ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ ނިމުމަކަށް ގެނައުމަށް އެމެރިކާ އިން ހުށަހަޅާފައިވާ ހުށަހެޅުންތަކާ މެދު ވަރަށް އަވަހަށް މަޝްވަރާ ކުރަަން ފެށޭނެ ކަމަށް، ޔުކްރެއިންގެ ރައީސް ވުލޮޑޮމިއަރ ޒެލެންސްކީ ވިދާޅުވެއްޖެ އެވެ.

ހުކުރު ދުވަހު ޤައުމާ މުޚާތަބު ކުރައްވައި ޒެލެންސްކީ ދެއްވި ބަޔާނެއްގައި ވިދާޅުވީ، ހަނގުރާމަ ނިންމުމުގެ ގޮތުން ބާއްވާ މަޝްވަރާ ތަކުގައި ޔުކްރެއިންގެ ސިފައިންގެ ބައެއް އިސް އޮފިޝަލުންނާއި، ފޮރިން މިނިސްޓްރީގެ އިސް އޮފިޝަލުން އަދި އިންޓެލިޖެންސް އިދާރާ ތަކުގެ އިސް އޮފިޝަލުން ވެސް ބައިވެރިވާނެ ކަމަށެވެ.

އެގޮތުން އެ މަޝްވަރާ ތަކުގެ މައިގަނޑު މަޤުސަދަކީ ގިނަ ދުވަސް ތަކަކަށް ދެމިގެންދާ ހަނގުރާމަ ނިންމުމަށް ހޯދޭނެ ގޮތްތަކާ ބެހޭ ގޮތުން މަޝްވަރާ ކުރުން ކަމަށް ވެސް ޒެލެންސްކީ ވިދާޅުވެފައިވެ އެވެ. 2022 ވަނަ އަހަރުގެ ފެބްރުވަރީ މަހު ފެށުނު މި ހަނގުރާމައިގައި މިހާތަނަށް ދެ ޤައުމަށް ވެސް ވަނީ ބޮޑެތި ގެއްލުން ތަކެއް ލިބިފަ އެވެ. މި ހަނގުރާމައިގެ ސަބަބުން އެތައް ހާސް ބަޔަކު މަރުވެފައިވާއިރު، ގެދޮރު ދޫކޮށް ދާން ޖެހުނު މީހުންގެ އަދަދު ވެސް ވަނީ މިލިއަނުން މައްޗަށް އަރައިފަ އެވެ.

ރަޝިޔާ-ޔުކްރެއިން ހަނގުރާމަ ނިމުމަކަށް ގެނައުމަށް އެންމެ ބޮޑަށް ބާރު އަޅަމުން އަންނަ ޤައުމަކީ އެމެރިކާ އެވެ. އެމެރިކާގެ ރިޔާސީ ދެ ވަނަ ދައުރަށް މިއަހަރުގެ ތެރޭގައި ޑޮނަލްޑް ޓްރަމްޕް ވަޑައިގެންނެވި ފަހުން، އޭނާ ގެންދަވަނީ ހަނގުރާމަ ނިންމުމަށް ދެ ޤައުމަށް ވެސް ބާރު އަޅުއްވަމުންނެވެ. ނަމަވެސް، ޓްރަމްޕް މަސައްކަތް ކުރައްވަނީ ރަޝިޔާ އަށް ފައިދާވާ ގޮތަށް ކަމަށާއި، އޭނާ ބޭނުންފުޅު ވަނީ ރަޝިޔާ އިން އެދޭ ގޮތަށް ކަންކަން ކުރުމަށް ކަމަށް ވެސް ބައެއް ފަރާތްތަކުން ވަނީ ސިފަ ކޮށްފަ އެވެ.

ފާއިތުވި އަހަރު ތަކުގައި ޔުކްރެއިން އަށް އެންމެ ބޮޑު އެހީތެރިކަމަކާއި އެއްބާރުލުމެއް ދީފައިވާ ޤައުމަކީ ވެސް އެމެރިކާ އެވެ. އެގޮތުން އެމެރިކާ އިން ވަނީ ޔުކްރެއިން އަށް އެތައް ބިލިއަން ޑޮލަރެއްގެ އެހީވެފަ އެވެ. އޭގެ ތެރޭގައި ސިފައިންގެ އެހީތެރިކަމާއި، އަސްކަރީ އެހީތެރިކަން އަދި އިޤްތިޞާދީ އެހީތެރިކަން ވެސް ހިމެނެ އެވެ. ނަމަވެސް، މިހާރު އެމެރިކާ އިން އަންނަނީ ސުލްޙަވެރި އެއްބަސްވުމެއް އެކުލަވާލައި، ހަނގުރާމަ ނިންމުމަށް ބާރު އަޅަމުންނެވެ.

މާހިރުން ފާހަގަ ކޮށްފައިވާ ގޮތުގައި ޒެލެންސްކީގެ މި ބަޔާނަކީ، ދެ ޤައުމުގެ ދެ މެދުގައި ސުލްޙަވެރިކަން ޤާއިމު ކުރުމަށް ކުރަމުން އަންނަ މަސައްކަތުގައި މުހިންމު ބަދަލެއް އަންނަ އުޅޭ ކަމުގެ އިޝާރާތެއް ކަމަށް ބެލެވެ އެވެ. ނަމަވެސް، މި މަޝްވަރާތައް ކުރިއަށް ދާނެ ތާރީޚެއް އަދި މަޝްވަރާ ތަކުގައި ހިނގާނެ ކަންކަމުގެ އެއްވެސް ތަފްސީލެއް ޒެލެންސްކީ ހާމަ ކުރައްވާފައި ނުވެ އެވެ.

ބައިނަލްއަޤުވާމީ މުޖުތަމައުން ވެސް އަންނަނީ ހަނގުރާމަ ހުއްޓާލައި، ދެ ޤައުމުގެ ދެ މެދުގައި ސުލްޙަވެރިކަން ޤާއިމު ކުރުމަށް ގޮވާލަމުންނެވެ. ޔޫރަޕުގެ ބާރު ތަކުން އަންނަނީ ޔުކްރެއިންގެ މަސްލަޙަތު ހިމާޔަތް ކުރަން ޖެހޭ ކަމަށް ގޮވާލައި، ރަޝިޔާ އިން ބޭނުންވާ ގޮތަށް ކަންކަން ނުވާނެ ކަމަށް ހާމަ ކުރަމުންނެވެ.