ރަޝިޔާ އިން ބުނީ ޔޫރަޕުން ހުށަހަޅާފައިވާ ސުލްޙައި ޕްލޭން ޤަބޫލު ނުކުރެވޭ ކަމަށް

ރަޝިޔާ އިން ޔުކްރެއިންއާ ދެކޮޅަށް ހިންގަމުން އަންނަ ހަނގުރާމަ ނިމުމަކަށް ގެނައުމަށް ޔޫރަޕުގެ ޤައުމު ތަކުން ހުށަހަޅާފައިވާ ސުލްޙައިގެ ޕްލޭން ޤަބޫލު ނުކުރެވޭ ކަމަށް ރަޝިޔާ އިން ބުނެފި އެވެ.

ރަޝިޔާގެ ރިޔާސީ ގަނޑުވަރު ކްރެމްލިން އިން ބުނެފައި ވަނީ، އެ ޕްލޭން އަކީ ރަޝިޔާ އަށް މަސައްކަތް ކުރަން އުނދަގޫ އަދި ޤަބޫލު ކުރަން ދަތި ޕްލޭނެއް ކަމަށެވެ.

މިދިޔަ ހަފުތާގެ ތެރޭގައި އެމެރިކާ އިން ހުށަހެޅި ޕްލޭންއާ ގުޅިގެން، ޔުކްރެއިން އާއި ޔޫރަަޕުގެ ޤައުމު ތަކުން ވެސް ވަނީ ކަންބޮޑުވުން ފާޅު ކޮށްފަ އެވެ. އެގޮތުން ނޭޓޯ އާއި، ސަރަހައްދީ ކަން ކަންކަން އަދި ސުލްޙައިގެ އެއްބަސްވުމަކަށް އަމަލު ކުރާނެ ގޮތުގެ ތަރުތީބާ ބެހޭ ގޮތުން ރަޝިޔާ އިން ކުރާ ޝަރުތު ތަކަށް އެމެރިކާ އިން ޤަބޫލުވާ ކަމަށް ބެލެވޭ ކަމުގައި ބުނެފައިވެ އެވެ.

ރޮއިޓާސް އަށް ވަނީ ޔޫރަޕުގެ ޕްލޭންގެ ކޮޕީއެއް ވެސް ލިބިފަ އެވެ. އެ ޕްލޭންގައި ދައްކާ ގޮތުން ނޭޓޯ އާއި ސަރަހައްދީ ކަންކަމާ ގުޅޭ މުހިންމު ނުކުތާ ތަކުގެ މާނަ އާއި، މުހިންމުކަން ޔޫރަޕުގެ ޕްލޭން އިން ވަނީ ވަރަށް ބޮޑަށް ބަދަލު ކޮށްފަ އެވެ.

ރަޝިޔާގެ ވެރި ރަށް މޮސްކޯގައި އޮތް ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ރަޝިޔާގެ ބޭރުގެ ސިޔާސަތުގެ އެޑްވައިޒަރު ޔޫރީ އުޝަކޮވް ވިދާޅުވީ، ފުރަތަމަ ނަޒަރުން ބަލާއިރު ޔޫރަޕުގެ ޕްލޭން ޤަބޫލު ނުކުރެވޭ ކަމަށެވެ. އަދި އެ ޕްލޭންއާ އެއްގޮތަށް ރަޝިޔާ އަށް މަސައްކަތް ނުކުރެވޭނެ ކަމަށް ވެސް އޭނާ ވިދާޅުވެފައިވެ އެވެ.

މީގެ އިތުރުން ރަޝިޔާގެ ރައީސް ވުލަޑިމިއަރ ޕުޓިން ހުކުރު ދުވަހު ވިދާޅުވީ، ޔުކްރެއިންގެ ސުލްޙަ އަށް އެމެރިކާ އިން ހުށަހެޅި ހުށަހެޅުންތައް އެއީ ހައްލެއް ހޯދުމުގެ އަސާސެއް ކަމުގައި ވެދާނެ ކަމަށެވެ. ނަމަވެސް، ޔުކްރެއިން އިން އެ ޕްލޭން ޤަބޫލު ނުކުރާ ނަމަ، ރަޝިޔާގެ ސިފައިން އިތުރަށް ކުރިއަށް ދާނެ ކަމަށް ވެސް ޕުޓިން ވަނީ ވިދާޅުވެފަ އެވެ.

އެމެރިކާގެ ޕްލޭންއާ ގުޅޭ ގޮތުން ވާހަކަ ދައްކަވަމުން އުޝަކޮވް އިތުރަށް ވިދާޅުވެފައި ވަނީ، ހުރިހާ ނުކުތާ ތަކަށް އެއްބަސް ނުވެވުނު ނަމަވެސް، އެމެރިކާ އިން ހުށަހަޅާފައިވާ ޕްލޭންގެ ގިނަ ކަންތައްތަކަށް ރަޝިޔާ އިން ޤަބޫލު ވެދާނެ ކަމަށް ލަފާ ކުރެވޭ ކަމަށެވެ. އަދި ބައެއް ކަންކަމުގައި އިތުރު ތަފްސީލް އާއި، މަޝްވަރާ ބޭނުންވާނެ ކަމަށް ވެސް އޭނާ ވިދާޅުވެފައިވެ އެވެ.

ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ އަކީ، ދެ ވަނަ ބޮޑު ހަނގުރާމަ އަށް ފަހު ޔޫރަޕް ގައި ހިނގަމުން އަންނަ އެންމެ ބޮޑު ހަނގުރާމަ އެވެ. މި ހަނގުރާމަ އަށް ދެ އަހަރަށް ވުރެ ގިނަ ދުވަސްވެފައިވާއިރު، ހަނގުރާމަ ހުއްޓުމަކަށް ކުރަމުން އަންނަ މަސަައްކަތް ކާމިޔާބުވާ ގޮތެއް ނުވެ އެވެ. މި ހަނގުރާމައިގައި އެތައް ހާސް ބަޔަކު މަރުވެފައިވާއިރު، އެތައް މިލިއަން މީހުންނެއް ވަނީ ގެދޮރު ދޫކޮށް ހިޖުރަ ކުރަން ޖެހިފަ އެވެ.

ހަނގުރާމަ ނިމުމަކަށް ގެނައުމަށް ކުރަމުން އަންނަ މަޝްވަރާ ތަކުގައި އެންމެ ބޮޑު ގޮންޖެހުން ތަކަކީ ނޭޓޯ ގައި ޔުކްރެއިން އިން ބައިވެރިވުމާއި، ރަޝިޔާ އިން ކޮންޓްރޯލް ކުރާ ޔުކްރެއިންގެ ސަރަހައްދުތަކާއި، ސުލްހައިގެ އެއްބަސްވުމުގައި ހިމެނޭ ތަރުތީބުގެ މައްސަލަ ތަކެވެ. މި ކަންކަމުގައި ޔޫރަޕުގެ ޤައުމުތަކާއި އެމެރިކާގެ ވިސްނުން ތަކުގައި ތަފާތު ތަކެއް ހުރުމުން، މި މަޝްވަރާތައް އިތުރަށް އުނދަގޫވެފައިވެ އެވެ.