އިދިކޮޅު އެމްޑީޕީން އިންތިޒާމު ކޮށްގެން މާލޭގައި މިހާރު ކުރިޔަށް ދާ "ލޫޓުވައިފި ލޫޓުވައިފި" އެއްވުމަށް ނުކުތް ބޮޑު ކްރައުޑް ފެނި ރައީސް މުއިއްޒުގެ ސަރުކާރުގެ ބޮޓުންނަށް ކެތް ނުކުރެވިގެން ދޮގު ޚަބަރުތައް ފަތުރަން ފަށައިފި އެވެ.

ރައީސް މުއިއްޒުގެ ސަރުކާރުން ގައުމު ލޫޓުވަމުން ގެންދާތީ ދިވެހި ރައްޔިތުންނަށް ލިބެމުންދާ އަނިޔާތަކަށް ކެތް ނުކުރެވި އެތައް ހާސްބަޔަކު އަންނަނީ ބޮޑު އެއްވުމުގައި ބައިވެރިވެ އެމީޙުންގެ ޝުއޫރުތައް ފާޅުކުރަމުންނެވެ.

ގައުމު ލޫޓުވައިފި ނަމުގައި އާޓިފިޝަލް ބީޗުގައި ކުރިޔަށް ދާ ބޮޑުއެއްވުމަށް ވަނީ ރާއްޖޭގެ އެކި ކަންކޮޅުތަކުން އެތައް ހާސް ބަޔަކު ބައިވެރިވެފަ އެވެ. އެގޮތުން އިދިކޮޅުން ލަފާ ކުރާ ގޮތުގައި މި އެއްވުމުގައި 10،000 އާއި ގާތްކުރާ އަދަދަކަށް ވަނީ މީހުން ބައިވެރިވެފަ އެވެ.

މިހާގިނަ ބަޔަކު އެއްވެ ރައީސް މުއިއްޒުގެ ޚުދުމުހުތާރު ސަރުކާރާއި ދެކޮޅަށް އަޑުއުފުލަމުން ގެންދާއިރު، މި މަންޒަރު ފެނި ރައީސް މުއިއްޒުގެ ސަރުކާރުން ކަޅު ފައިސާ ދީގެން ހިންގާ ޓީވީ ޗެނަލްތަކާއި އޮންލައިން މީޑިއާތަކުގެ އިތުރުން ރައީސް މުއިއްޒަށް ސަނާކިޔާ ބޮޓުންތަކަށް ވަނީ ބޮޑު ހައިރާންކަމަކާއި ސިހުމެއް ލިބިގެން ގޮސްފަ އެވެ.

އެހެން ކަމުން އެ ފަރާތްތަކަށް މި މަންޒަރު ވަރަށް ސާފުކޮށް ފެނި ސިހުން ލިބުނު ނަމަވެސް މި އެއްވުމާއި ގުޅިގެން ތަފާތު ދޮގުވާކަތަށް ސޯޝަލް މީޑިއާގައާއި ސަރުކާރަށް ސަނާކިޔާ ނޫސްތަކުގެ ފަލަސުރުކީ ތަކުގައި ދަނީ ލިޔަމުންނެވެ.

އެގޮތުން މި އެއްވުމަށް ދިޔައީ މަދު މީހުންކޮޅެއް ކަމަށާއި އެންމެ ފަހުން ވެރިކަން ކުރާ ޕާޓީ ޕީއެންސީން ބޭއްވި ހަރުގެ ޖަލްސާއަށް ވެސް އެއަށްވުރެ ގިނަ މީހުން ދިޔަކަމަށް ބުނެ އަންނަނީ ތަކުރާރުކޮށް ދޮގު ފަތުރަމުންނެވެ.

ބައެއް މީހުން، އެއްވެ ތިބި މީހުންގެ ކުޑަ ތަންކޮޅެއް ފޮޓޯ ނަގައިގެން ރައީސް މުއިއްޒު ހިތްޕުޅު އުފާކުރެއްވުމަށް ސޯޝަލް މީޑިއާއަށް މި ފޮޓޯތަށް އަންނަނީ ޝެއާކުރަމުންނެވެ. ހަގީގަތް އޮޅުވާލުމަށެވެ.

މިއީ ވަރަށް ޒިންމާދާރުކަން ކުޑަކޮށް ރައީސް މުއިއްޒުއަށް ތާއީދު ކުރާ ފަރާތްތަކަށް ހަޖަމް ނުވެގެން ކުރަމުން ގެންދާ އަމަލެއް ކަމަށް އިދިކޮޅު ފަރާތްތަކުން ދަނީ ބުނަމުންނެވެ.