މީޑިއާ ކޮންޓްރޯލު ބިލާ ދެކޮޅަށް އިހުތިޖާޖު ކުރާ ނޫސްވެރިންގެ އަގު ވައްޓާލަން ހިންގާ "ހަޑިމުޑުދާރު ކެމްޕޭން" އައިއެފްޖޭ އިން ކުށްވެރި ކޮށްފި

"މީޑިއާ ކޮންޓްރޯލު ބިލް' އާ ދެކޮޅަށް އިހުތިޖާޖު ކުރާ ނޫސްވެރިންގެ އަގު ވައްޓާލައި އަބުރު ކަތިލަން ހިންގާ ކެމްޕޭން އައިއެފްޖޭ އިން ކުށްވެރި ކޮށްފި އެވެ.

އިންޓަރނޭޝަނަލް ފެޑަރޭޝަން އޮފް ޖާނަލިސްޓްސް - އައިއެފްޖޭ އިން އެކްސް ގައި ކުރި ޕޯސްޓެއް ގައި ބުނެފައިވަނީ، އެކްސް އަދި އެހެނިހެން ޕްލެޓްފޯމްތަކުގައި މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) ގެ މެމްބަރުންނަށް އަމާޒުކޮށް ކުރެވެމުންދާ އޮންލައިން ފުރައްސާރަ އާއި އަބުރު ގެއްލޭފަދަ ކެމްޕޭންތަކާ މެދު ވަރަށް ބޮޑަށް ކަންބޮޑުވާ ކަމަށެވެ.

Advertisement

މިކަންކަން ކުރެވެމުން ދަނީ ސަރުކާރުން ހުށަހަޅާފައިވާ 'މީޑިއާ ކޮންޓްރޯލް ބިލް' އާ ދެކޮޅަށް އެމްޖޭއޭ އިން ކުރަމުންދާ ހަރުދަނާ އިހުތިޖާޖަށް ދޭ ސީދާ ރައްދެއްގެ ގޮތުން ކަމަށް ވެސް އެ ޖަމްއިއްޔާ އިން ބުނެފައިވެއެވެ.

"މި ހަޑިމުޑުދާރު އުކުޅުތަކަކީ ނޫސްވެރިންނަށް ބިރުދެއްކުމަށާއި ރާއްޖޭގައި ނޫސްވެރިކަމުގެ މިނިވަންކަމަށްޓަކައި ކުރެވޭ މަސައްކަތް ހުއްޓުވުމަށް ކުރެވޭ މަސައްކަތެކެވެ."

އައިއެފްޖޭ އިން އެމްޖޭއޭ އާއެކު ތިބޭނެ ކަމަށާއި އަދި ނޫސްވެރިންގެ މަސައްކަތަށް އިހްތިރާމު ކުރުމަށް ދިވެހި ސަރުކާރަށާއި އާންމު ރައްޔިތުންނަށް ގޮވާލާ ކަމަށް ބުނެފައިވެއެވެ.

އަދި އޮންލައިން ކޮށް ކުރެވޭ ހުރިހާ ބާވަތެއްގެ ފުރައްސާރަތައް އައިއެފްޖޭ އިން ކުށްވެރިކުރާ ކަމަށް ބުނެފައިވެއެވެ.

ނޫސްވެރިންގެ ހައްގުތައް ރައްކައުތެރި ކުރުމަށް މަސައްކަތް ކުރާ އައިއެފްޖޭ އަކީ، 146 ގައުމެއްގެ ހަ ލައްކަ އަށް ވުރެ ގިނަ ނޫސްވެރިން ތަމްސީލު ކުރާ ޖަމްއިއްޔާ އެކެވެ.

ގިނަ ބަޔަކު ތުހުމަތު ކުރާ ގޮތުގައި އިހްތިޖާޖު ކުރާ ނޫސްވެެރިންނަށް ޒާތީ ގޮތުން ދިމާ ކޮށް އަގުވައްޓާލައި އަބުރު ނަގާލަން ހިންގާ ކެމްޕޭނަކީ ސީދާ ސަރުކާރު އަޑީގައި އޮވެގެން ހިންގަމުންދާ ކެމްޕޭން އެކެވެ.