އެމްޑީޕީގެ "ޕިކަޕްް ޖަލްސާ" ހުޅުމާލޭގައި ކުރިއަށް ގެންގޮސްފި
އޮކްޓޫބަރު 3 ގައި އެމްޑީޕީން "ލޫޓުވައިފި ލޫޓުވައިފި" ހަރަކާތް ހިންގުމަށް ވަނީ ރާވާފަ
އެމްޑީޕީން ހުޅުމާލޭގައި ކުރިއަށް ގެންދިޔަ "ޕިކަޕް ޖަލްސާ" ގެ ތެރެއިން: އެމްޑީޕީގެ އެކްޓިވިސްޓަކު ސަރުކާރަށް ފާޑުވިދާޅުވެ ވާހަކަދައްކަނީ
އިދިކޮޅު މައި ޕާޓީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން އިންތިޒާމުކުރި "ޕިކަޕް ޖަލްސާ" ހުޅުމާލޭގައި ކުރިއަށް ގެންގޮސްފި އެވެ.
ހުޅުމާލޭގައި ހޮނިހިރު ދުވަހު ހަވީރު އެމްޑީޕީ ކުރިއަށް ގެނދިޔަ މި ހަރަކާތަކީ އަންނަ އޮކްޓޫބަރު މަހުގެ ތިން ވަނަ ދުވަހު އެ ޕާޓީން ބޭއްވުމަށް ތައްޔާރުވަމުން ދާ "ލޫޓުވައިފި ލޫޓުވައިފި" ބޮޑު ހަރަކާތަށް ތައްޔާރުވުމަށާއި އަދި އެހަރަކާތުގައި ވީހާވެސް ގިނަބަޔަކު ބައިވެރިކުރުމަށް ހިތް ވަރުދިނުމަށް ގޮވާލާ ހިންގި ހަރަކާތެއް ކަމަށް އެމްޑީޕީން ބުނެއެވެ.
އެމްޑީޕީގެ މި ހަރަކާތުގައި އެޕާޓީގެ އިސް ސަފުގައި ހަރަކާތްތެރިވާ ގިނަ އަދަދެއްގެ ބޭފުޅުން ވަނީ ބައިވެރިވެފަ އެވެ. އެގޮތުން މިވަގުތު ރައްޔިތުން މަޖިލީހުގައި މަސައްކަތް ކުރައްވަމުންގެންދަވާ އެމްޑީއަށް ނިސްބަތްވާ ބައެއް މަޖިލިސް މެމްބަރުންގެ އިތުރުން ކުރީގެ މަޖިލިސް މެމްބަރުން ވެސް ވަނީ މި ހަރަކާތުގައި ބައިވެރި ވެފައެވެ.
އެމްޑީޕީން ކުރިޔަށް ގެންދިޔަ މި ޕިކަޕް ޖަލްސާގެ ހަރަކާތްތައް ފެށިފައިވަނީ ހޮނިހިރު ދުވަހު ގެ ހަވީރު 4:30 ގައެވެ. އެގޮތުން މި ސަރުކާރުން ކުރަމުން ގެންދާ ވައްކަމާއި ހިންގަމުން ގެންދާ ކޮރަޕްޝަނުގެ އަމަލުތަކުގެ ވާކަތައް ދައްކަމުން ހުޅުމާލޭގެ ބައެއް ސަރަހައްދުތަކުގައި ވަނީ ޕިކަޕް ބުރުޖަހައިފަ އެވެ.
ރައީސް މުއިއްޒު، ވެރިކަމާއި ހަވާލުވި ދުވަހުން ފެށިގެން ގަސްތުގައި ރާވައިގެން ދިވެހިރާއްޖޭގެ ދުސްތޫރީ ނިޒާމް ހަލާކުކޮށްލުމުގެ ހަޑިހުތުރު މަސައްކަތް މެދުކެނޑުމެއް ނެތި ކުރަމުން ގެންދާތީ އެކަން ނިމުމަކަށް ގެނައުމަށް އިދިކޮޅު އެމްޑީޕީ އިން މާލޭގައި ސިލްސިލާކޮސް މުޒާހަރާ ކުރުމަށް ވަނީ ނިންމާފަ އެވެ.
އެމްޑީޕީން އެގޮތަށް ނިންމާފައި ވަނީ ސެޕްޓެމްބަރު މަހޖުގެ ދެވަނަ ދުވަހުގެ ރޭ ކުރިޔަށް ދިޔަ އެ ޕާޓީގެ ގައުމީ މަޖިލީހުގެ ހަތަރުވަނަ ދައުރުގެ 26 ވަނަ ޖަލްސާގަ އެވެ.
އަދި މި ސަރުކާރު ހަމަ މަގަށް އެޅުވުމުގެ މަސައްކަތް ކާމިޔާބު ވުމާއި ހަމައަށް އިހުތިޖާޖުތައް ސިލްސިލާގޮތެއްގައި ގެންދިއުމަށް ނިންމާފައިވަނީ އަންނަ އޮގަސްޓް މަހުގެ 3 ވަނަ ދުވަހުން ފެށިގެންނެވެ.
