އެއްވާތީ ބިރުން ނުކުރާ ކަމެއްނެތް. މިވަރުން ދަންޏާ ހެންވޭރަށް އެރުންވެސް މަނާވެދާނެ

އޮކްޓޯބަރު 3 ވާ ހުކުރު ދުވަހު އެމްޑީޕީން ބާއްވާ އެއްވުމަކީ ގިނަބަޔަކު އެފަދަ އެއްވުމަކަށް އެދިއެދި ތިއްބާ ބާއްވާ އެއްވުމެކެވެ. ސަރުކާރުގެ އަމަލުތައް ހުރިގޮތުން ގިނަ ބަޔަކު ތިބީ ނުރުހި އެކަމަށް އަޑު އުފުލަން ބޭނުން ވެފައެވެ. މިއީ އިދިކޮޅު އެމްޑީޕީން އެފަދަ ކަމެއް ނުކުރާތީ ހިސާބަކަށް ކުދިކިޔަކިޔާ ތިއްބާ ބާއްވަން ނިންމި އެއްވުމެކެވެ.

ދެނެކާ ދެނެއް ނެތެވެ. އެއްވުން ބާއްވަން ކުޑަތަންވާއިރު ސަރުކާރުން ހީވަނީ އެއްވުން ބާއްވާތީ ބިރުން ރޫރޫ އަޅާހެންނެވެ. އެއެއްވުމަށް މީހުން ގެންދިއުމަށް އެމްޑީޕީން ކުރާ މަސައްކަތަށްވުރެ ބޮޑު މަސައްކަތެއް ކުރަމުންދަނީ އެއްވުމަށް މީހުން ދިޔަ ނުދިނުމަށް ސަރުކާރުންނެވެ.

އެއްވުމުގެ އޮފު ކަނޑުވާލާ އެއްވުމުގެ ރާގު އެހެންގޮތަކަށް ބަދަލު ކުރުމަށް ސަރުކާރުން ފުރަތަމަފެށީ ސަރުކާރުން ފައިސާ ދީގެން ގެންގުޅޭ ކުދިންކޮޅު ލައްވައި ސޯޝަލް މީޑިޔާ ހިންގާލާށެވެ. ތަފާތު ޕޯސްޓް ތައް ހަދަހަދައިގެން އެކްސް އެކައުންޓް ތަކާއި ފޭސްބުކްގައި ދައުރު ކުރަން ފެށީކީ ތިޔަހެނެއް ނޫނެވެ. ސަރުކާރުގެ ސިޔާސީ މަގާމް ތަކުގައި ތިބި މީހުން ހޭވައްޓާލާފައި ކުރަމުން އެދަނީ އެކަމެވެ. ދައުލަތުގެ ޓީވީންވެސް ނުސީދާކޮށް އެކަމުގައި އިސްދައުރެއް ކުޅެމުންދަނީއެވެ.

ދެން އެއައީ ކުއްލި އޮޑިޓް ރިޕޯޓެކެވެ. ފެނަކައިގެ ކޮރަޕްޝަނޭ ވައްކަމޭ ކިޔައިގެން އެ ނެރުނު ރިޕޯޓްވެސް އެ ނެރުއްވީ މީހުން ހުކުރަށް ގޮސް ތިއްބައެވެ. ސަރުކާރު ބަންދުގަޑިއެއްގައެވެ. އޮޑިޓަރ ޖެނެރަލް ހުކުރު ވިލޭރޭ ދަންވަރު ހޭލާ ހުރެގެން ސްކޫލް ކުއްޖެއްހެން ގަޑިޖެހެންވާއިރަށް ސަބްމިޓް ކުރަން ޖެހުނު އެސައިންމެންޓެއް ހެންނެވެ. އެރިޕޯޓް ނެރެންވާއިރަށް ސަރުކާރުން އެއާ ގުޅުވާ ފަތުރަން ރާވާފައިހުރި ވާހަކަތަކުގެ ޕޯސްޓްތައް އޮއްސާލިއެވެ. އެރިޕޯޓްގައި އޮންނާނެ އެއްޗެއް ކުރިން އެނގިތިބެ އެކަމަށް ތައްޔާރުވެގެން ތިބި ގޮތަކަށެވެ.

އެވަރުންވެސް ގުޑާ ގޮތެއް ނުވިއެވެ. ސަރުކާރުން ކުރާ ޕޯސްޓްތަކަށް ލިބޭ ޑިސްލައިކާ، އޭގެ ރައްދުގައި ކޮށްފައި ހުންނަ ކޮމެންޓްތަކުން އެކަން ވައިގާ ހިފާ ގޮތެއް ނުވިއެވެ.

ދެން އެބިންދާލީ އެހެން ރާޅެކެވެ. ކުރިން ވައުދުވެ ނުފުއްދިފައި ހުރި ވައުދުތަކުގެ މަތިން ކުއްލިއަކަށް ހަންދާން ވީއެވެ. ފުއްދަން ބުނި ތާރީޚްތައް ފަހަނައަޅާގޮސް އަހަރުވާން ގާތްވެފައިހުރި ކަންކަން ކުރާން އަނެއްކާ އިތުރު ތާރީޚް ތަކެއް ދޭން ފެށީއެވެ. މުސާރަ ބޮޑު ކުރުމެވެ. ކްރެޑިޓް ކާޑުގެ ލިމިޓް ބޮޑު ކުރުމެވެ. ފަންނާނުންނަށް ލޯނު ދޫކުރުމެވެ. މަހުގެ އަގު 20 ރުފިޔާއަށް ގަންނަން ނިންމުމެވެ. ކެޔޮޅުންގެ ބައްދަލު ވުމެވެ. އައްޑޫ ޝަންގިރިއްލާ ހުޅުވުމެވެ. މިހެންގޮސް ކިޔާނެ ކަމެއް ނެތެވެ. ކުއްލިއަކަށް މުއިއްޒުއާއި ސާޖިދާ ފުޓްބޯޅަ ކުލަބުތައް ސްޕޕޮންސަރވެސް ކުރަން ފެށީއެވެ.

ސަރުކާރުން އެވަރު ކުރަމުންދާއިރުވެސް އެއްވުމުގެ ފޯރި ކުޑަވާތަނެއް ނުފެނުނެވެ. ގިނަ ބަޔަކު ފާޅުގައާއި ސިއްރު ސިއްރުން އެއްވުންމަށް ތާއީދު ކުރުން އެދަނީ ފަތުއަޑު ކިޔާފައެވެ. ރަށްރަށުން މާލެ އައުމުގެ ދަތުރުތައް އެދަނީ ހަދަމުންނެވެ.

މިއީކީ ސަރުކާރަށް ތަހައްމަލް ކުރަން ފަސޭހަ ކަމަކަށް ނުވިއެވެ. އެއާއެކު އަނެއްކާ އަނެއްކުޅި ފެށީއެވެ. ކުއްލިއަކަށް ފުލުހުން ރަޔަޓް ގިޔަރުގައި މަގުމައްޗަށް ނެރުނީއެވެ. ގޭންގުތައް އޮޕަރޭޓްކޮށް ބިރުވެރި ކަންތައްތަކެއް ހިންގަފާނެ ކަމުގެ ތުހުމަތު ހިމަނައި ވަރުގަދަ ބަޔާނެއްވެސް ނެރުނީއެވެ. ދުވަސްވަރަކަށް ނުވާ ދުވަސްވަރެއްގައި ކަނޑުދަތުރުކުރާ އުޅަނދުތައްވެސް ޗެކް ކުރަން ފެށީއެވެ.

ކޮންމެއަކަސް އެމްޑީޕީއަށްވުރެ އެއްވުމުގެ ކަންތަކުގައި ހޭބޯ ނާރާ އުޅޭތަން ފެންނަނީ ސަރުކާރުންނެވެ. އެއްވުމަށް މީހުން ނުކުމެދާނެތީއެވެ. ސަރުކާރުދެކެ މީހުން ރުޅިއަންނަ، ނޫނީ ނުރުހޭ މިންވަރު ހާމަވެދާނެތީއެވެ. އެކަމަށްޓަކައި އެވަރު ކުރަމުންދާއިރު ހުކުރު ވިލޭރެއިން ފެށިގެން އެއްވުން ނިމެންދެން ހެންވޭރުކޮޅަށް އެރުންވެސް މަނާވާ ހިސާބަށްވެސް ކަންކަން ހިނގައިދާނެއެވެ.