ލޫޓުވައިފި މުޒާހަރާ އިން ބަންދުކޮށް 6 މީހުން ޖަލުގައި ގެންގުޅޭތާ ހޮނިހިރު ދުވަހަށް 15 ދުވަސް
ކުށެއްގެ ތުހުމަތުގައި ދައުވާ އެއް އުފުލުމެއް ނެތި 6 މީހުން ޖަލުގައި ބަންދުކޮށްގެން ތިބުމާއެކު އެކަމަށް އިހުތިޖާޖު ކުރުމުގެ ގޮތުން ބައެއް މީހުން ބަނޑުހައިހޫނު ކަމުގެ ހަޅުތާލެއް ކުރި
ސޮލާޙް ދޫކޮށްލުމަށް ގޮވާލައި މާފުށީގައި ބޭއްވި ބައްދަލުވުމުގެ ތެރެއިން. 11.10.2025
އޮކްޓޯބަރު 3 ވަަނަ ދުވަހު އިދިކޮޅު އެންމެ ބޮޑު ޕާޓީ އެމްޑީޕީ އިން މާލޭގައި ބޭއްވި ބޮޑު މުޒާހަރާ އިން 6 މީހުން ހައްޔަރު ކޮށް ޖަލުގައި ގެންގުޅޭތާ ހޮނިހިރު ދުވަހަށް 15 ދުވަސް ވާނެއެވެ.
އެއްވެސް ކުށެއްގެ ތުހުމަތުގައި ދައުވާ އެއް އުފުލުމެއް ނެތި 6 މީހުން ޖަލުގައި ބަންދުކޮށްގެން މިހާ ގިނަ ދުވަހު ގެންގުޅުނީ ރައީސް މުއިއްޒުގެ ސަރުކާރުގެ އަނިޔާވެރިކަމުން ކަމަށް ގިނަ ބަޔަކު އަންނަނީ ބުނަމުންނެވެ.
މުޒާހަރާގެ ތެރެއިން ހައްޔަރުކޮށް ބަންދަށް 15 ދުވަސް ޖަހާފައި ތިބި ހަ މީހުންގެ ބަންދުގެ މުއްދަތު މުރާޖައުކޮށްދިނުމަށް ބަންދުގައި ތިބި މީހުންގެ ގާނޫނީ ވަކީލުން އެދުމުން ވެސް "ހާލަތު ބަދަލު ނުވާ" ކަމަށް ބުނެ ބަންދުގެ މުއްދަތު ވަނީ ދަމަހައްޓާފައެވެ.
އެއްވެސް ކުށެއްނެތި، އަދި ގާނޫނާ ޚިލާފަށް ބަންދުގައި ބައިތިއްބާތީ ބަންދުކޮށްފައި ތިބުމުން އެކަމަށް އިހުތިޖާޖު ކުރުމުގެ ގޮތުން ބަންދު ކުރި ބައެއް މީހުން ވަނީ ބަނޑުހައިހޫނު ކަމުގެ ހަޅުތާލެއް ވެސް ކޮށްފައެވެ.
އެމްޑީޕީގެ ލީގަލް ޑިރެކްޓަރ އަހްމަދު މައުރޫފް ވިދާޅުވީ، ބަންދުގެ މުއްދަތު މުރާޖައާ ކުރުމަށް ހުށަހެޅުމުން ކޯޓުން އަމަލު ކޮށްފައިވަނީ މީގެ ކުރިން މިފަދަ ކަންކަމުގައި އަމަލު ކުރާ ގޮތައް ނޫން ކަމުގައެވެ. އަދި ބަންދުގައި ތިބި އެންމެން ވެސް ތަހުގީގަށް ބަރާބަރަށް އެއްބާރުލުން ދީފައިވާ ކަން ވެސް އޭނާ ފާހަގަ ކުރެއްވިއެވެ.
ފުލުހުންގެ ބާރުގެ ބޭނުން ކޮށްގެން ހައްޔަރުކޮށް އަދި ފަހުން 15 ދުވަހަށް ބަންދުގެ މުއްދަތު ޖެހި 6 މީހުންނަކީ:
- މަޖިލީހުގެ ކުރީގެ މެންބަރު ޔާސިރު އަބްދުއްލަތީފު
- ރައްޔިތުންގެ މަޖިލީހުގެ ކުރީގެ މެންބަރު ޔައުގޫބު އަބްދުﷲ
- މާފުށީ ކައުންސިލްގެ ރައީސް ހަސަން ސޮލާހު
- އަލީ ޖުމާން
- އަޒްމީ އަލީ
- ހަސަން ޝާކިރު
މުއިއްޒު ސަރުކާރާ މެދު ހިތްހަމަ ނުޖެހިގެން މިހާތަނަށް ބޭއްވި އެންމެ ބޮޑު މުޒާހަރާގެ ތެރެއިން ހައްޔަރު ކޮށް ފަހުން ދޫކޮށްލީ އައްޑޫ ސިޓީ ކައުންސިލްގެ މެންބަރު ހަސަން ޒަރީރު އާއި މުހައްމަދު ހަލަފު އިބްރާހިމް އެވެ.
