ބޮޑެތި ބަލިތައް ހުންނަ މީހުންނަށް ހައްޖު ވިސާ ނުދޭން ނިންމައިފި
ބޮޑެތި ބަލިތަކުގެ ސަބަބުން ވިސާ ނުލިބޭ ފަރާތްތަކަށް އެ ފުރުސަތު އެހެން މީހަކަށް ބަދަލުކުރުމުގެ އިޚްތިޔާރު ލިބިގެންދާނެ
ހައްޖު ކޯޕަރޭޝަންގެ އެމްޑީ މުހައްމަދު ޝަކީލް
ފުރާނައަށް ނުރައްކާވާފަދަ ބޮޑެތި ބަލިތައް ހުންނަ މީހުންނަށް ހައްޖު ވިސާ ދޫނުކުރުމަށް ސަޢުދީ ސަރުކާރުން ނިންމައިފިކަމަށް، ދިވެހި ޙައްޖު ކޯޕަރޭޝަނުގެ މެނޭޖިން ޑިރެކްޓަރު މުޙައްމަދު ޝަކީލް ވިދާޅުވެއްޖެއެވެ.
އަންނަ އަހަރުން ފެށިގެން ތަންފީޒުކުރަން ނިންމާފައިވާ މި ބަދަލާ ގުޅޭގޮތުން ދައުލަތުގެ މީޑިއާގައި ވާހަކަދައްކަވަމުން ޝަކީލް ވިދާޅުވީ ހިތުގެ ބޮޑެތި ބަލިތަކާއި، ކިޑްނީގެ ބޮޑެތި ބަލިތަކާއި، ނާރުގެ ބަލިތަކާއި، ޑިމެންޝާ ނުވަތަ ހަނދާންނެތޭ ބަލި ފަދަ ނުރައްކާތެރި ބަލިތައް ހުންނަ ފަރާތްތަކަށް ހައްޖު ވިސާ ދޫނުކުރުމަށް ސައުދީ ސަރުކާރުން ވަނީ ނިންމާފައެވެ.
މިހެން ދެންނެވި ނަމަވެސް ބައްޔެއް އަދި ހުރިނަމަވެސް ވިސާ އިޝޫ ނުކުރާނެއެކޭ ނޫން. އޭގެ ބޮޑު ކުޑަމިނަށް ބައްލަވާނެ އެބޭފުޅުން [ސައުދީގެ ޙައްޖު މިނިސްޓްރީ]. އެހެންވީމަ ހައްދަވަންޖެހޭ ޓެސްޓުތަކެއް ހައްދަވައި، އެ ބޭފުޅެއްގެ ސިއްޙީ ހާލަތު ހުރި ގޮތް ހާމަވީމަ އޭގެ އެއްޗެއް ދަންނަވާލަން އެނގޭނީ. މިސާލަކަށް އާދައިގެ ހިތުގެ މައްސަލައެއް ހުރުމަކުން ނޫނީ ކިޑްނީގެ ކުޑަކުޑަ މައްސަލައެއް ހުރުމަކުން މީގަ އަދި މައްސަލަތަކެއް ނާންނާނެޙައްޖު ކޯޕަރޭޝަންގެ މެނޭޖިން ޑިރެކްޓަރު މުޙައްމަދު ޝަކީލް
މި ބަދަލާ ގުޅިގެން، ހައްޖަށް ދިއުމުގެ ފުރުސަތު ލިބޭ ފަރާތްތަކުން ދުރާލާ މެޑިކަލް ޓެސްޓުތައް ހަދަންޖެހޭނެއެވެ. އަދި މި ޓެސްޓުތައް ޙައްޖު ކޯޕަރޭޝަނުގެ މެޑިކަލް ޓީމުން ބަލައި، އިތުރު ޓެސްޓުތަކެއް ހަދަންޖެހޭނަމަ އެކަން އެ ފަރާތްތަކަށް އަންގާނެ ކަމަށް ޝަކީލް ވަނީ ފާހަގަކުރައްވާފައެވެ. އަދި ވިސާ ލިބޭކަން ނުވަތަ ނުލިބޭކަން އެނގޭނީ އެ ރިޕޯޓު ސައުދީގެ ޙައްޖު މިނިސްޓްރީއާ ހިއްސާ ކުރުމުންކަމަށް ވެސް ޝަކީލު ވިދާޅުވިއެވެ.
އެހެންނަމަވެސް، ބޮޑެތި ބަލިތަކުގެ ސަބަބުން ވިސާ ނުލިބޭ ފަރާތްތަކަށް އެ ފުރުސަތު އެހެން މީހަކަށް ބަދަލުކުރުމުގެ އިޚްތިޔާރު ލިބިގެންދާނެ ކަމަށް ޝަކީލް ވިދާޅުވިއެވެ.
