މެމްބަރު އިބްރާހިމް ދީދީގެ ވިސްނުމަކީ ސަވާހިލީ ގައި ބަނގުރާ ވިއްކޭނެ ގޮތެއް ހެދުން ކަމަށް އޭނާ ވިދާޅުވެއްޖެ

އައްޑޫ ސިޓީ ފޭދޫ ކައިރީގައި އޮންނަ، ސަވާހިލި، ފޭދޫގެ އިހުތިސާސުން ވަކިކޮށް، އެތަނުގައި ޓޫރިސްޓުންނަށް ރާ ވިއްކުމުގެ އިންތިޒާމު ހަމަޖެއްސުމަކީ ފޭދޫ ދެކުނު ދާއިރާގެ ޕީއެންސީ މެންބަރު، އިބްރާހިމް ދީދީ (އައިބީ) ގެންގުޅުއްވާ ވިސްނުމެއް ކަމަށް އޭނާ ވިދާޅުވެއްޖެ އެވެ.

ފޭދޫގައި ވަކި ކައުންސިލެއް ހެދުމަށް ފޭދޫ ދެކުނު ދާއިރާގެ ޕީއެންސީ މެންބަރު، އިބްރާހިމް ދީދީ ކުރައްވަމުން ގެންދަވާ ކެމްޕެއިންގެ ތެރެއިން ސަވާހިލި، ފޭދޫގެ އިހުތިސާސުން ވަކިކޮށް، އެތަނުގައި ޓޫރިސްޓުންނަށް ރާ ވިއްކުމުގެ އިންތިޒާމު ހަމަޖެއްސުމަކީ އޭނާގެ ވިސްނުމެއްކަން ހާމަވީ މިކަމާ ބެހޭ ގޮތުން އޭނާ ދައްކަވާފައިވާ ވާހަކައިންނެވެ. އެވާހަކަތައް މިހާރު ސޯޝަލް މީޑިއާގައި ދައުރުވަމުން އަންނަ އޯޑިއޯ އަކުން ވަނީ ފަޅާ އަރާފައެވެ.

މި އޯޑިއޯގައި އައިބީ ވިދާޅުވެފައިވަނީ، ޔޫރަޕްގެ ފަތުރުވެރިންގެ އުފާވެރި ދިރިއުޅުމަށް ރާ ފަދަ ވަސީލަތްތައް މުހިންމުކަމަށާއި، އެގޮތުން ސަވާހިލި ޕްރައިވެޓް ތަނެއްގެ ގޮތުގައި ތަރައްގީ ކުރުމަކީ އެކަށީގެންވާ ކަމެއް ކަމަށެވެ.

ގެސްޓުން ދާކަށް ނުޖެހޭނެ އެހާ ދުރަށް ރާ ނުބޮވިގެން. އާންމުކޮށް އަހަރުމެން ގަބޫލުކުރާ ގޮތުގައި ޔޫރަޕް މީހުންނަށް ބޭނުންވާނެ. ދެން އަހަރުމެން ދެން ބުނާނީ އެމީހުން އަންނާނެއޭ އެއްޗެއް ނުލިބުނަސް. ރަނގަޅު އެއްޗެއް ނުލިބުނަސް އެމީހުން އަންނާނެ. އެކަމަކު އެމީހުންގެ އުފާވެރި ދިރިއުޅުމަކީ އެމީހުން އުޅޭއިރު މި ވަސީލަތްތައް

ފޭދޫ ދެކުނު ދާއިރާގެ ޕީއެންސީ މެންބަރު، އިބްރާހިމް ދީދީ (އައިބީ)

އައިބީ ފާހަގަކުރެއްވި ގޮތުގައި، ގާނޫނީ ގޮތުން މީހުން ދިރިއުޅޭ ރަށްރަށުގައި ރާ ވިއްކުން މަނާވެފައިވީ ނަމަވެސް، ސަވާހިލި އަކީ މިވަގުތު ވަކިން އޮތް ރަށަކަށްވާތީ، އެތަނުގައި މި ޚިދުމަތް ފޯރުކޮށްދިނުމަކީ ކުރެވިދާނެ ކަމެކެވެ. އަދި ސަވާހިލި އާއި ކަފަތަޅާ ގުޅުވާލައިގެން، ބީޗް ހަދައި ރިސޯޓެއްގެ ގޮތުގައިވެސް ތަރައްގީކުރެވިދާނެ ކަމަށް އޭނާ ވިދާޅުވިއެވެ.

އެހެންވީމަ ގާނޫނު އޮންނަ ގޮތުން މީހުން އުޅޭ ތަންތަނުގައި ރަލެއް ނުވިއްކޭނެ. އެގޮތަށް ބަލާއިރު ސާވިހިލިއަކީ ރަށާ ގުޅިފައި އޮތް ތަނެއް ނޫން. ވަކިން އޮތްތަނެއް. ހުޅުދޫ ކޮޅުގައި ހެރެތެރެ ވެސް އޮންނަނީތާ. ހަމަ ބްރިޖަކުން ދެވޭތާ.

ފޭދޫ ދެކުނު ދާއިރާގެ ޕީއެންސީ މެންބަރު، އިބްރާހިމް ދީދީ (އައިބީ)

ފޭދޫ ޓޫރިޒަމް ޒޯނަށް އަންނަ ފަތުރުވެރިންނަށް ޚިދުމަތް ދިނުމަށްޓަކައި، ސަވާހިލި ސާވިސް އައިލެންޑެއްގެ ގޮތުގައި ތަރައްގީ ކުރުމަށް ސަރުކާރުން އުސޫލީ ހުއްދަ ދީފައިވީ ނަމަވެސް، މިހާތަނަށް ރަސްމީ ހުއްދައެއް ދީފައެއް ނުވެއެވެ. މިވަގުތު އެރަށުގައި ބީޗެއްވެސް ނެތްކަން ފާހަގަކުރެވެއެވެ.