ލާމަރުކަޒީ ޤާނޫނަށް ބަދަލު ގެނެސް ހަގީގަތުގައި މިހާރު ސަރުކާރުން އުވާލީ "އަތޮޅުތައް"، ދެން އުވާލާނީ "ރަށްތައް" : ނިޔާޒް
ލާމަރުކަޒީ ޤާނޫނަށް ގެންނަ ބަދަލުތަކާއި މެދު ނުރުހުން ފާޅުކޮށް 100 އަށް ވުރެ ކައުންސިލަކުން ބަޔާން ނެރެފައިވޭ
ރައްޔިތުންގެ މަޖިލީހުގެ ލާމަރުކަޒީ ކޮމިޓީގެ ކުރީގެ މުގައްރިރު ހުޅުމާލެ ދާއިރާގެ ކުރީގެ މެމްބަރު އަލީ ނިޔާޒު
ލާމަރުކަޒީ ޤާނޫނަށް ބަދަލު ގެނެސްގެން ހަގީގަތުގައި މިހާރު ސަރުކާރުން އުވާލީ "އަތޮޅުތައް" ކަމަށާއި ދެން އުވާލާނީ "ރަށްތައް" ކަމަށް ރައްޔިތުންގެ މަޖިލީހުގެ ލާމަރުކަޒީ ކޮމިޓީގެ ކުރީގެ މުގައްރިރު ހުޅުމާލެ ދާއިރާގެ ކުރީގެ މެމްބަރު އަލީ ނިޔާޒު ވިދާޅުވެއްޖެ އެވެ.
ނިޔާޒް އެފަދައިން ވިދާޅުވީ ރާއްޖެޓީވީގެ ޓީވީ ޓޯކް ޕްރޮގްރާމްގައި ވާހަކަދައްކަވަމުންނެވެ.
ލޯކަލް ކައުންސިލަރުންގެ އަދަދު މަދުކުރަން އުޅެނީ ކޮން މަޤްސަދެއްގައިތޯ އޭނާ ވަނީ ސުވާލު އުފައްދަވާފަ އެވެ. އެއީ ރައްޔިތުން ބޭނުންވެގެން ގެންނަ ބަދަލުތަކެއް ކަމަށް ރައީސް ޑރ.މުހައްމަދު މުއިއްޒު ވިދާޅުވި ނަމަވެސް ހަގީގަތަކީ އެއީ ނޫން ކަމަށް ނިޔާޒް ވިދާޅުވި އެވެ. ނިޔާޒް ވަނީ ފަހަރަކު ބާރެއް ނަގަމުން ގޮސް މުޅި ލާމަރުކަޒީ ނިޒާމް ފުނޑާލާފައިވާ ކަމަށް ވިދާޅުވެފަ އެވެ.
ލާމަރުކަޒީ ޤާނޫނަށް ގެންނަ ބަދަލުތަކާއި މެދު ނުރުހުން ފާޅުކޮށް 100 އަށް ވުރެ ގިނަ ކައުންސިލަކުން ބަޔާން ނެރެފައިވާ އިރު އިސްވެ ބަޔާން ނެރެން ފެށީ ޕީއެންސީ ކައުންސިލުން ކަމަށް ނިޔާޒް ވިދާޅުވި އެވެ. އެހެންކަމުން ޕީއެންސީގެ ކައުންސިލަރުން ވެސް އެ ބަދަލާއި މެދު ނުރުހޭކަން އޭނާ ވަނީ ފާހަގަކުރައްވާފަ އެވެ.
"ކޮން މިންގަނޑަކަށް ބަލާފަތޯ އޭ. ކޮން ދިރާސާ އަކަށް ބަލާފަ ތޯ އޭ މިކަން މިކުރަނީ. ރައްޔިތުން ނުރުހޭ ކަމަށް ބުނަނީ ކީއްވެތޯ އޭ. ލާމަރުކަޒީ ނިޒާމަކީ ގުދުރަތީ ގޮތުން ރާއްޖެ އޮތް ގޮތުން ވެސް އެންމެ ރަނގަޅު ނިޒާމް އަޅުގަނޑުގެ ތަޖުރިބާގައި.
ލާމަރުކަޒީ ޤާނޫނު ފަދަ ޤާނޫނުތަކަށް ބަދަލުތައް ގެންނަ އިރު ރައްޔިތުންގެ ވޯޓެއް ނަގަންވާނެ ކަމަށް ޤާނޫނު އަސާސީގައި ލިޔެފައި އޮތަސް އެކަން ވެސް މި ސަރުކާރުން ބަދަލުކުރާނެ ކަމަށް ނިޔާޒް ވިދާޅުވި އެވެ.
ނަމަވެސް ޤާނޫނުއަސާސީ އިރުއިރުކޮޅާއި ބަދަލުކުރުމަކީ އެއީ މަޖިލީހުގެ މަގްސަދެއް ނޫން ކަމަށް ނިޔާޒް ވިދާޅުވި އެވެ. އެހެންކަމުން ކުރިއަށް އޮތްތަނުގައި މަޖިލީހުގެ މެމްބަރުންނަށް ވޯޓު ދޭ އިރު އެއްވެސް ބަޔަކަށް ބޭނުންހާ ގޮތަކަށް ޤާނޫނުއަސާސީ އާއި ކުޅެން ފުރުސަތު ނުލިބޭކަން ޔަޤީންކުރުން މުހިންމު ކަމަށް ނިޔާޒް ވަނީ ވިދާޅުވެފަ އެވެ.
ލޯކަލް ކައުންސިލްތަކުގެ އިންތިޚާބު ބޭއްވުމަށް އަހަރަކަށް ވެފައި ވަނިކޮށް، ކައުންސިލަރުންގެ އަދަދު މަދުކުރުމަށް ރައްޔިތުންގެ މަޖިލީހުން ފާސް ކުރީ ބުރާސްފަތި ދުވަހު އެވެ. އޭގެ ކުރިން ވެސް ލާމަރުކަޒީ ޤާނޫނަށް ގިނަ އިސްލާހުތަކެއް މި ވެރިކަމުގައި ގެނެސް، އެ ނިޒާމްގެ ބާރުތައް ވަނީ ނިގުޅައިގަނެފަ އެވެ.
