''ރައްޔިތުންގެ އަސާސީ ހައްގުތަކާއި މިނިވަންކަން ވޮލިއުމް-1" އަދި "މުދަލު ޒަކާތް ހިސާބުކުރުން" ގެ ނަމުގައި ސުޕްރީމް ކޯޓުގެ ކުރީގެ ފަނޑިޔާރު ހުސްނުއްސުއޫދު ލިޔުއްވި ދެ ފޮތް ނެރެފިއެވެ.

އާދިއްތަ ދުވަހުގެ ހަވީރު ބޭއްވި ޚާއްސަ ރަސްމިއްޔާތެއްގައި މި ފޮތް ނެރެދެއްވީ މޯލްޑިވްސް ލޯ އިންސްޓިޓިއުޓްގެ ރައީސް އަދި ކުރީގެ ޕްރޮސެކިއުޓަރ ޖެނެރަލް އަހުމަދު މުއިއްޒެވެ.

ރައްޔިތުންގެ އަސާސީ ހައްގުތަކާއި މިނިވަންކަމުގެ ފޮތާއި ގުޅޭގޮތުން، މީގެ ކުރިން ވެސް ގާނޫނީ އެކި ކަންކަމާ ބެހޭގޮތުން ގިނަ ފޮތްތަކެއް ލިޔުއްވި، ސުއޫދު ވިދާޅުވީ މި ފޮތަކީ ރާއްޖޭގެ ދުސްތޫރީ ނިޒާމާ ބެހޭގޮތުން އޭނާ ލިޔުއްވާ ސިލްސިލާގެ ފުރަތަމަ ވޮލިއުމް ކަމަށެވެ.

މި ފޮތުގައި ގާނޫނުއަސާސީން ލިބިދޭ ކޮންމެ ހައްގެއްގެ ބޭނުމާއި އެހައްގު ކަށަވަރު ކޮށްދިން ސަބަބާއި އެ އިން ކޮންމެ ހައްގަކާ ބެހޭގޮތުން ރާއްޖޭގެ ކޯޓުތަކުން ނިންމާފައިވާ ހުރިހާ ނިންމުންތަކެއް އެ ފޮތުގައި ހިމަނާފައިވާ ކަމަށް އޭނާ ވިދާޅުވިއެވެ.

މުދަލު ޒަކާތް ހިސާބުކުރުން މިފޮތާ ގުޅޭގޮތުން ސުއޫދު ވިދާޅުވީ މުދަލު ޒަކާތް ދެއްކުމާއި އަމަލުކުރާނެ ގޮތް މީހުންނަށް ވަރަށް ނޭނގޭ ކަމަށެވެ. އަދި މިފޮތުން މުދަލުގެ ޒަކާތް ދައްކަން ބޭނުންވާ މީހުންނަށް އެ މައުލޫމާތުތައް މިފޮތުން ސާފުވާނެ ކަމަށާއި، އަމަލުކުރަންޖެހޭ ގޮތްތައް އެނގޭނެ ކަމަށެވެ.

މީގެ އިތުރުން ސުއޫދު ވިދާޅުވީ މުދަލުގެ ޒަކާތަށް މީހުން ހޭލުންތެރި ކުރުވުމަށް ކުރިއަށް އޮތްތަނުގައި މައުލޫމާތު ދިނުމުގެ ސެޝަންތަކާއި، ވާރކްޝޮޕްތައް ބާއްވާނެ ކަމަށެވެ. އަދި ވިދާޅުވީ މިސްކިތްތަކުގައި ވެސް މިފޮތް ބެހެއްޓޭނެ އިންތިޒާމް ހަމަޖައްސައިދޭނެ ކަމަށް އިސްލާމިކް މިނިސްޓަރު ވެސް ވިދާޅުވެފައިވާ ކަމަށެވެ.

މި ދެ ފޮތް މޯލްޑިވްސް ލޯ އިންސްޓިޓިއުޓް މެދުވެރިކޮށް ގަންނަން ލިބޭނެ އެވެ.