Advertisement
ކ. މާލެ
|
30 ނޮވެންބަރ 2025 | އާދީއްތަ 22:08
ރައީސް އޮފީސް
ރައީސް އޮފީސް
ނައިބް ރައީސުންނަށް ދޭ އިނާޔަތް
ނައިބު ރައީސުންނަށް ދޭ އިނާޔަތް 30،000 ރުފިޔާ އަށް ބޮޑު ކުރަން ކޮމިޓީ އިން ފާސްކޮށްފި
ކުރީގެ ރައީސުންނަށް އޮފީސް ހިންގަން މަހަކު ދޭ 175،000 ރުފިޔާ އުނި ކުރުމަށް އިސްލާހު ހުށަހަޅާފައިވޭ
ކޮމިޓީ އިން ފާސް ކުރީ ނައިބު ރައީސްކަން ފުރިހަމަ ކޮށްފައިވާ ބޭފުޅުންނަށް މަހަކު 30،000 ރުފިޔާ އިނާޔަތެއްގެ ގޮތުގައި ދޭން

ނައިބު ރައީސް ކަން ކުރައްވާފައިވާ ބޭފުޅުންނަށް އިނާޔަތެއްގެ ގޮތުން މަހަކު 30،000 ރުފިޔާ ދޭން ރައްޔިތުންގެ މަޖިލީހުގެ މާލިއްޔަތު ކޮމިޓީ އިން ފާސް ކޮށްފި އެވެ.

ރަސްމީ އޮފީސް ހިންގަން ކުރީގެ ރައީސުންނަށް ދައުލަތުގެ ބަޖެޓުން ކޮންމެ މަހަކު ކުރަމުން އަންނަ ހަރަދު އުނިކޮށް، ނައިބު ރައީސް ކަން ކުރައްވާފައިވާ ބޭފުޅުންނަށް މާލީ އިނާޔަތެއް ދޭންޖެހޭ ގޮތަށް ރައީސުލް ޖުމްހޫރިއްޔާ ކަން ކޮށްފައިވާ މީހަކަށް ދޭން ޖެހޭ ރައްކާތެރިކަމާ އިނާޔަތް ތަކާ ބެހޭ ގާނޫނަށް ބަދަލު ގެންނަން ސަރުކާރުގެ ފަރާތުން މަޖިލީހަށް ބިލު ހުށަހެޅުއްވީ ހުޅުދޫ ދާއިރާގެ މެންބަރު މުހައްމަދު ޝާހިދު އެވެ.

މެންބަރު ހުށަހެޅުއްވި ބިލުގައި ވަނީ ކުރީގެ ރައީސުންނަށް އޮފީސް ހިންގަން މަހަކު ދޭ 175،000 ރުފިޔާ އުނި ކުރުމަށެވެ. އިސްލާހުގައި ވަނީ ކުރީގެ ރައީސަކު ދެވަނަ ދައުރަކަށް އިންތިޚާބުވެ، ނުވަތަ ދައުލަތުގެ އެހެން މަޤާމެއް ފުރުއްވާނަމަ، އެ މުއްދަތުގައި މި އިނާޔަތްތައް ނުލިބޭނެ ގޮތަށް ވެސް ބަދަލު ގެންނަން ހުށަހަޅާފަ އެވެ.

މީގެ އިތުރުން، ކުރީގެ ރައީސަކު ރާއްޖެއިން ބޭރުގައި ދިރިއުޅޭ ނަމަ، އެ މުއްދަތުގައި އެ ބޭފުޅަކަށް ރައްކާތެރިކަން ފޯރުކޮށްދިނުން ލާޒިމުނުވާނެ ކަމަށް ވެސް ބިލުގައި ވެއެވެ.

މި އިސްލާހުގެ ސަބަބުން ކުރީގެ ރައީސުންނަށް ދެމުންދާ އިނާޔަތްތަކުގެ ތެރެއިން ބޮޑު ބަދަލެއް އަންނަ އިރު، ނައިބު ރައީސްކަން ކޮށްފައިވާ ބޭފުޅުންނަށް އިނާޔަތެއްގެ ގޮތުން މަހަކު 25،000 ރުފިޔާ ދިނުމަށް ބިލުގައި ހިމަނާފައިވެ އެވެ. އަދި އެ ބޭފުޅުންނަށް ވެސް ރާއްޖެ އާއި ބޭރު ގައުމުތަކުން ސިއްހީ ހިދުމަތް ލިބޭނެ އިންތިޒާމު ހަމަޖައްސަން އިސްލާހުގައި ހިމަނާފައި ވެއެވެ.

ނަމަވެސް ނައިބު ރައީސްކަން ކުރައްވާފައިވާ ބޭފުޅެއް ކަމަށް ބަލާނީ ގާނޫނުއަސާސީގައިވާ ގޮތުގެ މަތިން ފަސް އަހަރުގެ ރިޔާސީ ދައުރެއް ފުރިހަމަ ކޮށްފައިވާ ނަމަ ކަމަށް އިސްލާހުގައި ވެއެވެ. އިސްލާހުގައި ވާ ގޮތުން މި އިނާޔަތަށް މިވަގުތު ޝަރުތު ހަމަވާ ހަމައެކަނި ބޭފުޅަކީ އެމްޑީޕީގެ އެންމެ ފަހުގެ ވެރިކަމުގައި އެ މަގާމު ފުރުއްވި ފައިސަލް ނަސީމް އެވެ.

މި ބިލު ދިރާސާ ކޮށްފައި ވަނީ ރައްޔިތުންގެ މަޖިލީހުގެ މާލިއްޔަތު ކޮމިޓީ އިން ނެވެ. ބިލު ދިރާސާ ކުރުމަށް ފަހު މާލިއްޔަތު ކޮމިޓީ އިން ވަނީ އެއް އިސްލާހު ބިލަށް ގެނަސްފަ އެވެ. އެގޮތުން މި ބިލުގެ 5 ވަނަ މާއްދާއިން ރައީސުލް ޖުމްހޫރިއްޔާ ކަން ކޮށްފައިވާ މީހަކަށް ދޭން ޖެހޭ ރައްކާތެރިކަމާ އިނާޔަތް ތަކާ ބެހޭ ގާނޫނުގެ 8 ވަނަ މާއްދާގެ ފަހަތަށް އިތުރު ކުރަން ހުށަހަޅާފައިވާ މާއްދާގެ (ހ) ގެ (1) ވަނަ ނަންބަރު ކޮމިޓީ އިން ވަނީ އިސްލާހު ކޮށްފަ އެވެ.

ކޮމިޓީ އިން ފާސް ކުރީ ނައިބު ރައީސް ކަން ކުރައްވާފައިވާ ބޭފުޅުންނަށް އިނާޔަތެއްގެ ގޮތުން މަހަކު 30،000 ރުފިޔާ ދިނުމަށެވެ. މި އިސްލާހު ކޮމިޓީ އިން ފާސް ކުރީ ހޮނިހިރު ދުވަހު ބޭއްވި އެ ކޮމިޓީގެ ބައްދަލު ވުމުގައި ބައިވެރިވެވަޑައިގެންނެވި މެންބަރުންގެ އިއްތިފާގުންނެވެ.

މި ބިލު ހުށަހަޅުއްވަމުން މެންބަރު ޝާހިދު ވިދާޅުވީ މި ބަދަލުތަކުގެ ސަބަބުން އަހަރަކު، 10.5 މިލިއަން ރުފިޔާ ދައުލަތަށް ސަލާމަތްވާނެ ކަމަށެވެ. އެކަމަކު، ނައިބު ރައީސްކަން ކޮށްފައިވާ ބޭފުޅުންނަށް އިނާޔަތް ދޭން ފެށުމުން އެކަމަށް 300،000 ރުފިޔާ ހަރަދުވާނެ ކަމަށް އޭނާ ވިދާޅުވި އެވެ. އަދި ނައިބު ރައީސުންގެ ބޭސް ފަރުވާގެ ހަރަދަށް 700،000 ރުފިޔާ ހަރަދުވާނެ ކަމަށް ވެސް ލަފާ ކުރެވެ އެވެ.

މިހާރު އޮންނަ ގޮތުން ކުރީގެ ރައީސުންގެ ތެރެއިން އެއް ދައުރު ފުރިހަމަކުރި ރައީސަކަށް މަހަކު 50،000 ރުފިޔާ އަދި ދެ ދައުރު ފުރިހަމަކުރި ރައީސަކަށް 75،000 ރުފިޔާގެ މަގުން އިނާޔަތް ދެ އެވެ. މީގެ އިތުރުން ކުރީގެ ރައީސުންނަށް ދިރިއުޅޭނެ ތަނެއް ހަމަޖައްސަން އިތުރު 50،000 ރުފިޔާއެއް ދޭއިރު، އޮފީސް ހިންގުމުގެ ޚަރަދުގެ ގޮތުގައި 175،000 އެއްހާ ރުފިޔާ ދެ އެވެ.

- ކޮމެންޓް