ސީޝެލްސްގެ ވާދަވެރި ރިޔާސީ އިންތިޚާބުގެ ދެ ވަނަ ބުރުގެ ވޯޓުލުން ފަށައިފި، ފުރަތަމަ ބުރުގައި ކުރި ހޯދީ އިދިކޮޅު ކެންޑިޑޭޓް

ސީޝެލްސްގެ ވާދަވެރި ރިޔާސީ އިންތިޚާބުގެ ދެ ވަނަ ބުރުގެ ވޯޓުލުން ފަށައިފި އެވެ.

ރިޔާސީ އިންތިޚާބުގެ ދެ ވަނަ ބުރުގެ ވޯޓުލުން ހޮނިހިރު ދުވަހު ފަށާފައިވާއިރު، ދެ ވަނަ ބުރުގައި ވާދަ ކުރަނީ މިހާރުގެ ރައީސް ވެވެލް ރަމްކަލަވާން އަދި އިދިކޮޅު ކެންޑިޑޭޓް ޕެޓްރިކް ހަމިނީ އެވެ.

މިއީ މީގެ ކުރިން 40 އަހަރު ވަންދެން ސީޝެލްސްގައި ވެރިކަން ކުރި ޔުނައިޓެޑު ސީޝެލްސް ޕާޓީ އިން އަލުން ވެރި ކަމަށް އައުމަށް މަސައްކަތް ކުރަމުން އަންނަ މުހިންމު އިންތިޚާބެކެވެ.

މީގެ ދެ ހަފުތާ ކުރިން ބޭއްވި ރިޔާސީ އިންތިޚާބުގެ ފުރަތަމަ ބުރުގައި އެއްވެސް ކެންޑިޑޭޓަކަށް 50 އިންސައްތަ އަށް ވުރެ ގިނަ ވޯޓު ނުލިބުމާ ގުޅިގެން ދެ ވަނަ ބުރުގެ ވޯޓުލުން ވަނީ ބާއްވަން ޖެހިފަ އެވެ.

ފުރަތަމަ ބުރުގައި އެންމެ ގިނަ އިންސައްތަ ވޯޓު ހޯދާފައި ވަނީ އިދިކޮޅު ކެންޑިޑޭޓް ހަމިނީ އެވެ. އޭނާ ވަނީ ފުރަތަމަ ބުރުގައި 48.8 އިންސައްތަ ވޯޓު ހޯއްދަވައިފަ އެވެ. ފުރަތަމަ ބުރުގައި ދެ ވަަނަ އަށް ދިޔަ ރައީސް ރަމްކަލަވާން އަށް ލިބިވަޑައިގެންފައި ވަނީ 46.4 އިންސައްތަ ވޯޓެވެ.

ބުރާސްފަތި ދުވަހު ވޯޓުލުން ފެށުނު ނަމަވެސް، ގިނަ ރައްޔިތުން ވޯޓުލާން ނިކުންނަނީ ހޮނިހިރު ދުވަހު ކަމަށް ރިޕޯޓުތައް ބުނެއެވެ. އިންތިޚާބުގެ ވަގުތީ ނަތީޖާ ލިބޭނެ ކަމަށް އަންދާޒާ ކުރެވެނީ އާދީއްތަ ދުވަހު އެވެ.

ސީޝެލްސް އަކީ ފަތުރުވެރިކަމާއި، ތިމާވެށީގެ ގޮތުން މުހިންމު ޤައުމަކަށްވާއިރު. ވޯލްޑް ބޭންކުގެ ތަފާސް ހިސާބު ތަކުން ދައްކާ ގޮތުގައި ސީޝެލްސް އަކީ އެފްރިކާގެ އެންމެ މުއްސަނދި ޤައުމު ތަކުގެ ތެރޭގައި ހިމެނޭ ޤައުމެކެވެ.

މިހާރުގެ ސަރުކާރާ ދެކޮޅަށް އެ ޤައުމުގައި ރައްޔިތުން ޝުއޫރު ފާޅު ކޮށްފައިވާއިރު، ސަރުކާރާ ދެކޮޅު ޝުއޫރުތައް ފާއިތުވި ދުވަސް ތަކުގައި ވަނީ އިތުރުވެފަ އެވެ. ރިޔާސީ އިންތިޚާބުގެ ވޯޓު ލުމުގެ އެއް ހަފުތާ ކުރިން އެ ގައުމުގެ އެސަމްޝަން ޖާޒީރާގައި ބޮޑު ރިސޯޓެއް ތަރައްޤީ ކުރުމަށް ބިދޭސީ ކުންފުންޏަކަށް ދިގު މުއްދަތަކަށް ދޫކޮށްފައިވާ 400،000 އަކަ މީޓަރުގެ ބިމާ ގުޅޭ ގޮތުން ސަރުކާރާ ދެކޮޅަށް އަޑު އުފުލާފައިވެ އެވެ.

މީގެ އިތުރުން މޫސުމަށް އަންނަ ބަދަލު ތަކުގެ ސަބަބުން ކަނޑުގެ ލޮނު ގަނޑު އުފުލުމާއި، މަސްތުތާ ތަކެތީގެ ވަބާގެ މައްސަލަތަކާ ވެސް ސީޝެލްސް އަށް ވަނީ ކުރިމަތިލާން ޖެހިފަ އެވެ. 2017 ވަނަ އަހަރު އދ ގެ ރިޕޯޓެއްގައި ފާހަގަ ކޮށްފައިވާ ގޮތުގައި، ސީޝެލްސް އަކީ މަސްތުވާ ތަކެތި އެތެރެ ކުރުމުގެ މައި މަގެއްގެ ގޮތުގައި ބޭނުން ކުރެވޭ ޤައުމެކެވެ.