މި ހިނގާ އޮކްޓޯބަރ މަހުގެ 3 ވަނަ ދުވަހު އިދިކޮޅު މޯލްޑިވިއަން ޑިމޮކްރެޓިކް ޕާޓީ، އެމްޑީޕީ އިން މާލޭގައި ބޭއްވި ބޮޑު މުޒާހަރާ އިން ހައްޔަރު ކުރި މީހުންގެ ބަންދުގެ މުއްދަތާމެދު ގޮތެއް ނިންމުމަށް އާދިއްތަ ދުވަހު، އެ މީހުން ކޯޓަށް ހާޒިރުކުރުމަށް ނިންމައިފިއެވެ.

އެމްޑީޕީގެ ލީގަލް ޑިރެކްޓަރ އަހްމަދު މައުރޫފް ވިދާޅުވި ގޮތުގައި އެ މީހުންގެ ބަންދާއި މެދު ގޮތެއް ނިންމުމަށް އާދިއްތަ ދުވަހު ކްރިމިނަލް ކޯޓަށް ހާޒިރު ކުރާނެ ކަން ފުލުހުން ވަނީ މިހާރު އަންގާފައެވެ. އަދި އެ މީހުން ކޯޓަށް ހާޒިރުކުރުމަށް ހަމަޖެހިފައި ވަނީ އާދިއްތަ ދުވަހު ހެނދުނު 10:00 ގައެވެ. އެކަން ފުލުހުން އަންގާފައި ވަނީ ހޮނިހިރު ދުވަހު ހަވީރުގެ ވަގުތެއްގައެވެ.

3 އޮކްޓޯބަރގެ ބޮޑު މުޒާހަރާގައި ހައްޔަރުކޮށްފައިވާ ފަރާތްތަކުގެ ތެރެއިން ދޫނިދޫ ޖަލުގައި ބަންދުކޮށްފައިވާ މީހުންނަކީ ކުރީގެ މަޖްލިސް މެމްބަރުން ކަމަށްވާ ޔައުގޫބް އަބްދުﷲ، ޔާސިރު އަބްދުއްލަތީފް، މާފުށި ކައުންސިލްގެ ރައީސް ހަސަން ސޮލާހް، އަލީ ޖުމާން، އަޒީމް އަލީ އަދި ހަސަން ޝާކިރު އެވެ.

ކުރީގައި 15 ދުވަހަށް އެ މީހުން ބަންދުގައި ބޭތިއްބުމަށް ނިންމާފައިވާ ނިންމުން ބަދަލުކޮށްދިނުމަށް ހައްޔަރު ކުރި ފަރާތްތަކުގެ ޤާނޫނީ ޓީމުން އެދިފައިވެއެވެ. މުޒާހަރާ އިން ހައްޔަރު ކުރި މީހުން ބަންދުގަ އިތުރަށް ބަހައްޓަންޖެހޭ ފަދަ ހާލަތެއް ނެތްކަމަށް އެމްޑީޕީގެ ޤާނޫނީ ޓީޟުން ވެސް ވަނީ ބުނެފައެވެ.

ނަމަވެސް 15 އޮކްޓޯބަރގައި ކޯޓުން ނިންމާފައި ވަނީ އެ އެ މީހުން ބަންދުގައި ބޭތިއްބުމަށް ކުރީގެ އަމުރުތައް ބަދަލު ކުރަންޖެހޭ ކަމަށް ނުވަތަ މުރާޖާކުރަން ޖެހޭފަދަ ސަބަބެއް ނެތްކަމަށެވެ. އަދި ކޯޓުން މި ނިންމުން ނިންމާފައިވަނީ އާމުކޮށް ކަންކުރާ ގޮތައް ނޫންކަމަށް ވެސް މައުރޫފް ފާހަގަކުރެއްވިއެވެ.

އެއްވެސް ކުށެއްގެ ދައުވާއެއް އުފުލުމެއް ނެތި 6 މީހުން ޖަލުގައި ބަންދުކޮށްގެން ގެންގުޅޭތާ ހޮނިހިރު ދުވަހަށް 15 ދުވަސް ހަމަވާނެއެވެ.

މި މުޒާހަރާ އިން ހައްޔަރު ކުރި މީހުން ހައްޔަރު ކުރީ ސިޔާސީ ބޭނުމަކަށް، ޤާނޫނާއި ޚިލާފަށް ކަމަށް އެ ފަރާތްތަކުގެ ޤާނޫނީ ވަކީލުންނާއި އާއްމުން ދަނީ ބުނަމުންނެވެ. މީގެ އިތުރުން މުޒާހާރާގެ ހައްޔަރީން ދޫކޮށްލުމަށް ގޮވާލާ މާލޭގެ އިތުރުން، ހައްޔަރުކުރެވުނު ފަރާތްތައް ނިސްބަތްވާ ރަށްރަށުގައި ވެސް އެމްޑިޕީ އިން އިސްނަގައިގެން ތަފާތު ހަރަކާތްތައް ހިންގަމުންދެއެވެ.

ހަމައެހެންމެ ދައުލަތުގެ ބަންދުގައި ތިބި ލޫޓުވައިފި މުޒާހަރާއިން ހައްޔަރުކުރި މީހުންނަށް އިހުމާލުވަމުންދާ މައްސަލަ ސަރުކާރުގެ ސަމާލުކަމަށް ގެނައުމަށް ކުއްލި މައްސަލަ ހުށަހެޅުމަށް އެމްޑީޕީން މަސައްކަތް ކުރި ނަމަވެސް އެ ފުރުސަތު ވެސް ޕީއެންސީގެ މެޖޯރިޓީ އޮތް މިހާރުގެ މަޖިލީހުން ދީފަ އެއް ނުވެއެވެ.