ފުލުހުންގެ ސީނިއާ އިންވެސްޓިގޭޝަން އޮފިސަރަކު ސިކުނޑީގެ މައްސަލައެއްގައި ހޮސްޕިޓަލްގައި އެޑްމިޓްކޮށްފި
12 މާރިޗު 2018 | ހޯމަ 04:15ކުއްލި ނުރައްކަލުގެ ހާލަތުގައި ހައްޔަރުކޮށްފައިވާ ބައެއް ބޭފުޅުންގެ މައްސަލަ ތަހްގީގުކުރައްވަމުން ގެންދެވީ މި އޮފިސަރު
އައިޖީއެމްއެޗް: ފަރުވާ ދެމުންދާ ފުލުހުންގެ ސީނިއާ އިންވެސްޓިގޭޝަން އޮފިސަރު އޮތީ އައިސޮލޭޝަން ބައިގައި
ކުއްލި ނުރައްކަލުގެ ހާލަތުގެ ދަށުން ހައްޔަރުކޮށްފައިވާ ސިޔާސީ ބައެއް ބޭފުޅުންގެ މައްސަލަތައް ތަހްގީގުކުރަމުން ގެންދަވާ ސީނިއާ އިންވެސްޓިގޭޝަން އޮފިސަރެއް ސިކުނޑީގެ މައްސަލައެއްގައި އައިޖީއެމްއެޗްގައި އެޑްމިޓްކޮށް ފަރުވާ ދޭން ފަށައިފި އެވެ.
އައިޖީއެމްއެޗްގެ އައިސޮލޭޝަންގެ ބައިގައި އާދީއްތަ ދުވަހުގެ ރޭ އެޑްމިޓްކޮށް ފަރުވާ ދެމުންދާ ފުލުހުންގެ އޮފިސަރަކީ، ރާއްޖެއެމްވީއަށް އެނގިފައިވާ ގޮތުގައި، ކުރީގެ ޑިފެންސް މިނިސްޓަރު މުހައްމަދު ނާޒިމްގެ އެޕާޓްމެންޓުން ފިސްތޯލަ ފެނުނު ކަމަށް ބުނާ މައްސަލަ ވެސް ތަހްގީގު ކުރެއްވި އޮފިސަރެވެ.
އޭނާގެ އާއިލާގެ މެމްބަރަކު ވިދާޅުވި ގޮތުގައި އޭނާއަށް ފަރުވާ ދެމުން ގެންދަނީ ނަފުސާނީ ބަލި މީހުންނަށް ފަރުވާ ދިނުމަށް ހާއްސަކޮށްފައިވާ ބައިގައި އެޑްމިޓްކޮށްގެންނެވެ.
"ޑޮކްޓަރުން ވިދާޅުވީ މެންޓަލް ޑިސްއޯޑަރ އެކޭ. ތިން ރެއާއި ތިން ދުވަސް ވެއްޖެ ނުނިދިގެން އުޅޭތާ ވެސް،" ނަން ނުޖެހުމަށް ޝަރުތުކޮށް ވާހަކަ ދެއްކި އާއިލާގެ މެމްބަރަކު ބުންޏެވެ.
އެޑްމިޓްކޮށްގެން ފަރުވާ ދެމުން އަންނަ ފުލުހުންގެ އޮފިސަރުގެ ހާލު ރަނގަޅު ނޫން ކަމަށް ވެސް އާއިލާގެ މެމްބަރު ބުންޏެވެ.
މިކަމާ ގުޅޭ ގޮތުން ފުލުހުން ބަހެއް އަދި އައިޖީއެމްއެޗްގެ ބަހެއް ވެސް ނުލިބެ އެވެ.
