އުމުރުން 105 އަހަރު ވެފައިވާ "ނެށުމުގެ ރާނީ" އަށް އެތައް ބައެއްގެ ސަމާލުކަން

ނެށުމުގެ ރާނީގެ ނަމުން މަޝްހޫރުވެފައިވާ އުމުރުން 105 އަހަރުގެ އަންހެނަކު، އޭނާގެ އުފަންދުވަހުގައި ނަށާ މަންޒަރު ފެންނަ ވީޑިއޯ އަކަށް އެތައް ބައެއްގެ ސަމާލުކަން ލިބިއްޖެ އެވެ. 

1921 ވަނަ އަހަރު އުފެންވެފައިވާ އެލްސީ ވިލްކިންސް އަށް، ނެށުމުގެ ރާނީގެ ނަން ދީފައި ވަނީ ޕީޓަބަރޯގެ ހެމްޕްޓަންގައި ހުންނަ ކެއާ ހޯމްގެ މުވައްޒަފުންނެވެ. އެ ނަން އެލްސީ އަށް ދީފައި ވަނީ، އެންމެ ކުރިން ވެސް ފެށިގެން ނެށުމަށް އޭނާގެ ހިތުގައި އޮންނަ ލޯތްބެއްގެ ސަބަބުންނެވެ. 

މިދިޔަ ހަފުތާގެ ބުދަ ދުވަހު ކެއާ ހޯމްގައި ވަނީ އޭނާގެ އުފަން ދުވަސް ފާހަގަ ކޮށްފަ އެވެ. އެ ޙަފްލާގައި އެލްސީ ބުނެފައި ވަނީ، މިހާރު އޭނާ އުމުރުން ވަރަށް ދުވަސް ވެފައިވާ ކަމަށެވެ. އެކަމަކު، އަދި ވެސް މިއުޒިކްގެ އަޑު އިވޭ ކޮންމެ ފަހަރަކު، ކުޑަކޮށް ނަށާލާ ކަމަށް އޭނާ ބުންޏެވެ. އެލްސީ ބުނީ މީގެ ކުރިން އޭނާ ނެށި ގޮތަށް މިހާރު ނުނެށޭ ކަމަށާއި، އެކަމަކު އަދި ވެސް ކުޑަކޮށް ނަށާލެވޭ ކަމަށެވެ. 

ކެއާ ހޯމްގެ މެނޭޖަރު ޖެކޮލިން އެންޒަރާ ވުނީ، އެލްސީ އަކީ ނެށުމަށް ވަރަށް ބޮޑަށް ލޯބި ކުރާ މީހެއް ކަމަށެވެ. އެގޮތުން އެއްވެސް ކަހަލަ މިއުޒިކެއް ޖަހައިފި ނަމަ، ނުވަތަ މިއުޒިކެއްގެ އަޑު އިވިއްހެ ނަމަ، އެލްސީ ތެދުވެ ނަށާނެ ކަމަށް އޭނާ ބުންޏެވެ. އަދި އެ ތަނުގައި ތިބޭ އެހެން މީހުން ވެސް ނެށުމުގައި ބައިވެރިވުމަށް ހިތްވަރު ދޭނެ ކަމަށް އެންޒަރާ ބުނެފައިވެ އެވެ.

އެލްސީގެ އުފަން ދުވަސް ފާހަގަ ކުރުމަށް ބޭއްވި ހަފްލާގައި އޭނާގެ އާއިލާ މެމްބަރުން ވެސް ބައިވެރިވެފައިވެ އެވެ. އެގޮތުން އެލްސީގެ ހަތަރު ދަރިންނާއި، ނުވަ މާމަ ދަރިން އަދި 19 މުނި މާމަ ދަރިން ވަނީ ބައިވެރިވެފަ އެވެ. މިއަހަރުގެ ތެރޭގައި އެލްސީ އަށް މާމަ ކިޔާ ތިން ކުދިން ލިބޭނެ ކަމަށް އާއިލާ އިން ވަނީ ބުނެފަ އެވެ. 

އުފަން ދުވަހުގެ ހަފްލާ އަށް ފަހު އެލްސީ ބުނީ، ކުރިއާ އަޅާ ބަލާއިރު ހެލި ފެލިވެ އުޅުމަށް މިހާރު އޭނަ އަށް ވަރަށް ބޮޑަށް އުނދަގޫ ވެފައިވާ ކަމަށެވެ. އެހެން ނަމަވެސް، މިއުޒިކްގެ އަޑު އިވޭ ކޮންމެ ފަހަރަކު ތެށުވެ ނަށާލާނެ ކަމަށް އޭނާ ބުންޏެވެ. އެލްސީ ބުނީ، އެއީ އޭނާ ވަރަށް ބޮޑަށް ލޯބި ކުރާ ކަމެއް ކަމަށާއި، އެކަން ދޫކޮށް ނުލާނެ ކަމަށެވެ. 

އެލްސީ އުފަން ވެފައި ވަނީ ލަންޑަންގެ ހަކްނޭގަ އެވެ. އޭނާ ދިރި އުޅެމުން ގެންދަނީ އޭނާގެ ތިން ބޭބެ އާއި ހަތަރު ދައްތައާ އެކު އެވެ. އެލްސީގެ އުމުރުން 18 އަހަރުގައި ވަނީ، އޭނާގެ ފިރިމީހާ ވިލިއަމްއާ ބައްދަލުވެފަ އެވެ. އޭގެ ފަހުން އެލްސީ ވަނީ ފިރިހެނުންގެ ޓީ ޝާޓު އުފެއްދުމުގެ މަސައްކަތް ކުރާ ފެކްޓަރީއެއްގައި މަސައްކަތް ކޮށްފަ އެވެ. 

އޭގެ ފަހުން 1985 ވަނަ އަހަރު އެލްސީ ވަނީ މަސައްކަތުން ރިޓަޔާވުމަށް ފަހު، ޕީޓަބަރޯ އަށް ބަދަލުވެފަ އެވެެ. އެކަމާ ގުޅޭ ގޮތުން އެލްސީގެ ދަރިފުޅު ސޫ ކޯ ބުނެފައި ވަނީ، އެލްސީ އުމުރުން ދުވަސް ވުމުން ހުރިހާ ކަމެއް ފަސޭހަ އިން ކޮށްދޭން ބޭނުންވި ކަމަށެވެ. ޒުވާން އުމުރުގައި އެލްސީ އަކީ ވަރަށް ބުރަކޮށް މަސައްކަތް ކުރުމުގައި އުޅުނު މީހެއް ކަމަށް ވެސް އޭނާ ބުންޏެވެ. 

އެލްސީއާ ގުޅޭ ގޮތުން އޭނާގެ ހުރިހާ ދަރިން ވެސް ބުނެފައި ވަނީ، އޭނާ އަކީ އަބަދު ވެސް މިއުޒިކަށް ވަރަށް ލޯބި ކުރާ މީހެއް ކަމަށެވެ.