ސްލޮވޭކިއާގެ ބޮޑު ވަޒީރު ރޮބާޓް ފިކޯ އަވަހާރަކޮށްލަން ހަމަލާ ދިން މީހާގެ މައްޗަށް 21 އަހަރު ދުވަހުގެ ޖަލު ޙުކުމެއް އިއްވައިފި އެވެ.

ސްލޮވޭކިއާގެ ކޯޓަކުން އެ މައްސަލައިގެ ޙުކުމް އިއްވާފައި ވަނީ އަންގާރަ ދުވަހު އެވެ. އެ މައްސަލައިގައި ޙުކުމް ކޮށްފައި ވަނީ އުމުރުން 72 އަހަރުގެ ޖުރާޖް ސިންޓުލާގެ މައްޗަށެވެ. އޭނާގެ މައްޗަށް ސާބިތު ވެފައި ވަނީ ޓެރަރިޒަމްގެ އަމަލެއް ހިންގުމުގެ ކުށެވެ.

ބޮޑު ވަޒީރު ފިކޯ އަށް އަމާޒުކޮށް ހަމަލާ ދީފައި ވަނީ މިދިޔަ އަހަރު އެވެ. އެގޮތުން 2024 ވަނަ އަހަރުގެ މެއި މަހުގެ 15 ވަނަ ދުވަހު އެ ހަމަލާ ދީފައި ވަނީ، ސްލޮވޭކިއާގެ ވެރި ރަށް ބްރަޓިސްލާވާ 140 ކިލޯ މީޓަރު އުތުރުގައި އޮންނަ ހެންޑްލޯވާ ރަށުގައި ސަރުކާރުގެ ބައްދަލުވެމެއްގައި ބައިވެރިވެ ވަޑައިގެންނެވުމަށް ފަހު، އާންމުންނާ ބައްދަލު ކުރައްވަމުން ދަނިކޮށެވެ.

ސްލޮވޭކިއާގެ ބާންސްކާ ބިސްޓްރިކާގައި ހުންނަ ސްޕެޝަލައިޒްޑް ކްރިމިނަލް ކޯޓުުން މި ޙުކުމް އިއްވާފައިވާއިރު، ސިންޓުލާ އަށް ކޯޓުގެ ޙުކުމް އިސްތިއުނާފު ކުރުމުގެ ފުރުސަތު އޮތް ކަމަށް ވަނީ ފާހަގަކޮށްފަ އެވެ.

ބޮޑު ވަޒީރަށް އަމާޒުކޮށް ސިންޓުލާ ހަމަލާ ދިނުމާ އެކު، ހަމަ އެ ވަގުތު ވަނީ އޭނާ ހައްޔަރު ކޮށްފަ އެވެ. ހައްޔަރު ކުރުމަށް ފަހު އޭނާގެ ތަހުގީގު ފަށާފައިވާއިރު، ތަހުގީގުގައި އޭނާ ބުނެފައި ވަނީ އޭނާ އަކީ ޓެރަރިސްޓެއް ނޫން ކަމަށެވެ.

ހަމަލާގައި ބޮޑު ވަޒީރު ފިކޯގެ ބަނޑަށް ވަނީ ވަޒަން އަރައިފަ އެވެ. އެ ހަމަލާއާ ގުޅިގެން ބޮޑު ވަޒީރު ވަނީ ފަސް ގަޑިއިރުގެ އޮޕަރޭޝަނެއް ކޮށްފަ އެވެ. އޭގެ ދެ ދުވަސް ފަހުން، ދެ ގަޑިއިރުގެ އިތުރު އޮޕަރޭޝަނެއް ވެސް ކުރަން ޖެހުނެވެ. އޭގެ ފަހުން މިހާރު ބޮޑު ވަޒީރުގެ ޙާލު ކޮޅު ރަނގަޅު ކަމަށް ބުނެފައިވެ އެވެ. ނަމަވެސް އެ ހާދިސާގެ ފަހުން ފިކޯ ވަނީ ގިނަ ދުވަސް ތަކެއް ވަންދެން އަސާ ގެ އެހީގައި އުޅުއްވައިފަ އެވެ.

ސިންޓުލާ ބުނެފައިވާ ގޮތުގައި، ބޮޑު ވަޒީރަށް ހަމަލާ ދިނުމަށް އޭނާ އެ އަމަލު ހިންގަން ޖެހުނީ ސަރުކާރުގެ ސިޔާސަތުތަކާ ހިތްހަމަ ނުޖެހޭތީ އެވެ. ތަހުގީގަށް ދީފައިވާ ބަޔާނުގައި އޭނާ ބުނެފައި ވަނީ ކޮރަޕްޝަނާ ދެކޮޅަށް މަސައްކަތް ކުރާ ޚާއްސަ ޕްރޮސެކިއުޝަން އޮފީސް އުވާލުމާއި، ޔުކްރެއިން އަށް ދެމުން އައި އަސްކަރީ އެހީ ހުއްޓާލުމާއި އަދި ސަގާފަތާ މެދު ސަރުކާރުން ގެންގުޅޭ ސިޔާސަތާ މެދު ހިތްހަމަ ނުޖެހޭ ކަމަށެވެ.

ސްލޮވޭކިއާގެ ބޮޑު ވަޒީރު ކަމުގެ ހަތަރު ވަނަ ދައުރެއް މިހާރު ފުރުއްވަމުން ގެންދަވާ ފިކޯ އަކީ އެ ޤައުމުގައި ވަރަށް ޚިޔާލު ތަފާތު ލީޑަރެކެވެ. އެންމެ ފަހުން ބޮޑު ވަޒީރު ކަމުގެ މަގާމަށް އޭނާ ވަޑައިގެންނެވީ 2023 ވަނަ އަހަރު އޮތް އިންތިޚާބު ކާމިޔާބު ކުރައްވައިގެންނެވެ.

ފިކޯ އަކީ ރަޝިޔާ އަށް ވަރަށް ބޮޑަށް ތާއީދު ކުރައްވާ ފަރާތެއްގެ ގޮތުގައި ފާހަގަވެފައިވާ ލީޑަރެކެވެ. އަދި އޭނާ އަކީ އެމެރިކާއާ ދެކޮޅަށް ސިޔާސަތުތައް ގެންގުޅޭ ލީޑަރެކެވެ. މި ސަބަބުތަކާ ހުރެ، އޭނާގެ ސިޔާސަތުތަކާއި، އޭނާގެ ސަރުކާާތާ ދެކޮޅަށް ވެރި ރަށް ބްރަޓިސްލާވްގައި ގިނަ އިހުތިޖާޖު ތަކެއް ކޮށްފައިވެ އެވެ.