ކޮލެޖު ނިންމައި ގެއަށް ދިޔަ މަގުމަތީ 18 އަހަރުގެ ކުއްޖަކު ރޭ ހައްޔަރު ކުރިކަން ހާމަވެއްޖެ
މުޒާހަރާއިން ހައްޔަރުކުރެވުނު ހަތް މީހުންގެ ތެރެއިން ބައެއް ފަރާތްތަކުގެ ބަންދަށް 15 ދުވަސް ޖެހި
މީހަކު ހައްޔަރު ކުރަނީ
އެމްޑީޕީން ރޭ މާލޭގައި ކުރި މުޒާހަރާގެ ތެރެއިން ހައްޔަރުކުރި ފަރާތްތަކުގެ ތެރޭގައި ކޮލެޖް ނިންމާފައި ގެއަށްދިޔަ 18 އަހަރުގެ ކުއްޖަކު ހައްޔަރުކުރިން ހާމަވެއްޖެ އެވެ.
ކޮލެޖު ނިންމައި ގެއަށް ދިޔަ މަގުމަތީ ހައްޔަރުކޮށްފައިވަނީ ނ. ވެލިދޫ ޖަވާހިރުމާގެ މުހައްމަދު ހަލަފް އިބްރާހީމް އެވެ. އޭނާ ހައްޔަރުކުރީ، ކޮލެޖް ނިންމާފައި ގެއަށް ދަނިކޮށް މަގުމަތީގައި އެއްވެފައިތިބި މީހުންގެ ތެރޭގައި ތާށިވެފައި ހުއްޓައެވެ. ކޯޓުން އޭނާ ދޫކޮށްލުމަށް ނިންމީ އިތުރަށް ބަންދުގައި ބަހައްޓަންޖެހޭ ޟަރޫރަތެއް ނެތްކަމަށް ފެނުމުންނެވެ. ނަމަވެސް އޭނާ ދޫކޮށްލާފައިވަނީ ވަކި ޝަރުތުތަކަކާ އެކުގައެވެ.
ފުލުހުން މި ކުއްޖާގެ މައްޗަށް ކުރާ ތުހުމަތަކީ ފުލުހުންގެ ދައުރަށް ހުރަސް އެޅުމުގެ ކުށުގެ ތުހުމަތެވެ. މުޒާހަރާއިން ހައްޔަރުކުރެވުނު ހަތް މީހުންގެ ތެރެއިން ހަލަފް ފިޔަވައި އެހެން ހުރިހާ ފަރާތްތަކެއްގެ ބަންދު ވަނީ 15 ދުވަހަށް އިތުރުކޮށްފައެވެ.
ހައްޔަރުކުރެވުނު ފަރާތްތަކުގެ ތެރޭގައި ރައްޔިތުންގެ މަޖިލީހުގެ ކުރީގެ މެންބަރު ޔާސިރު އަބްދުއްލަތީފް، ކުރީގެ މެންބަރު ޔައުގޫބު އަބްދުﷲ އަދި މާފުށީ ކައުންސިލްގެ ރައީސް ހަސަން ސޮލާހު ހިމެނެއެވެ. މި ތިން ފަރާތުގެ ބަންދުވެސް ވަނީ 15 ދުވަހަށް އިތުރުކޮށްފައެވެ.
މުޒާހަރާގެ ތެރެއިން ޕެޕާ ސްޕްރޭ އާއި ތޫނު އަޑު ފޮނުވާ އާލާތް (އެލްއާރްއޭޑީ) ބޭނުންކުރުމުންނާއި ޕެޕަރ ސްޕްރޭ ޖެހުމުގެ ސަބަބުން އެމްޑީޕީގެ ހުޅުމާލޭ މެދު ދާއިރާގެ ނައިބު ރައީސް މުހައްމަދު ރަސްލާނަށް ހާޓް އެޓޭކެއް ޖެހި، ހޮސްޕިޓަލުގައި ފަރުވާ ދެމުންދާކަން ފާހަގަކުށްލެވެ އެވެ.
އެމްޑީޕީން ފާހަގަކުރި ގޮތުގައި އެލްއާރްއޭޑީއަކީ އިވުމުގެ ހިއްސަށް އަސަރުކޮށް، ބޯ އަނބުރައި، ހޮޑުލެވުން ފަދަ އެތައް ސިއްހީ މައްސަލަތަކެއް ކުރިމަތިކުރުވާ އާލާތެކެވެ. މި ބާވަތުގެ އާލާތްތައް ބޭނުންކުރުމަކީ މުޒާހަރާކުރާ ފަރާތްތަކުގެ ސިއްހަތަށް ނުރައްކާވެދާނެ ކަމެއް ކަން ފަހަގަކޮށް އެ ޕާޓީން ވަނީ ކަންބޮޑުވުން ފާޅުކޮށްފައެވެ.
