ބާރުގަދަ ވަޒީރުންނާ "ފައިޓް" ދެވޭނެ މެންބަރެއް އިމްތިޔާޒާއި ސުލޫކު ކޮމިޓީގައި ނެތް - މެމްބަރު އަސްލަމް
މައްސަލަ ހައްލު ކުރަންޖެހޭނީ އެންމެ މަތިން ފެށިގެން
މިނިސްޓަރ އާދަމް ނަސީރު އަދި ބިލެތްދޫ ދާއިރާގެ މެންބަރު އަސްލަމް
ސަރުކާރުގެ ކެބިނެޓުގައި ތިއްބެވި ބާރުގަދަ ވަޒީރުންނާ "ފައިޓް" ދެވޭނެ މެމްބަރެއް އިމްތިޔާޒާއި ސުލޫކު ކޮމިޓީގައި ނެތް ކަމަށް ބިލެތްދޫ ދާއިރާގެ މެމްބަރު އަހުމަދު އަސްލަމް ވިދާޅުވެއްޖެއެވެ.
ހެރިޓޭޖް މިނިސްޓަރު އާދަމް ނަސީރު މަޖިލީހަށް ހާޒިރުވެ ވަޑައިގެން ދޮގު މައުލޫމާތު ދެއްވާފައިވާތީ މަޖިލިހުގެ އިމްތިޔާޒް އާއި ސުލޫކު ކޮމިޓީއަށް ހުށަހެޅިފައިވާ މައްސަލައިގައި ވާހަކަ ދައްކަވަމުން މެމްބަރު އަސްލަމް ވިދާޅުވީ ފާއިތުވެދިޔަ އަހަރެއްހާ ދުވަހުގެ ތެރޭގައި އަމަލުކުރި ގޮތަށް ބަލާއިރުގައި މާ އަޖައިބުވާ ކަންތައްތަކެއް ނެތް ކަމަށެވެ.
މެމްބަރު ވިދާޅުވީ ލިޔެކިޔުމަށް ބަލާއިރު ހުށަހެޅުއްވި ހުށަހެޅުއްވުމަށް ބަލާއިރު މާޒީގެ ތަޖުރިބާއަށް ބަލާފައި ކުރިއަށް ދެވޭނެ ކަމަށް ގަބޫލެއް ނުކުރައްވާ ކަމަށެވެ. މެމްބަރު ވިދާޅުވީ މި [ދޮގު ހެދުން] އެއީ އެންމެން ވެސް މަޖިލީހަށް އައިސް ކުރާ ކަންތައް ކަމަށެވެ. އަދި މިއީ ހަމައެކަނި ހެރިޓޭޖް މިނިސްޓަރުގެ ކަމެއް އެކަންޏެއް ނޫން ކަމަށެވެ.
ދެން ޕީއެންސީގެ ވާހަކަ ދެއްކީމައި. ހަގީގަތަށް ހިނގާ އަޅުގަނޑުމެންދާން. މިއެއް ނުއެއް ބެލޭނެ. ޕީއެންސީގެ މެޖޯރިޓީއެއް މިތާ އޮތީ. ޕީއެންސީގެ ސަރުކާރެއް ޕީއެންސީގެ ވަޒީރެއް. ޒިންމާދާރެއް ނުވެސް ކުރެވޭނެ. މިތާ ތިބެ ކޮންމެ ވާހަކައެއް ދެއްކިޔަސް އަޅުގަނޑު ވޯޓެއް ނުދޭނަން. އެއީ ވަރަށް ސާފުކަމެއް.ބިލެތްދޫ ދާއިރާގެ މެމްބަރު އަހުމަދު އަސްލަމް
އަސްލަމް ވިދާޅުވީ މި މައްސަލައިގައި މާ އަޖައިބުވާނެ ކަމެއް ނެތް ކަމަށެވެ. އަދި ޒިންމާދާރު ކުރުވަން ޖެހޭނީ އެންމެ މަތިން ކަމަށެވެ.
މިއީ ދެން އަނެއްހެން ހާޒިރީގައި ސޮއިކޮށްލާފައި އެލަވަންސް ނަގަން ރަނގަޅު. އެހެން ނޫނިއްޔާ ބޭކާރު މަސައްކަތެއް މިއީ. މިތަނަށް އަންނާނެ ބަދަލެއްވެސް ނޯންނާނެ. އަޒާން ހުށަހެޅުއްވި ގޮތަށް އަޅުގަނޑުމެންނަށް ސިޓީއެއްވެސް ފޮނުވިދާނެ. މިތަނަށް ގެންނަންވެސް ގެނެވިދާނެ. ހަމަ އެކައްޗެކޭ ކިޔާނީ. އެއަކުން އަންނާނެ އެއްވެސް ނަތީޖާއެއް ނޯންނާނެ. އެއް އަހަރު އަޅުގަނޑުމެން ތަޖުރިބާ މިކުރީ ހަމަ މި ލެވެލްގައި. މިއީ ހަގީގަތް. މީގައި ކަމެއް ސާފުކުރިޔަސް، ކަމެއް ރަނގަޅު ކުރިޔަސް، އަޅުގަނޑުމެން ފަށަން ޖެހޭ ހިސާބުން ފަށައިގެން ނޫނީ ރަނގަޅެއް ނުވާނެ. އެންމެ ފުރަތަމަ މި މަޖިލިސް، ދެން އެންމެ މައްޗަށް ތިބި މީހުން.ބިލެތްދޫ ދާއިރާގެ މެމްބަރު އަހުމަދު އަސްލަމް
މެންބަރު އަސްލަމް ވިދާޅުވީ ހެރިޓޭޖް މިނިސްޓްރީ އަކީ އޮންނަންޖެހޭ ތަނެއްވެސް ނޫން ކަމަށެވެ. އެއީ ގައުމަށް ބޭނުންވާ މިނިސްޓްރީއެއްވެސް ނޫން ކަމަށެވެ. މެންބަރު އަސްލަމް ވިދާޅުވީ ބާރުގަދަ ވަޒީރުންނާއި ކަމެއް ނިންމާލަން "ފައިޓް" ދެވޭނެ މެންބަރެއް ސުލޫކު ކޮމިޓީގައި ނެތްކަމަށެވެ.
މެމްބަރު އަސްލަމް ވިދާޅުވީ ކޮމިޓީގައި ތިބީ އެއަށްވުރެ މާ "ކުދި" މެންބަރުން ކަމަށެވެ. ހަށިގަނޑުން ބޮޑުވިޔަސް މެމްބަރުންގެ ސައިޒު ކުޑަކަމަށް އަސްލަމް ވިދާޅުވިއެވެ.
