"އުފެދުމުގައި ވެސް ވައްކަން، ދެން ވެސް އޮތީ ވައްކަން، ކުރިއަށް އޮތީ ވެސް ވައްކަން"

ރާއްޖެ ދުނިޔެ ކުޅިވަރު ވިޔަފާރި-އިގްތިސާދު ސިއްހަތު ރިޕޯޓު ލައިފް ސްޓައިލް ތަފާތު ޚަބަރު ވާހަކަ ފޮޓޯ

ކ. މާލެ

24 ނޮވެންބަރ 2025 | ހޯމަ 13:36

ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ

ރައްޔިތުންގެ މަޖިލިސް

"އުފެދުމުގައި ވެސް ވައްކަން، ދެން ވެސް އޮތީ ވައްކަން، ކުރިއަށް އޮތީ ވެސް ވައްކަން"

މި ސަރުކާރުން ކަރަންޓާ ފެނުގެ އަގު ބޮޑު ނުކުރާ ކަމަށް ބުނާއިރު ބިލުތައް އަންނަނީ ބޮޑު ކޮށް ކަމަށް

ޝާމާ ޝުއައިބް

2,136

މި ސަރުކާރު އުފެދުނީ ވެސް ވައްކަމުން ކަމަށާ ދެންވެސް އަދި ކުރިއަށް އޮތީ ވެސް ވައްކަން ކަމަށް ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ވިދާޅުވެއްޖެ އެވެ.

ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާގައި ބަޖެޓް ކޮމިޓީ ރިޕޯޓަށް ބަހުސް ކުރައްވަމުން ޣަފޫރު ވިދާޅުވީ މި ސަރުކާރުން ކަރަންޓާ ފެނުގެ އަގު ބޮޑު ނުކުރާ ކަމަށެވެ. ނަމަވެސް ބިލުތައް އަންނަ އިރު އަންނަނީ ބޮޑެތި ބިލުތަކެއް ކަމަށާ އޮޅުން އަރާ ހިސާބަކީ އެއީ ކަމަށެވެ.

އަޅުގަނޑުމެން އެންމެނަށް ވެސް އެނގޭ ކަރަންޓާ ފެނުގެ އަގު ބޮޑު ނުކުރާ ކަން. އެހެން ނަމަވެސް ބިލު އަންނަނީ ބޮޑުކޮށް. އެއީ މި އޮޅުން އަރާ ހިސާބަކީ. އަގެއް ބޮޑެއް ނުކުރޭ، އަނެއްހެން ރޭޓެއް ބޮޑެއް ނުކުރޭ. އެކަމު އިންތިހާެއަށް ބޮޑެތި ބިލުތައް ފޮނުވަނީ، މިކަން ހުއްޓުވަން އެބަ ޖެހޭ. މި ފެންނަނީ މަކަރާ ހީލަތް ހެދުމުގަ އިންތިހާ،

ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ

މެންބަރު ވިދާޅުވީ މި ހިނގާ 2025 ވަނަ އަހަރަކީ ބޯހިޔާވަހިކަމުގެ އަހަރު ކަމަށެވެ. ނަމަވެސް މިހާތަނަށް އައި އިރު ފެށުނު ބޯހިޔާވަހިކަމުގެ އެންމެ މަޝްރޫއެއް ވެސް ނެތް ކަމަށާ ބޭއްވި އެންމެ ގާގަނޑެއް ވެސް ނެތް ކަމަށް ޣަފޫރު ވިދާޅުވި އެވެ.

ޣަފޫރު ވިދާޅުވީ އަންނަ އަހަރަކީ ސިއްހީ ދާއިރާގެ ބަޖެޓެއް ކަމަށް ބުނި ނަމަވެސް ސިއްހީ އަހަރު ދާނެ ގޮތް ވެސް މިހާރު ރައްޔިތުންނަށް އެނގޭނެ ކަމަށެވެ.

މި ހިނގަނީ ބޯހިޔާވހަިކަމުގެ އަހަރު. ރަނގަޅު ވާރޭ ނުވެހޭތީ ބޯހިޔާވަހިކަން ލިބޭ ކަންނޭންގެ. ބިމު ކޮޅެއްގެ ހިޔާވަހިކަމުގެ ދަށުގަ ރައްޔިތަކަށް ބޯހިޔާވަހިކަމެއް ނުލިބޭ. ދި މި އަންނަނީ ސިއްހީ ނިޒާމުގެ އަހަރު. އަންނަ އަހަރަކީ ސިއްހީ ނިޒާމު ރަނގަޅު ކުރަން އޮތް އަހަރު. ބަލި ނުވެއްޖެޔާ އިންޝާﷲ ރަނގަޅު. އެގޮތުން ސިއްހީ ނިޒާމު ރަނގަޅު ވެގެން ދާނީ. ކުރެވޭ މަސައްކަތަކުން ރައްޔިތުންނަށް ލިބޭނެ ފައިދާ އަކުން ރަނގަޅުވާނެ ސިއްހީ ނިޒާމެއް ފެންނާކަށް ނެތް. ހުރިހާ ކަމެއް ހުރީ ގޯސް ކޮށް،

ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ

މި ސަރުކާރުގައި ރަނގަޅަށް ހިނގާ ހަމަ އެއްކަމެއް ވެސް ނެތް ކަމަށް މެންބަރު ވިދާޅުވި އެވެ. ދައުލަތުގެ މުއައްސަސާއެއް ހުރިއްޔާ އެތަނެއް ހުރީ ފޫ ވެއްޓިފަ ކަމަށް ޣަފޫރު ވިދާޅުވި އެވެ.

އެގޮތުން ކަސްޓަމްސް އާއި، އެމްޕީއެލް އަދި އެމްއޭސީއެލް އޮތީ ފޫ ވެއްޓިފައި ކަމަށް މެންބަރު ވިދާޅުވި އެވެ. މިއަދު ވެސް ދައްކަމުން މިދަނީ ޕޮލިސް ސްޓޭޝަނެއްގައި ހުރި ސިނގިރޭޓް ކޮޅާ، އެއާޕޯޓުގައި ހުރި ޑޮލަރު ކޮޅު ވަގަށް ނަގާ، އެ ވިއްކާލާ ވާހަކަ ކަމަށް މެންބަރު ވިދާޅުވި އެވެ. ޣަފޫރު ވިދާޅުވީ މިއީ މިއަދު މި ގައުމުގެ ހާލަތު ކަމަށާ ގައުމެއްގެ ހުރިހާ ސިފައެއް މިތަނުން ގެއްލެމުން ދާ ކަމަށެވެ.

އިތުރަށް ވާހަކަދައްކަވަމުން މެންބަރު ވިދާޅުވީ ވައްކަން ކުރަން ވެސް ތިބެނީ އެކަން ކުރަން ނޭނގޭ މީހުން ކަމަށެވެ. ވައްކަން ކުރަން ބައިތިއްބާފައި ތިބީ އަދި އެކަން ކުރުވަނީ ކަން ކުރަން ނުވެސް އެނގޭ މީހުން ލައްވާ ކަމަށާ އޭގެ ސަބަބުން މުޅި ދައުލަތަށް އެކަމުގެ އުނދަގޫ ވަމުންދާ ކަމަށް މެންބަރު ވިދާޅުވި އެވެ.

ވައްކަން ކުރަން ވެސް ދައުލަތުގައި މި ތިބީ ވައްކަން ކުރަން ވެސް ނުދަންނަ މީހުން. ވައްކަމަކީ ވެސް އޭގެ ޕްރޮފެޝަން އާ އެއްކޮށް އެކަން ކުރުމުގެ ގާބިލުކަން ހުރެގެން ކުރާ ކަމެއް.... ވައްކަމަކީ ލާރި ހޯދައިގެން އޭގެ ނަފާގައި ކުރަން ޖެހޭ ކަމެއް. އެކަން ވެސް އެގޮތަށް ވެސް ކުރަން ނޭނގި ކަންކަން ދަންޏާ ދެން ދައުލަތަށް ހުރިހާ ބާރެއް ބޮޑުވެގެން ދާނީ. އެހެންވީމާ ވައްކަން ވެސް ކުރަން ނޭނގޭ ބަޔަކު ލައްވާ ވައްކަން ކުރަންވީމާ ގައުމަށް ވާނުވާ އެއް ނޭނގި ކަންކަން ހިނގަމުން މި ދަނީ،

ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ

ދެން މިވަރުން ވެސް އެންމެން ވީ އަތް ޖަހާ، ސަރުކާރަށް ސަނާ ކިޔަން ތޯ މެންބަރު ސުވާލު ކުރެއްވި އެވެ. އަދި ރައީސް ބޭނުންވާ ގޮތަށް ސަނާ ކިޔަސް ގައުމުގެ ހާލަތު ރަނގަޅު ނުވާނެ ކަމަށް ޣަފޫރު ވިދާޅުވި އެވެ.

ޣަފޫރު ވިދާޅުވީ އަންނަ އަހަރުގެ ބަޖެޓާ އެކު މި ސަރުކާރަށް 174 ބިލިއަން ރުފިޔާ ދެވިއްޖެ ކަމަށެވެ. ނަމަވެސް މަސައްކަތެއް ކުރެވުނު އެންމެ ތަނެއް ވެސް ނެތް ކަމަށް ވިދާޅުވި އެވެ. ވާހަކަ ދެކެވޭ ކަމަށާ ބިންގާ އެޅި ނަމަވެސް ވާ ކަމެއް ނެތް ކަމަށް މެންބަރު ވިދާޅުވި އެވެ.

މި ސަރުކާރަށް ވާ ހަމައެކަނި ކަމަކީ ރޯމާ ދުވާލު ވައްކަމުގެ ބޮޑެތި ސިލްސިލާތައް ހިންގުން ކަމަށް ވިދާޅުވެ ޣަފޫރު ވިދާޅުވީ މި ސަރުކާރަކީ އުފެދުމުގައި ވެސް ވައްކަމުގެ ސަރުކާރެއް ކަމަށެވެ. ދެން ވެސް އޮތީ ވައްކަން ކަމަށާ ކުރިއަށް ވެސް އޮތީ ވައްކަން ކަމަށެވެ.