މާއެނބޫދޫގެ ނައިބުތުއްތުގެ ޒިޔާރަތް ހިމެނޭ ސަރަހައްދު ވީރާނާ ވަނީ، މިނިސްޓަރު ވިދާޅުވަނީ އާސާރީ ސަރަހައްދުތައް ހިމާޔަތް ކުރަނީ އެރަށެއްގެ ކައުންސިލަކުން މިނިސްޓްރީ އަށް އެންގުމުން ކަމަށް
އާސާރީ ތަންތަން ތަރައްގީކުރުމަށް ކައުންސިލުތަކުން އިސްވެ އެންސީސީއެޗްއަށް ލިޔުންތައް ފޮނުވަންޖެހޭ
ރައްޔިތުން މަޖިލީހުގެ ޖަލްސާގައި ހެރިޓޭޖް މިނިސްޓަރު އާދަމް ނަސީރު ވާހަކަދައްކަވަނީ
އަތޮޅުތެރޭގެ ރަށްރަށުގައި ހުރި އާސާރީ ތަންތަނާއި، ސަރަހައްދުތައް ހިމާޔަތްކޮށް ތަރައްގީ ކުރުމުގެ މަސައްކަތް ކުރާނީ އެރަށުގެ ކައުންސިލަކުން އިސްނަގައިގެން، އެކަން މިނިސްޓްރީއަށް ހުށަހެޅުމުން ކަަމަށް ހެރިޓޭޖް މިނިސްޓަރު އާދަމް ނަސީރު ވިދާޅުވެއްޖެ އެވެ.
ހޯމަ ދުވަހު ކުރިއަށް ގެންދިޔަ ރައްޔިތުން މަޖިލީހުގެ ޖަލްސާގައި، ކުޑަހުވަދޫ ދާއިރާގެ މެންބަރު ހުސެއިން ހަމީދު ވަނީ، ދ.މާއެނބޫދޫގައިވާ ނައިބުތުއްތުގެ ޒިޔާރަތް ހިމެނޭ ސަރަހައްދަކީ އާސާރީ ސަރަހައްދެއްގެ ގޮތުގައި ކަނޑައަޅާފައިވާ ސަރަހައްދެއްކަން ފާހަގަކުރައްވާފައެވެ. ނަމަވެސް އެތަން ވަނީ ވަރަށް ބޮޑަށް ވީރާނާވެ ހަލާކުވެގެންދާ ކަމަށާއި، އެސަރަހައްދު ހިމާޔަތްކޮށް ރައްކާތެރި ކުރުމުގެ މަސައްކަތް ކުރާނީ ކޮންއިރަކުންތޯ ނުވަތަ އެސަރަހައްދު ތަރައްގީ ކުރުމުގެ އެއްވެސް ޕްލޭނެއް އެބައޮތްތޯ ސުވާލު ކުރެއްވިއެވެ.
މިސުވާލުތަކާއި ގުޅިގެން މިނިސްޓަރު އާދަމް ނަސީރު ވިދާޅުވީ ރަށްރަށުގައި ހުރި މި ބާވަތުގެ ސަރަހައްދުތައް ތަރައްގީ ކުރުމާއި، ހިމާޔަތް ކުރުމުގެ މަސައްކަތް ކުރަނީ އެރަށްރަށުގެ ކައުންސިލްތަކުން އިސްވެ އެކަން މިނިސްޓްރީގެ ސަމާލު ކަމަށް ގެނައުމުން ކަމަށެވެ. އަދި ނެޝަނަލް ސެންޓާ ފޯ ކަލްޗަރަލް ހެރިޓޭޖް (އެންސީސީއެޗް)އަށް ލިޔުންތައް ފޮނުވުމުން މަސައްކަތް ކުރިއަށްދާނެ ކަމަށް މިނިސްޓަރު އާދަމް ނަސީރު ވިދާޅުވިއެވެ.
އާދެ ހަގީގަތުގައި ވެސް ވަރަށް ތާރީހީ ތަނެއް އެއީ އެނގޭތޯ. ތާރީހީ ހަގީގަތްތަކަކާ ގުޅިފައިވާ ތަނެއް. ހަމަ އަޅުގަނޑުކުރިން ތިބާވަތުގެ ސުވާލަށް އެރުވި ޖަވާބު މިފަހަރު ވެސް ދަންނަވާލަން އޮތީ. އެއީ ރަށްރަށުގައި ހުންނަ މި ބަވާތުގެ ސަރުކާރުގެ ނުވަތަ ދައުލަތުގެ ބެލެހެއްޓުމުގެ ދަށުގައި ހުންނަ ތަންތަން މަރާމާތު ކުރުމުގައި އެތަންތަނުގެ ކައުންސިލްތަކުން ކަމާބެހޭ ފަރާތްތަކުން ވުޒާރާގެ މަރުކަޒަށް އެންސީސީއެޗްއަށް ގުޅިގެން ލިޔުންތައް ފޮނުވައިގެން ކުރިއަށް ގެންދާ ގެންދިއުމެކޭ އޮންނަނީ. ސީދާ ވަކިތަނެއްގެ ވާހަކަ ވިދާޅުވީމަ އަޅުގަނޑު ޖެހޭނީ ބަލާލަން. އެކަމަކު އެއޮންނަ އުސޫލުން ކުރިއަށްދާނެ. އެބޭފުޅުންގެ ހުށަހެޅުންތައް އައިމަ އެއާ ހަވާލުވެ ކުރިއަށްދާނެ.ހެރިޓޭޖް މިނިސްޓަރު އާދަމް ނަސީރު
މީގެ އިތުރުން ރައްޔިތުން މަޖިލީހުގައި ތޮއްޑޫ ދާއިރާގެ މެންބަރު ހުސެއިން ސަމީރު ވަނީ އއ.އުކުޅަހުގައި ހުރި ހުކުރު މިސްކިތް ވީރާނާ ވަމުންދާތީ އެކަމުގެ ކަންބޮޑުވުން ވެސް ފާޅު ކުރައްވާފައެވެ. އަދި މެންބަރު ސަމީރު ވަނީ އއ. އުކުޅަސް ހިމެނޭ ގޮތަށް ތޮއްޑޫ، ރަސްދޫގައި އާސާރީ ސަރަހައްދުތައް ތަރައްގީ ކުރުމުގެ އަމަލީ އެއްވެސް މަސައްކަތެއް މިހާތަނަށް ފެނިފައިނުވާތީ އެކަމާ ގުޅޭގޮތުން ސުވާލު ކުރައްވާފައެވެ.
ފަތުރުވެރިކަން ވަރަށް ބޮޑަށް ފުޅާވެގެންދާއިރު، އެސަރަހައްދުތައް ތަރައްގީ ކުރުމަކީ އިތުރު އާމްދަނީ ރަށަށް ލިބޭނެ ކަމެއްގެ ގޮތުގައި މެންބަރު ސަމީރު ފާހަގަކުރެއްވިއެވެ.
ނަމަވެސް މި ސުވާލުތަކަށް ވެސް މިނިސްޓަރު އާދަމް ނަސީރު ސީދާ ޖަވާބެއް ދެއްވާފައިނުވެއެވެ.
ހުރިހާ ރަށްރަށެއްގައި ހުރި ހުރިހާ ތަންތަނަކީ ވެސް މުހިންމު ތަންތަން. އަދި އެތަންތަނުގެ ނިސްބަތުން އެތަންތަން ރަނގަޅު ކުރުމަށް ކުރަންޖެހޭ ހުރިހާ މަސައްކަތްތަކެއް އަޅުގަނޑުމެން މިދަނީ ކުރަމުން. ކަމާބެހޭ އެތަންތަނުގެ ރަސްމީ ފަރާތްތަކާއި އަޅުގަނޑުމެން ބައްދަލުކޮށް ވާހަކަ ދައްކާ ބައެއް ފަހަރު އެބޭފުޅުން މިކޮޅަށް ވަޑައިގަންނަވައިގެން އަޅުގަނޑުމެން އެކޮޅަށް ގޮސްގެން އިރުޝާދުތައް ދެމުން އެމަސައްކަތް ހިނގަމުން އެބަދޭ. އެއީ މިކަން މި ހިނގާ ގޮތަކީ. ދެން ވަކި ތަރުތީބަކުން ވަކި ގޮތަކަށް އެހާލަތަކަށް އެންމެ އިސްކަން ދެވޭ ތަނަކަށް މިކަހަލަ ބަދަލުތަކެއް ގެނެވޭތޯ އެބަ މަސައްކަތް ކުރަން. އެހެންވީމަ އެތަރުތީބުން މިދަނީހެރިޓޭޖް މިނިސްޓަރު އާދަމް ނަސީރު
އާސާރީ ސަރަހައްދުތައް ބަލަހައްޓައި، އެތަންތަނުން ރަށަށް އާމްދަނީ ލިބޭގޮތް ހޯދައިދިނުމަކީ މިސަރުކާރުގެ ސިޔާސަތެކެވެ. އަދި އެކަމަށް ޚާއްސަ މިނިސްޓްރީ އެއް އުފެއްދާފައިވީ ނަމަވެސް މިސަރުކާރުގެ މިހާތަނަށް ރަށްރަށުގައި ހުރި އާސާރީ ބިނާތަކާއި، ސަރަހައްދުތައް ހިމާޔަތް ކުރުމަށް އަމަލީ މަސައްކަތެއް ކޮށްފައިނުވާތާނގައި އެތަންތަން ދަނީ އިތުރަށް ވީރާނާ ވަމުންނެވެ.
