ބިދޭސީންގެ ކޯޓާ އަށް ލިޔެކިޔުން ހުށަހެޅުމުގެ މުއްދަތު 1 ޖޫން އާ ހަމައަށް އިތުރުކޮށްފި
30 ޖެނުއަރީ 2026 | ހުކުރު 06:27މިނިސްޓްރީން ވަޒީފާ ދޭ ފަރާތްތަކަށް އަންގާފައިވަނީ 01 ޖޫން 2026 ގެ ކުރިން ވަރކް ސައިޓް ޑިކްލެރޭޝަން ފޯމު އަދި އިގުރާރު ހުށަހެޅުމަށް.
ރާއްޖެ އަކީ ނިސްބަތުން ބިދޭސީ މަސައްކަތްތެރިން ގިނަ ގައުމެއް | ދަ ޕްރެސް
ދިވެހިރާއްޖޭ ގައި ބިދޭސީން ވަޒީފާ އަދާކުރުމަށް ކޯޓާ ދޫކުރުމުގެ މަސައްކަތްތަކަށް ސައިޓް ރަޖިސްޓްރީ ކުރުމުގައި ހުށަހަޅަންޖެހޭ ބައެއް ލިޔެކިޔުންތައް ހުށަހެޅުމުގެ މުއްދަތު 01 ޖޫން 2026 އާ ހަމައަށް އިތުރުކޮށްދީފި އެވެ.
މިނިސްޓްރީ އޮފް ހޯމް ލޭންޑް ސެކިއުރިޓީ އެންޑް ޓެކްނޮލޮޖީ އިން ބުރާސްފަތި ދުވަހު ނެރުނު ބަޔާނެއްގައި ވަނީ މި ގޮތަށް އިއުލާންކޮށް ފައެވެ.
މި ނިންމުން ނިންމީ މި ލިޔެކިޔުންތައް ހުށަހެޅުމުގެ މުއްދަތު އިތުރުކޮށްދިނުމަށް އެދި ގިނަ ފަރާތްތަކަކުން އެދެމުންދާތީ ކަމަށް މިނިސްޓްރީ އިން ބުނެ އެވެ. މި ލިޔެކިޔުންތަކުގެ ތެރޭގައި ހިމެނެނެީ ނޯޓަރައިޒް ކޮށްފައިވާ "ވަރކް ސައިޓް ޑިކްލެރޭޝަން ފޯމު" އަދި އިގުރާރު އެވެ.
މިނިސްޓްރީން ހުރިހާ ވަޒީފާ ދޭ ފަރާތްތަކަށް އަންގާފައިވަނީ 01 ޖޫން 2026 ގެ ކުރިން ވަރކް ސައިޓް ޑިކްލެރޭޝަން ފޯމު އަދި އިގުރާރު ހުށަހެޅުމަށެވެ. މި ލިޔެކިޔުންތައް ހުށަހެޅުމަށް ރަޖިސްޓްރީ ކޮށްފައިވާ ސައިޓުގެ "ޑޮކުއުމެންޓް އަޕްޑޭޓް ރިކުއެސްޓް" ނުވަތަ "ސައިޓް ޕާމިޓް އަޕްޑޭޓް" މެދުވެރިކޮށް ހުށަހެޅުމަށް އަންގާފައިވެ އެވެ.
މިނިސްޓްރީން ވަނީ ކަނޑައެޅިފައިވާ މުއްދަތުގެ ތެރޭގައި މި ފޯމު ހުށަނާޅާ ފަރާތްތަކުގެ ސައިޓްތައް ސަސްޕެންޑް ކުރެވޭނެ ކަމަށް ބުނެ އިންޒާރުދީފަ އެވެ.
މީގެ ކުރިން މި ލިޔެކިޔުންތައް ހުށަހަޅަން މިނިސްޓްރި އިން ދިން ތާރީހަކީ މިއަހަރުގެ ޖަވަނަވަރީ މަހުގެ 31 ވަނަ ދުވަހުގެ ނިޔަލަށެވެ.
ވަޒީފާ ދޭ ފަރާތްތަކަށް ފޯމު ފުރުމަށް ފަސޭހަކޮށްދިނުމުގެ ގޮތުން، ފޯމު ފުރުމުގައި އަންނާނެ ސުވާލުތަކާއި ޖަވާބުތައް އެކްސްޕެޓް ސިސްޓަމް ހޯމްޕޭޖް އިން ލިބޭނެ ކަމަށް މިނިސްޓްރީން ބުނެ އެވެ. މިނިސްޓްރީ އިން ބުނީ މި ފަސޭހަތަކުގެ ސަބަބުން ވަޒީފާ ދޭ ފަރާތްތަކަށް ފޯމު ފުރުމުގައި ކުރިމަތިވާ ދަތިތައް ހައްލުކުރެވޭނެ ކަމަށެވެ.
