އެމެރިކާގެ ގާނޫނު ހަދާ މަޖިލީހުގެ މެމްބަރު ޑެޓް ކުރޫޒް އިސްލާމް ދީނަށް ހަޖޫ ޖަހާ އީރާނުގެ ލީޑަރަށް މަރުގެ އިންޒާރު ދީފި

އެމެރިކާގެ ގާނޫނު ހަދާ މަޖިލީހުގެ މެމްބަރު ޑެޓް ކުރޫޒް އިސްލާމް ދީނަށް ހަޖޫ ޖަހާ އީރާނުގެ ލީޑަރަށް މަރުގެ އިންޒާރު ދީފި އެވެ.

އެމެރިކާގެ ސެނެޓް ގައި ޓެކްސަސް ތަމްސީލު ކުރާ މެމްބަރު އީރާނުގެ ލީޑަރު އާޔަތުﷲ އަށް މަރުގެ އިންޒާރު ދިނީ އޭނާ އެކްސް ގައި ކުރި ޕޯސްޓެއްގަ އެވެ.

އެމެރިކާގެ ރައީސް ޓްރަމްޕް ނިސްބަތްވާ ރިޕަބްލިކަން ޕާޓީގެ ޓެޑް ކުރޫޒް ގެ ޕޯސްޓު ގައި އިސްލާމް ދީނަށް ހަޖޫ ޖަހާ މަރުގެ އިންޒާރު ދެމުން ބުނެފައި ވަނީ އީރާނުގެ ރައްޔިތުން އެ ޤައުމުގެ އާޔަތުﷲ ގެ ވެރިކަން ނިމުމަކަށް ގެނެސްފި ނަމަ، އެމެރިކާ އާއި މުޅި ދުނިޔެ އަކީ މިއަށް ވުރެ މާ ބޮޑަށް އަމާން އަދި ރައްކާތެރި ތަނަކަށް ވެގެންދާނެ ކަމަށެވެ. އަދި އެމެރިކާ ނެތިދިއުމަށް ގޮވާލާ މީހުންނަށް، އެމީހުން އެދޭ ފަދަ ނިމުމަކާ މިރޭ ކުރިމަތިލާ އެމީހުންނަށް 72 ބިކުރުވެރިންނާ ބައްދަލުވާނެ ކަމަށް ވެސް ބުނެފައިވެ އެވެ.

ޓެޑް ކުރޫޒް މިހެން ބުނެފައިވާއިރު އެމެރިކާގެ ރައީސް ޓުރުތް ސޯޝަލް ގައި ކުރެއްވި ޕޯސްޓެއްގައި ވެސް އީރާނުން މީގެ ކުރިން ދުވަހަކު ވެސް ހޯދަން ނޭދޭ މިންވަރަށް މިނިވަންކަން ހޯދަން ބޭނުންވާ ކަމަށާއި އެމެރިކާ އިން އީރާނުގެ ރައްޔިތުންނަށް އެހީވެދޭން ތައްޔާރަށް އޮތް ކަމަށް ވިދާޅުވެފައިވެ އެވެ.

ސެނެޓަރ ޓެޑް ކްރޫޒް އަކީ އިސްލާމްދީނާ ދެކޮޅަށް މީގެ ކުރިން ވެސް ގިނަ ބަޔާންތަކެއް ދީފައިވާ ފަރާތެެކެވެ. އޭނާ އިސްލާމް ދީނާ ބެހޭ ގޮތުން ދައްކާ ވާހަކަތަކުގެ ސަބަބުން، މަދަނީ ހައްގުތަކަށް މަސައްކަތްކުރާ ޖަމިއްޔާތަކާއި ސިޔާސީ އިދިކޮޅު ފަރާތްތަކުން އޭނާގެ މައްޗަށް މުސްލިމުންނާ މެދު ތަޢައްޞުބު ގެންގުޅޭ ކަމުގެ ތުހުމަތުތައް ވަނީ އަމާޒުވެފަ އެވެ.

އިސްލާމީ ޝަރީޢަތާ ގުޅޭގޮތުން ކްރޫޒް ކަންބޮޑުވުން ފާޅުކޮށް މީގެ ކުރިން ދައްކާފައިވާ ބައެއް ވާހަކަ ތަކުގައި، އެއީ އިސްލާމީ އަގީދާ ގަބޫލު ނުކުރާ މީހުންގެ މައްޗަށް ބާރުފޯރުވައި، އެ މީހުން ވަކި އުސޫލުތަކެއްގައި ބަނދެލުމަށް އޮތް ނިޒާމެއް ކަމަށް ބުނެފައިވެ އެވެ. އަދި މިއީ އެމެރިކާގެ ގާނޫނުއަސާސީން ކަށަވަރުކޮށްދޭ ދީނީ މިނިވަންކަމާ ފުށުއަރާ، އެމެރިކާގެ ގާނޫނުއަސާސީ އާ އެއްގޮތް ނުކުރެވޭނެ ކަމެއްގެ ގޮތުގައި އޭނާ ވަނީ އިސްލާމީ ޝަރީއަތް ސިފަކޮށްފަ އެވެ.