ތަމްރީނު ހަރަކާތެއްގެ ތެރެއިން ދިވެހި ފުލުހަކު އަހަކުން ވެއްޓި ލިބުނު އަނިޔާތަކަށް ހޮސްޕިޓަލުގައި ފަރުވާދެނީ
ހައިދްރައާބާދުގައި ހުންނަ ޕޮލިސް އެކަޑެމީގައި އައިޕީއެސް ފުރިހަމަ ކުރަމުންދިޔަ ދިވެހި ފުލުހަކަށް އަހަކުން ވެއްޓި އަނިޔާވެއްޖެ
އަނިޔާވި ފުލުސް އޮފިސަރު ތަމްރީނު ހަދަމުންދިޔަ އިންޑިޔާގެ ގައުމީ ފުލުސް އެކަޑެމީ
އިންޑިޔާގެ ހައިދްރައާބާދުގައި ހުންނަ އެގައުމުގެ ގައުމީ ޕޮލިސް އެކަޑެމީގައި އައިޕީއެސް ފުރިހަމަ ކުރަމުން ދިޔަ ދިވެހި ފުލުހަކު، އަސް ދުއްވުމުގެ ތަމްރީނު ހަރަކާތެއްގެ ތެރެއިން އަހުން ވެއްޓި ލިބުނު އަނިޔާތަކަށް ހޮސްޕިޓަލުގައި ފަރުވާދޭން ފަށައިފި އެވެ.
އިތުބާރުހުރި މަސްދަރަކުން ރާއްޖެޓީވީ އަށް މައުލޫމާތު ލިބިފައިވާ ގޮތުން މި ހާދިސާގައި އަނިޔާ ވެފައިވަނީ ފިރިހެން ފުލުސް އޮފިސަރަކަށެެވެ. އަދި އަހުން ވެއްޓި ލިބުނު އަނިޔާތަކުގައި އޭނާގެ ވާތު އުކުޅުވަޅުގައި ރެނދުލާފައި ވާކަމަށްވެސް މައުލޫމާތުލިބެ އެވެ.
މިކަމާ ގުޅިގެން ރާއްޖެޓީވީ އިން ކުރި ސުވާލަކަށް ޖަވާބުދެމުން ދިވެހި ފުލުހުންގެ ފަރާތުން ވަނީ، އިންޑިޔާގައި ތަމްރީނު ހަރަކާތެއްގެ ތެރެއިން ދިވެހި ފުލުހަކަށް އަނިޔާވެފައިވާކަން ކަށަވަރުކޮށްދީފަ އެވެ.
ދިވެހި ފުލުހުންގެ ފަރާތުން ބުނީ އިންޑިޔާގެ ސަރްދާރް ވަލަބައި ޕަޓޭލް ނޭޝަނަލް ޕޮލިސް އެކަޑެމީގައި އައިޕީއެސް ފުރިހަމަކުރަމުންދިޔަ ދިވެހި ފުލުހަކަށް، ތަމްރީނު ހަރަކާތެއްގެ ތެރެއިން އަނިޔާވެފައި ވާކަމަށެވެ. އަދި އެ ޕޮލިސް އޮފިސަރަށް މިހާރު ހޮސްޕިޓަލުގައި ފަރުވާ ދެމުންދާކަމަށެވެ. އޮފިސަރަށް ސީރިއަސް އަނިޔާއެއް ވެފައި ނުވާކަމަށްވެސް ފުލުހުން ބުނެފައިވެ އެވެ.
މި ހާދިސާއާ ގުޅޭ އިތުރު މައުލޫމާތެއް ދިވެހި ފުލުހުންގެ ފަރާތުން ދީފައެއް ނުވެ އެވެ.
