްޓީއޯގެ ހިއްސާގެ އަގު ހުރީ އެއްވަރެއްގައި ހިފެހެއްޓިފަ އެވެ. ހަތަރުވަނަ ކުއާޓަރުގައި ހިއްސާއެއްގެ އަގު އުޅުނީ 1,671 ރުފިޔާއާއި 1,900 ރުފިޔާއާ ދެމެދުގަ އެވެ. އަދި ކުއާޓަރު ނިމުނުއިރު ހިއްސާއެއްގެ އަގު ހުރީ 1,800 ރުފިޔާގަ އެވެ. ކުންފުނީގެ މާކެޓް ކެޕިޓަލައިޒޭޝަން ގާތްގަނޑަކަށް 2.03 ބިލިއަން ރުފިޔާގައި ހުރިއިރު، ހިއްސާއަކަށް ޖެހޭ ފައިދާ (އަރނިންގްސް ޕަރ ޝެއަރ) ވަނީ 217 ރުފިޔާއަށް އުފުލިފަ އެވެ. ކުންފުނީގެ ފައިދާ އިތުރުވުމާ ގުޅިގެން 'ޕްރައިސް އަރނިންގްސް ރޭޝިއޯ' ވަނީ 8.29 އަށް ދަށްވެފަ އެވެ. މީގެ އިތުރުން، ކުރީގެ ކުއާޓަރުތަކާ އަޅާބަލާއިރު ހިއްސާގެ މުއާމަލާތްތައް ކުރި މިންވަރު އިތުރުވެފައިވާކަން ފާހަގަކުރެވެ އެވެ.
