މިނިވަން މީޑިއާ ދެމެހެއްޓުމަށް ޔޫކޭއިން ރާއްޖެއަށް ގޮވާލައިފި
19 ސެޕްޓެމްބަރު 2025 | ހުކުރު 14:11އިގިރޭސިވިލާތުން މިނިވަން މީޑިއާ ދެމެހެއްޓުމަށް ދިވެހިސަރުކާރަށް ގޮވާލައިފައި މިވަނީ ސަރުކާރަށް މީޑިއާތައް ކޮންޓްރޯލް ކުރެވޭ ގޮތަށް އޮތް ބިލު، ރައީސް މުއިއްޒު ތަސްދީގު ކުރައްވާފައިވަނިކޮށް
ރައީސް މުއިއްޒާއި އިނގިރޭސިވިލާތުން ރާއްޖެއަށް ކަނޑައަޅާފައި ހުންނަވާ ސަފީރު ނިކް ލޯ
މިނިވަން އަދި ޒިންމާދާރު މީޑިއާ ދެމެހެއްޓުމަށް ރާއްޖެއިން ވެފައިވާ އިޤްރާރުތަކަށް ޙުރުމަތްތެރިކޮށް ހިތުމަށް އިގިރޭސިވިލާތުން ދިވެހި ސަރުކާރަށް ގޮވާލައިފިއެވެ.
އިގިރޭސިވިލާތުން މިފަދައިން ދިވެހި ސަރުކާރަށް ގޮވާލާފައިވަނީ ސަރުކާރަށް މީޑިއާތައް ކޮންޓްރޯލް ކުރެވޭ ގޮތަށް އޮތް ބިލު، ރައީސް މުއިއްޒު ބުރާސްފަތި ދުވަހު ތަސްދީގު ކުރައްވާފައިވަނިކޮށެވެ.
ރާއްޖޭގައި ހުންނަ އިނގިރޭސިވިލާތުގެ ހައިކޮމިޝަނުގެ ރަސްމީ އެކްސް އެކައުންޓުން ކުރި ޕޯސްޓެއްގައި ބުނެފައިވަނީ ދިވެހިރާއްޖެއާ އިނިގިރޭސިވިލާތުންވެސް ސޮއި ކޮށްފައިވާ ސަމޯއާ އެއްބަސްވުމުގައި، ޑިމޮކްރަސީއެއްގައި މިނިވަން މުސްތަޤިއްލު މިނިވަން މީޑިއާގެ މުހިންމުކަން ފާހަގަކޮށް، އެކަން ކަށަވަރުކުރުމަށް އެއްބަސްވެފައިވާނޭކަމަށެވެ. އެކުގައި ވެފައިވާ މިފަދަ އެއްބަސްވުންތަކަށް އިޙްތިރާމްކޮށް، އެ އެއްބަސްވުންތައް ނެގެހެއްޓުމަށް ގޮވާލާކަމަށް ހައިކޮމިޝަންގެ ޕޯސްޓުގައި ބުނެފައިވެއެވެ.
ރާއްޖޭގައި ޚިޔާލު ފާޅުކުރުމުގެ މިނިވަންކަން ދެމެހެއްޓުމަށް އެމެރިކާއިންވެސް ވަނީ ދިވެހިސަރުކާރަށް ގޮވާލާފައެވެ. އެމެރިކާ އެމްބަސީ އިން ފާހަގަކޮށްފައިވާ ގޮތުގައި، ދިވެހިރާއްޖެ އާއި އެހެނިހެން ޤައުމުތަކުގައިވެސް ޚިޔާލު ފާޅުކުރުމުގެ މިނިވަންކަން ކަށަވަރުކުރުމަކީ މުހިންމު ކަމެކެވެ. ޚާއްޞަކޮށް، ސަރުކާރާ ދެކޮޅު ފަރާތްތަކާއި ތަފާތު ޚިޔާލު ފާޅުކުރާ ފަރާތްތަކުގެ އަޑު އިވުމުގެ ފުރުޞަތު އޮންނަން ވާނެކަމަށް ބާރު އަޅައިފައިވެއެވެ.
ބައިނަލްއަގްވާމީ އެކި ފަރާތްތްކުން ދިވެހިރާއްޖޭގައި ހިޔާލު ފާޅުކުރުމުގެ މިނިވަން ކަމާއި މިނިވަން ނޫސްވެރިކަން ދެމެހެއްޓުމަށް ގޮވާލަމުން މިދަނީ، ރައީސް މުއިއްޒުގެ ސަރުކާރުން އަޑީގައި އޮވެގެން މަޖިލީހަށް ހުށަހަޅާ، ސަރުކާރަށް ނިސްބަތްވާ މަޖްލިސް މެމްބަރުންގެ ފުރިހަމަ އަގުލަބިއްޔަތާއެކު، ދިވެހިރާއްޖޭގެ މިނިވަން މީޑިޔާ ކަފުންކޮށް ވަޅުލާ ބިލު ރައްޔިތުންގެ މަޖިލީހުން ފާސް ކޮށް، ރައީސް މުއިއްޒު ތަސްދީގު ކޮށްފައިވާ ދަނޑިވަޅެއްގައެވެ.
މިބިލު ފާސްކޮށްފައިވަނީ މަޖިލީސް ފެށިނީއްސުރެ ޖަލްސާ ނިމެންދެން މި ބިލު ފާސްނުކުރުމަށް ގޮވާލާ މަޖްލިސް ދޮށުގައި ގިނަ އަދަދެއްއްގެ ނޫސްވެރިންނާއި އާއްމު ރައްޔިތުން މުޒާހަރާ ކުރަމުންދަނިކޮށެވެ.
މުޒާހަރާ ރޫޅާލުމަށް ފުލުހުން ވަނީ ހާލަތާ އެކަށީގެންނުވާ ބާރުގެ ބޭނުންކޮށްފައެވެ. ބައެއް ނޫސްވެރިންގެ ބޮލަށް ކަކުލުން އަރައި، އަތް އަނބުރައި، އަންނައުނަށް ގެއްލުންދީ، ހަށިގަނޑުން ލޭ އޮހޮރުވާލާފައިވެއެވެ.
މި ބިލު ތަސްދީގު ކުރުމާއެކު ދިވެހިރާއްޖޭގެ ނޫސްވެރިކަމުގެ މިނިވަންކަން އެތައް ޒަމާނެއް ފަހަތައް ޖެހޭނެ ކަމަށް ގިނަ ބަޔަކު ފާހަގަކުރެއެވެ. އަދި އިދިކޮޅު ފަރާތްތަކުން ވިދާޅުވާ ގޮތުގައި މިއީ ވަރުގަދަ ޚުދުމުހުތާރު ވެރިކަމެއް އުފައްދަވަން ރައީސް މުއިއްޒު ކުރައްވާ މަސައްކަތްތަކުގެ ތެރެއިން ތަސްތީގު ކުރި ބިލެކެވެ. މި ގާނޫނުގެ ސަބަބުން ދިވެހި ރައްޔިތުންނަށް ލިބިފައިވާ ހިޔާލު ފާޅުކުރުމުގެ މިނިވަންކަން ވެސް އެތައްގޮތަކުން ހަނިވާނެކަމަށް ގާނޫނީ ގޮތުން ތަޖުރިބާކާރު ފަރާތްތަކުންވެސް ފާހަގަ ކުރައްވާފައިވެއެވެ.
