ދުރު މަންޒިލަށް ހަމަލާ ދެވޭ ހަތިޔާރު ފޯރުކޮށްދިނުމަށް ޒެލެންސްކީ ގޮވާލައްވައިފި

ރަޝިޔާ އިން ޔުކްރެއިންއާ ދެކޮޅަށް ހިންގަމުން އަންނަ ހަނގުރާމައިގައި، ދުރު މަންޒިލަށް ހަމަލާ ދެވޭ ހަތިޔާރު ޔުކްރެއިން އަށް ފޯރުކޮށްދިނުމަށް އެ ޤައުމުގެ ރައީސް ވުލޮޑިމިއަރ ޒެލެންސްކީ ގޮވާލައްވައިފި އެވެ.

ޔުކްރެއިންއާ އެކުވެރި ޤައުމުތައް ކަމަށްވާ "ކޯލިޝަން އޮފް ދަ ވިލިން"އާ އެކު ބޭއްވި މަޝްވަރާގައި ޒެލެންސްކީ ގޮވާލައްވާފައި ވަނީ، ދުރު މަންޒިލަށް ހަމަލާ ދެވޭ ޓޮމަހޯކް މިސައިލް ޔުކްރެއިން އަށް ފޯރުކޮށްދިނުމަށެވެ.

އިނގިރޭސިވިލާތުގެ ލަންޑަން ގައި ކުރިއަށް ދިޔަ މަޝްވަރާ ގައި ވާހަކަ ދައްކަވަމުން ޒެލެންސްކީ ވިދާޅުވެފައި ވަނީ، ޔުކްރެއިން އަށް ޓޮމަހޯކް މިސައިލްތައް ލިބިދާނެ ކަމުގެ ބިރު ރަޝިޔާގެ ރައީސް ވުލަޑިމިއަރ ޕުޓިން އަށް އިޙުސާސްވުމާ އެކު، މަޝްވަރާތަކަށް ތައްޔާރުވެފައިވާ ކަމަށް އިއުލާން ކުރި ކަމަށެވެ.

މިހާރު ވެސް ޔުކްރެއިން އިން ދަނީ އެ ޤައުމުގެ އަމިއްލަ ހަތިޔާރުތައް ބޭނުން ކޮށްގެން ރަޝިޔާގެ އެތެރޭގައި ހުރި ހަކަތައިގެ މަރުކަޒުތަކާއި، އަސްކަރީ މަރުކަޒުތަކަށް ހަމަލާ ދެމުންނެވެ. އެހެން ނަމަވެސް، ރަޝިޔާ އަށް އިތުރަށް ބާރު އެޅުމަށްޓަކައި އެމެރިކާގެ ޓޮމަހޯކް މިސައިލް ހޯދުމަށް ޔުކްރެއިން އިން ވަރަށް ބޮޑަށް މަސައްކަތް ކުރަމުން ދިޔަ ނަމަވެސް، މިހާތަނަށް އެ މިސައިލްތައް ލިބިފައި ނުވެ އެވެ.

ޤައުމު ތަކުގެ ލީޑަރުންނާ އެކު އޮތް މަޝްވަރާގައި ޒެލެންސްކީ މިފަދައިން ގޮވާލައްވާފައިވާއިރު، މިއީ ރަޝިޔާއާ ދެކޮޅަށް ހަނގުރާމައިގައި އިތުރު ކުރިއެރުން ތަކެއް ހޯދުމަށް ކުރަމުންދާ މަސައްކަތުގެ ތެރެއިން އެއް މަސައްކަތް ކަމުގައި ފާހަގަ ކުރެވެ އެވެ. އަދި ދުރު މަންޒިލަށް ހަމަލާ ދެވޭ ހަތިޔާރުތައް ލިބިއްޖެ ނަމަ، ރަޝިޔާއާ އެކު ސުލްޙަވެރި ޙައްލެއް ހޯދުމަަށް މަގު ފަހިވެގެން ދާނެ ކަމަށް ވެސް ޔުކްރެއިން އިން ދެކެ އެވެ.

ޒެލެންސްކީ މިފަދައިން ގޮވާލައްވާފައިވާއިރު، ދާދި ފަހުން އޭނާ ވަނީ އެމެރިކާގެ ރައީސް ޑޮނަަލްޑް ޓްރަމްޕްއާ ވެސް ބައްދަލު ކުރައްވައިފަ އެވެ. އެމެރިކާގެ ރިޔާސީ ގަނޑުވަރު، ވައިޓް ހައުސްގައި އޮތް އެ ބައްދަލުވުމުގައި ވެސް ޒެލެންސްކީ ވަނީ ޓޮމަހޯކް މިސައިލް ހޯދުމަށް އެމެރިކާގެ ކިބައިން އެދިފަ އެވެ. ނަމަވެސް، އެ ބައްދަލުވުމުގެ މައުލޫމާތު އިނގޭ ބައެއް މަސްދަރު ތަކުން ބުނެފައި ވަނީ ޓްރަމްޕް ހުންނެވީ ޔުކްރެއިން އަށް ހަތިޔާރު ފޯރޮކޮށްދިނުމުގެ ވިސްނުމުގައެއް ނޫނެވެ.

މީގެ އިތުރުންް، މަސްދަރު ތަކުން ބުނެފައި ވަނީ އެ ބައްދަލުވުމުގައި ވެސް ޓްރަމްޕް ޒެލެންސްކީ އަށް ބާރު އަޅުއްވާފައި ވަނީ ރަޝިޔާ އިން އެދިފައިވާ ގޮތަށް ޔުކްރެއިންގެ ބިމުން ބައެއް ދޫކޮށްލުމަަށެވެ. އަދި ރަޝިޔާއާ އެކު ސުލްޙައިގެ އެއްބަސްވުމަކަށް އަންނަން ޖެހޭ ކަމަށާއި، އެހެން ނޫން ނަމަ ގަދަ އަލިފާނުގައި ޔުކްރެއިން އަނދާނެ ކަމަށް ވެސް ޓްރަމްޕް ވިދާޅުވެފައިވާ ކަމަށް ބުނެފައިވެ އެވެ.

ރަޝިޔާ އިން އެދިފައި ވަނީ ޔުކްރެއިންގެ ބިމުން ބައެއް އެ ޤައުމަށް ދޫކޮށްލުމަށެވެ. ނަމަވެސް، ތަކުރާރުކޮށް ޒެލެންސްކީ ވިދާޅުވަމުން ގެންދަވަނީ ޔުކްރެއިން އިން އެފަދަ ހުށަހެޅުކަަށް އެއްބަސް ނުވާނެ ކަމަށެވެ. އަދި ހަނގުރާމަ ހުއްޓާލައި، ސުލްޙަވެރިވާން ޖެހޭނީ އެއްވެސް ޝަރުތެއް ނެތި ކަމަށް ވެސް ޒެލެންސްކީ އަންނަނީ ވިދާޅުވަމުންނެވެ.