ދައުލަތުގެ މުވައްޒަފުންގެ މުސާރަ އެއްހަމަ ކުރުމަށްޓަކާ ޢަމަލުކުރަން ފެއްޓި ޕޭ ފްރޭމްވަރކްގެ ދަށުން، އެ ފްރޭމްވާރކްގެ ނަތީޖާ ގެއްލޭ ގޮތަށް ބައެއް މުވައްޒަފުންގެ މުސާރަ އަށް ބަދަލު އައިސްފައިވާކަން ހާމަވެއްޖެ އެވެ.

ދައުލަތުގެ ޕޭ ފްރޭމްވާރކަށް ބަދަލު ގެނެސްފައި ވަނީ މި ހިނގާ ނޮވެމްބަރ މަހުން ފެށިގެން އަމަލުކުރާ ގޮތަށެވެ. ޕޭ ފްރޭމްވާރކް ގެ އޮނިގަނޑަށް ގެނެސްފައިވާ 8 ވަނަ އިސްލާހުގެ ތެރެއިން 3 ދާއިރާއަކުން މުސާރަ އެއް ހަމަ ކުރެވޭނެ އެވެ. އޭގެ ތެރޭގައި ހިމެނެނީ ސިވިލް ސަރވިސް މުވައްޒަފުންނާއި ކައުންސިލްތަކުގެ މުވައްޒަފުންގެ އިތުރުން ޖުޑިޝަރީ ދާއިރާ އެވެ.

އެގޮތުން ބައެއް ތަންތަނުގައި އާ ބަދަލަށް އަމަލުކުރަން ފެށުމުން ބައެއް އިދާރީ މުވައްޒަފުންނަށް މުސާރަ އާއި އިނާޔަތުގެ ގޮތުގައި ލިބޭ ނިސްބަތަށް ވުރެ އެ ތަންތަނުގައި ތިބި މަސައްކަތު މީހުންގެ މުސާރަ ބޮޑުވާ ކަމަށް ވަނީ މައުލޫމާތު ލިބިފަ އެވެ. ނަން ހާމަ ނުކުރުމަށް ޝަރުތުކޮށް ރާއްޖެއެމްވީ އާއި ވާހަކަދެއްކި މީހަކު ބުނީ މިހާރު ގެނައި ބަދަލުތައް ގެނެސްފައި ވަނީ ހައިރާކީ އަށް ބެލުމަކާއި ނުލާ ކަމަށާއި މިއީ ކަމަކަށް ކަމެއް ކުރާ އުސޫލުން ސަރުކާރުން ނިންމި ނިންމުމެއް ކަމަށެވެ.

"ހައިރާކީ އަށް ބެލުމެއް ނެތި ބަދަލުތައް ގެނައުމުން އިދާރީ ބައެއް މުވައްޒަފުންނަށް ވުރެ މަސައްކަތު މީހުންގެ މުސާރަ ބޮޑު. މަސައްކަތު މީހުންނަށް މުސާރަ ބޮޑު ވުމުން މައްސަލަ އެއް ނެތް. އެހެންނަމަވެސް އިދާރީ މަސައްކަތް ކުރާ މީހާ އާއި މެދު ނާއިންސާފުން ކަންކަން ވާގޮތަށް އޮތްކަން ރޭކާ ނުލުން އެއީ ވަރަށް ދެރަ ވަރު ކަމެއް." އޭނާ ވަނީ ބުނެފަ އެވެ.

މި ބަދަލުގެ ސަބަބުން ރަނގަޅު ތައުލީމީ ސަނަދުތަކާއި އެކު މަސައްކަތް ކުރަމުންދާ މީހުންނަށް ވުރެ ބޮޑަށް ތައުލީމީ ފެންވަރާއި ތަޖުރިބާ ވެސް ދަށް މީހުންނަށް މުސާރަ ލިބޭ ގޮތަށް މަގުފަހި ވުމަކީ ސަރުކާރުން ގެނެސްފައިވާ ބަދަލުތައް ގެނައުމުގައި ބަލަންވާ މިންވަރަށް ނުބަލާކަން ހާމަވާ ކަމެއް ކަމަށް މި ނޫހާއި ވާހަކަ ދެއްކި ފަރާތްތަކުން ވަނީ ބުނެފަ އެވެ.

ޕޭ ފްރޭމްވާރކަށް ބަދަލު ގެނެސްފައިވާ އިދާރާ އެއްގައި މަސައްކަތް ކުރާ އިތުރު މުވައްޒަފަކު ބުނި ގޮތުގައި ވަޒީފާގެ ޒިންމާގެ ގޮތުން މަސައްކަތުގެ ސްކޯޕް ބޮޑު މުވައްޒަފުންނާއި އަޅާ ކިޔާނަމަ، އެއަށް ވުރެ ކުދި ޒިންމާތައް އުފުލާ މީހުންނަށް ބޮޑު މުސާރަ ލިބޭ ހާލަތުތައް ވެސް އާ ފްރޭމްވޯރކް އާއި އެކި ދިމާވެފައިވާ ކަމަށެވެ. އަދި ކަންބޮޑުވުންތައް ފާޅުކުރި ނަމަވެސް އެކަމަށް މާ ބޮޑު އިޖާބަ އެއް ނުދޭ ކަމަށް އެ މުވައްޒަފު ވަނީ ބުނެފަ އެވެ.

ރާއްޖެ އެމްވީ އާއި ވާހަކަދެއްކި އިތުރު މީހަކު ވަނީ އިތުރު ގަޑީގެ ފައިސާ ލިބޭ އުސޫލަށް ބަދަލު ގެނައީ ވެސް ވަކި ބަޔަކަށް އެކަނި މަންފާ ވާ ގޮތަށް ކަަމަށް ފާހަގަކޮށް އެކަމާއި މެދު ކަންބޮޑުވުން ފާޅުކޮށްފަ އެވެ. ޕޭ ފްރޭމްވާރކް އަށް އިސްލާހު ގެނެސްފައި ވަނީ މުވައްޒަފުންނަށް ލިބޭ އިތުރު ގަޑީގެ ފައިސާ ކުޑަވާ ގޮތަށް ކަމަށް ވުމުން ގިނަ މުވައްޒަފުން ދަނީ އެކަމާއި މެދު ކަންބޮޑުވުން ފާޅުކުރަމުންނެވެ.

އިތުރު ގަޑީގެ ފައިސާ ދެމުން އަންނަ ގޮތަށް ބަދަލު ގެނައުމަށް ޕޭ ފްރޭމްވަރކްގެ މިންގަނޑުތަކަށް ބަދަލު ގެނެސްފައި ވަނީ 1 ނޮވެމްބަރުން ފެށިގެން ސިވިލް ސަރވިސް މުވައްޒަފުންގެ މުސާރަ ބޮޑުކުރަން ނިންމާ މުސާރަތައް އިއުލާންކުރުމުގެ 4 ދުވަސް ކުރިންނެވެ. އެއާއި އެކު ރަސްމީ ބަންދު ނޫން ދުވަސްތަކުގެ މަސައްކަތު ވަގުތުގައި މުވައްޒަފުންގެ އަމިއްލަ ކަންކަމުގައި އޮފީހުން ބޭރުގައި އުޅޭ ވަގުތު އުނިކުރުމަށްފަހު އަށް ގަޑިއިރު ހަމަވުމުން ނޫނީ އިތުރުގަޑީގެ އިނާޔަތް ނުލިބޭ ގޮތަށް ދައުލަތުގެ ޕޭ ފްރޭމްވާރކްގެ މިންގަނޑުތައް ވަނީ ބަދަލުކޮށްފަ އެވެ.